28
Joeui lhyi Chungh
1 Ngwis dwang tsain bos.
Xing shonh dah joqyos tsain bos.
2 Dius jens thyeq lyis nyeisjvng khau masyah doeu yoeus.
Luk masyah thunk shauq yoeus.
3 Luk dwang xo bang gas nyitoengh tuonh las noq thank chuot yvmas xo.
Nyamoq gas nyeisjvng dah noq cho lhyi tsain xo lha soeng soeng noq yvmas luk tsain doeu.
4 Dius nyeis masyah we yvmas, nghuot ya dius khyei ma loh ku yvmas, nyeis khau dwang tsain kyungh.
Nyamoq nyang kyingh houmha muh tsain zwi.
Nyamoq dwang mas twih lhangh khyoq las lang toh.
5 Nyeisjvng thoq mas zonoms jyo yuk.
Nghuot laus eq hauh dvyhangteh nyeisjvng khau mha ka
dvnganh gwi las nyi ngeh tyamp teh vdyis vmons mus.
6 Hauh nyeisjvng mas dah luk gas nila eq bos,
hauh tsoh mas xing bos.
7 Hau luk dwang cho lhyi wuq dvng zons ma nyvng,
zonsmuh eq ma nyvng.
8 Khangkhyi, nghuot ya gohtoeu gyukphoh yewus
hau hank ma loh cho chank khanhamp eq ma suh.
9 Luk dwang xo bang gas than thank luk-uk lyis tsain doeu,
boms khyei lhyi doeu tyamp.
10 Nyamoq luk-uk chank khyoh bangh loh zis yah dvyhangteh,
nyamoq phauhdap luk tsain xo nyvng.
11 Nyamoq jeislvng jeis jyungh mas tsain doeu las
houmha nghop shung toh vyhang lhyi bvng yvmas thuq los nhang.
12 Nghuot laus eq joeui lhyi khamha yoh xo nyvng das?
Seqgyo das zis yang khamha yoh xuq das?
13 Joeui ka seq shei bang mas xo ma nyvng das.
Hauh dah jyoeng phauhdap yvlyis hank ma seq.
14 Noq dah nvmukdra yahge thomh taiq lyis,
houmha joeui ma xo nyvng, ge.
15 Hauh yvlyis ngwis nghuot ya xing yah ma yoh wis.
16 Xing gyingh yahge phauhdap luk yah
nyah phauhdap zis ma yoh yih goh.
17 Houka xing thoq lyis phauh,
xing khuq yahge pat kom gyingh thoq lyis phauh.
18 Joeui ka tanda, pvt nghuot ya pvtvmya thoq lyis zes phauh.
19 Gis thank utapvya yahge xing gyingh yah
hau joeui phauh cho ma yoh byi.
20 Housoeh lyis joeui vpom khamha nghuot?
Yang seqgyo cho khamha yoh xuq das?
21 Dwis ya dwis bang hank eq hauh yvlyis ma yoh nyvng.
Dang dah nghoq yangh ma nyvng.
22 Shei bang yahge dyoqbis cho yangh,
Ngamoq dang lamh kyingh dvxauhgyo, ge rhen.
23 Mangso kyingh hauh cho dvseq,
nyang joeui khalhye xo nyvng joqyos seq.
24 Khasoeh ge lyis nyang nyeisjvng vthang lhyi nyvng,
maukhung o mha joq ya joq yvlyis nyvng.
25 Mangso ka lyeis lyis nyah yomsoq dyei las
jyommauh masyah mau wus nhang.
26 Mangso mau khamha wus das zis yahge,
maujau jau loh das cho thyet toh uhlyis,
27 Mangso ka joeui lhyi yoeuh las hauh phauhdap yvlyis thyet.
Nyang joeui lhyi toeutsung lha hauh yvlyis shi yoeuh.
28 Mangso ka yang dius jens lyis taiq,Ref 28.28: Chd 111.10; Sod 1.7, 9.10
Yhensain lhyi gyukwoms zis gas joeui nghuot;
ma gis cho lhyi jhank zis gas seqgyo cho nghuot, ge.