14
Samson, Timna mas Lonyi
1 Dvnyeih gas Samson Timna pheh loh. Houmha nyang Philisti lonyi dvyuk lyis nyvng.
2 Nyang yhen pheh doms loh las nyah ungwes uwus lyis taiq kyoh. Ngos Timna mas Philisti lonyi dvyuk lyis yoeuh ngwis. Ngos nyang lyis nyihwank yoeus mes, sang dyei aq, ge.
3 Nghuot laus eq nyah ungwes uwus nyei zis gas, Nvng Mangso lhyi ma seq dah Philisti lonyi chamus loh yoeus das? Nvng yoeus das dius yvnyang vhuh, dius mas xo ma nyvng lo lhyeh, ge. Nghuot laus eq Samson nyah uwus lyis taiq zis gas, Ngos nyang lyis ngwis, nyang lyis dvyoeus dyei aq, ge.
4 Samson lhyi haih zis shwih kuot das zis gas Yhensain nghuot yvlyis nyah nyhiphoq ma seq. Khasoeh ge lyis Yhensain ka Philisti jens lyis zan das zis toeuh xo nyeis. Haih shishenh gas Philisti jens Israel jens lyis guon nyeis yoq nghuot.
5 Housoeh las Samson ka nyah ungwes uwus yah Timna pheh e loh. Nyamoq houmha dah zvbiq khyam lai loh lyis khangkhyi kyoh lo dvdoeu nyings zis xauhgyo.
6 Yhensain dah yomsoq gas Samson lhyi nyetlos nyettant yombos nhang lha nyang hau khangkhyi lo lyis beqlo lyis teh nyah loq yah lang chingh sat. Nghuot laus eq nyang cha kuot zis nyah nyhiphoq lyis ma taiq kyoh.
7 Hauh thang lhyi nyang nyelo yah loh jisgoh las nyang ngwis goeus.
8 Dvyoq thang lhyi, Samson ka hauh nyelo yah nyihwank das zis doms e. Cho mha nyang chothunk wvng las nyang sat khoq dah khangkhyi lhyi loh yoeuh. Nyang hauh mvng khau mha dyo zwi las dyoyhei bos yvlyis loh yoeuh mauh.
9 Nyang nyah loq yah dyoyhei lap chi lha zo loh; nyah ungwes uwus lyis eq loh dyei las nyah zomh eq zo. Nghuot laus eq Samson ka hauh dyoyhei ka khangkhyi mvng khau mhayah yoeus los zis nghuot yvlyis nyah zomh lyis ma taiq kyoh.
10 Nyah uwus gas hauh nyelo yhen mha loh las Samson ka houmha pwe kuot. Heika wotyamh jens mas dah thungh nghuot.
11 Philisti jens nyang lyis nyvng lyis nyang yah dvgeh nyeis das xiklyis loloeu jens somhci yuk nhang kat dyei.
12-13 Samson nyamoq lyis taiq zis gas, Ngos namoq lyis wishomp dvkoeuqnote 14.12 wishomp: Mvnyei dyet nhang bah taiq bah, ngos doeugoh das. Haih nyihwank pwe nyhet nyeih ma dye lyis vjyuk yoh dyet lyis, ngos namoq lyis jeiyhwiq seh dvyuk dvkoeuq, dyimis yungh dvyuk dvthau dyei das. Namoq ma yoh dyet lyis namoq ngos lyis jeiyhwiq seh 30, dyimis eq 30 thau dyei chah, ge.
Nyamoq gas, Nah wishomp taiq thuq los aq, ngamoq gyo bah, ge.
14 Nyang taiq zis gas,
Zo soeu mha dah zonoms thuq los,
yombos soeu mha dah chau zis thuq los zis cha, ge.
Nyamoq somh nyeih lyis eq wishomp cha lhyi shomp cho ma yoh nghamh shih.
15 Nyei vnyeih lyis nyamoq gas Samson dah yhensain nyhiq lyis taiq zis gas, Nah yhensain phoq lyis hau wishomp vjyuk mhuih nyei dyei aq. Nvng ma kuot dyei lyis gas nvng lyis nah uwus yhennote 14.15 Nah uwus yhen, ge zis gas, Nah uwus yhenbang lyis taiq. eq cheq ngheq tyamp das. Nah aiq yuk ngamoq lyis yus las ngamoq lyis lhuot das vnghuot lah, ge.
16 Housoeh las Samson dah yhensain nyhiq gas nyah jyank mas ngaus las loh taiq, Nvng ngos lyis ma jyet, ngos lyis hoeng. Ngah dyenschangh jens lyis wishomp taiq las, ngos lyis gas hau wishomp vjyuk ma taiq kyoh, ge. Nyang gas, Hauh zis ngah ungwes uwus lyis yangh ma taiq kyoh zis nvng lyis chamus taiq das, ge.
17 Nyang gas hau pwe yoq nyhet nyeih gonh hauh cho gvng mas ngaus nyeis. Nyang nyo ngaus nyeis yvmvyah nyhet vnyeih lyis nyang hauh wishomp vjyuk lyis taiq kyoh tyamp. Hauh thang lhyi nyang Philisti jens lyis taiq kyoh.
18 Housoeh las hau nyhet vnyeih buis ma wvng shih lyis, hauh wus mas bang nyang lyis taiq zis gas,
Dyoyhei thoq lyis chau zis cha?
Khangkhyi thoq lyis yombos zis cha, ge.
Samson phuk taiq zis gas,
Ngah noeupon lhyi yah yos ma phuk lyis gas,
namoq hau wishomp vjyuk ma seq shih das, ge.
19 Yhensain dah yomsoq gas Samson lhyi nyetlos nyettant yombos nhang lha nyang Ashkelon wus pheh loh. Nyang houmha dius somhci sat las nyamoq dah dyimis kyahsoe dvnganh yoeus. Hauh zis hau wishomp phui bang lyis dyei. Hauh thang lhyi bweh goeus cho nyang svsoh nhaiqyo zis yah nyah yhen pheh tauh loh.
20 Samson dah yhensain nyhiq gas nyihwank pwe mha loloeu saiq dah dyenschangh dvyuk lyis dyeizo tyamp zis xauh.