29
Yoba Nyah soe taiq
1 Yoba doms taiq xi zis gas,
Yoba
2 Mangso ngos lyis zungh dyei nyeis yoq lyis teh
ngah kang dwis cho dvlhain doms yoh phoh ya.
3 Hauh uhlyis Mangso ngos yah vjangh nyeis las
ngos mauchuotdwang mas suh lai loh lyis bvng zis pank dyei.
4 Houka ngos nyeisgis buisnyeis lyis
Mangso dah buisnoms kuot cho yah ngah yhen lhyi gomh dyei.
5 Yomzains Mangso ngos yah dvgeh nghuot uhlyis
ngah lo jens dvnganh ngah vyvm vwi mas tsain nyeis.
6 Ngah noeu yahge shvbeq jens nauh nyoshoq dyei las ma thoq shuk lo shoq dvkhauyah dyingh loh.
Ngah tsanlun coeu eq jeis soeh yaus nyeis.
7 Ngos wus logis jens yah xauhgoh khanghmuh
ngos nyamoq mas tsung joqyos yoeus lyis,
8 loyvm jens ngos lyis nyvng yah dvyih nyamoq jhank dyei,
lokhoq jens eq ngos lyis phauh nyang cho chixoeuq khyvlyis toq yap.
9 dius jens dah uhshe bang dang ma taiq lo;
10 yhaugyen thank bang yangh samlo nyeis.
11 Ngos lyis nyvng soeu, nghuot ya ngah cho xauhgyo soeu khanghmuh
ngos kuot goeus zis gis cho taiq.
12 Shohjyen bang ngaus lyis ngos nyamoq lyis pangh.
Pangh soeu ma bos dah chauhlo jens lyis pangh.
13 Nhaiqngis nyoq yaus bang ngos lyis chungh.
Ngos chauhmuh jens dah sam cho bos xo dyei.
14 Ngos dan cho lhyi dyi teh wuot las,
lyi jus cho lhyi uhthop soeh thop toh.
15 Ngos gas nyoqjet bang dah nyoq,
khyei gyau bang dah khyei duot.
16 Ngos gas nyungs bang dah uwus teh,
ngos lyis ma seq bang dah yau cho mha bos yoeuh dyei.
17 Ngos, lhoeng bang dah yomsoq lyis mhont tyamp las
nyamoq dah loqbat zokho note 29.17 L oqbat zokho ge zis nyamoq loq mas shei bah ge banglhyi khyuot kat.
18 Ngos vjangh nghamhloms zis gas, kang xing shoq nyeis las
yhen mha nyens nyens shei das cho nghuot.
19 Ngos gas, vnyet mas vjangh jeis yoh las,
nyah vko eq jyweh yah jyweq dah saiqzains teh nghuot.
20 Yuk khanghmuh ngos lyis vjangh chungh.
Ngos vjangh yombos.
21 Ngos joeui dyei lyis dius jens samlo nyeis las
ngos taiq yvlyis vlhomuh kamp gyo.
22 Ngos dye taiq lyis nyamoq cha ma lhungh;
ngah dang gas nyamoq mas mau zoq teh wvng loh.
23 Yos zwi bang gas zvn wvng zoh lyis mau lhom teh,
nyamoq yuk khanghmuh lhom yoeus.
24 Nyamoq nghamhnywe cho dyuk loh lyis ngos nyamoq lyis ching xoeuq.
Ngos gaus dah nyoqnho ka nyamoq lyis yomdyei jus.
25 Ngos nyamoq lyis zwi las nghamh thyet cho kuot.
Hwankti ka nyah jesphung lhyi shwih teh ngos nyamoq lyis choshe.
Nyamoq yomgyau yvmas nhaiqtaink dyei.