16
Yoba
1-2 Ngos housoeh teh dang xikpheh xauhgyo ku;
namoq dyei dah nhaiqtaink zis gas shoeuhshih zis dvnghuot.
3 Namoq vjangh taiq nyeis shih das lah?
Nvng vjangh thang thank dang bos lhyeh?
4 Namoq ngah joqyos mas, ngos eq nah joqyos mas nghuot lyis,
namoq taiq nyeis dang dvnganh ngos yoh taiq.
Ngos joeui bos bos lainkamh nocwih kuot las dang nyoshoq yoh taiq zungs toh.
5 Joeui dyei dang yah ngos namoq lyis yom yoh dyei.
Tsoq taiq zis yah namoq lyis nhaiq yoh taink.
6 Ngos dang taiq lyis eq nos ma sunghhuq;
ma taiq taiq nyeis lyis eq ma nyens.
7 Mangso eh, nvng ngos lyis nyungdaus nhang:
nvng ngah yhenbang dvnganh lyis mhont tyamp.
8 Nvng ngos lyis nyhik yoeus; nvng ngos lyis kanghjyoeng kat.
Ngos yau mas yeis dvjons lo las dius jens gas,
hauh zis ngos cu dah kanghjyoeng nghuot ge yoeus.note 16.8 Sonzoh ngis 7-8 Hebre mas ma bvng.
9 Mangso ngos lyis nhaiqyo las vdoeus doeus langchingh;
nyang ngos lyis hoeng zis yah nyoqtyi yoeuh.
10 Dius jens ngos lyis nhuot yhont:
ngos lyis khyam nyang lhaink toh las bvlot tyuk dyei.
11 Mangso ka ngos lyis ma gis bang loq mas kyauh.
12 Ngos nyens nyens tap tap nyeis laus eq
Mangso ngos lyis khyunghdoq mhayah yoeus las pop pop bat, thunghthyi.
Mangso ka ngos lyis baiq toeuq joqyos khyvlyis yhung lha
shot khanghmuh masyah ngos lyis nyo baiq.
13 Nyo gas ngos lyis zuk las dvmtap.
Hauh thang lhyi yangh nyang nhaiqnyen cho ma chixoeuq.
14 Nyang ngos lyis vlhain lhain dvmtap.
15 Ngos kuk zis yah yanghthung dyi wuot
las ngos hai tsohmop boms mas tsung toh.
16 Ngos ngah nyoqnho nes shoq ngaus.
Ngah nyoqjeih yam las siyet yah lhaink toh.
17 Nghuot laus eq ngah loq yah lhoeng cho cha ma kuot:
ngos shvmanh dung zis eq gyingshang.
18 Nyeisjvng eh, ngos gas dius sat soeu teh ngah suih lyis vnghop toh,
lyi jus cho xiklyis ngos kaiq ngaus thwe lyis nvng ma xauhgyo vtomp toh.
19 Maukhung mha ngah xiklyis toq yap lasRef 16.19: Yob 19.25
ngah shot pheh taiq soeu dvyuk bos.
20 Ngah dyenschangh jens ngos lyis nyhap;
ngos gas Mangso xikkhonh mas nyoqdyeis shuon.
21 Dius dvyuk nyah dyenschangh xiklyis bos dung teh,
ngos ngah xiklyis Mangso lhyi bos dung dyei das dius dvyuk o.
22 Gvshih ngah nyenhkyi ka lai loh nyeis las
ngos gas ma tauh los lo dah cho mha suh loh.