24
Nyeisjvng lyis Soetuon das
1 Yhensain ka nyeisjvng lyis shont tyamp las jyamhjyuklhyuk toh. Hauh yvlyis toeu-mhuk las nyah dius jens lyis lhoeu sanh tyamp das.
2 Hauh uhlyis phudyei bang gas dius jens teh, yhensain jens gas jyeidwis jens teh, yhensain nyih jens gas jyeidwis nyih jens teh, ungh bang gas wis bang teh, jyeih dyei bang gas jyeih bang teh, dis bang gas nyungs bang teh nghuot das.
3 Yhensain haih dang taiq goeus yvmvyah nyeisjvng thoq gas dvyos dvsanh dyoqbis das.
4 Nyeisjvng gas kyuk las nyhauh loh, mungkvn gonh yomnhuk loh; maukhung nyeisjvng aiq koeuq yah bopyuq loh.
5 Dius jens gas Mangso dah lyi lhyweq zis yah nyeisjvng lyis vwot v-oeu kuot. Nyang kuot toh dah vcaiq vto joq nhang dah thanghchvp lyis thyoq tyamp.
6 Housoeh las Mangso ka nyeisjvng lyis nhoengh goeus. Nyeisjvng dius jens gas nyamoq kuot zis yah dvyhangteh xauh kham; dius jens gas ngeh jom tyamp las kang dwis bang zes zes nain loh.
7 Zvbiq nwis nyhauh loh, zvbiq ma joq lo, xikpheh pyo bang yuk khanghmuh gas gvshih kuk nyeis.
8 Nyamoq gauslaus dah toenk khvlhank thwe doms goeus.
9 Zvbiq shuk las pyo dah lvkhyank ma kat lo das. Hauh whitau lhyi hank ma xauh chaq lo das.
10 Wus khau mha dvnganh gas nhunk nyeis las dius jens gas jesluiq das xiklyis nyamoq nyang yhen khau mha khomh nyheih lhunk las nyeis.
11 Zvbiq ma joq lo yvmvyah dius jens gas talhoeu mha tsain kaiq. Pyo cho ka hauh mau masyah vcaiq vto shang tyamp goeus.
12 Wus gas dyoqbis goeus, nyah wus khomh eq thyoq khyoq goeus.
13 Heika mungkvn gonh mas dah dius nyau jens mas bweh das cho nghuot. Houka jyo yhomh dah vthang teh nghuot das. Tsanlun shih zains khanghmuh mas dah shih khyop teh, zvbiq nwis mas dah zvbiq shih gyoh teh nghuot das.
14 Doeng nyeis bang gas gaus las lvkhyank kat das. Buiswvng mau bang gas Yhensain kha iq kuhxing cho taiq das.
15 Buisthuq pheh bang gas Nyang lyis chungh das. Thomh yvm chank yah nyeis bang gas Yhensain, Israel dah Mangso lhyi chungh das.
16 Mungkvn we thank mhayah dan dah dius nyau Israel chungh dah lvkhyank lyis ngamoq xauhgyo das.
Nghuot laus eq ngah xiklyis nghamhloms chank ma bos. Ngos gas dyoqbis goeus, mhuih bang gas tsoq las mhuih nyeis. Nyamoq dah mhuih khwangh cho ka zes xunghxent los.
17 Yuk khanghmuh heimha gyo geh! Gyuk dvn phoh cho, dwang eq lhyik eq namoq lyis langh nyeis.
18 Gyuk cho mhayah phang luiq loh bang hank laus eq dwang mas gyoms das. Dwang masyah luiq loh bang hank laus eq lhyik mas nyih das. Khasoeh ge lyis mau thunghkyei ka maukhung mhayah gyoh das, nyeisjvng vpom eq nonh das.
19 Nyeisjvng gas gwi yos dwvng las goq loh zis yah vdyis vmons mus das.
20 Nyeisjvng gas yheiyet soeu teh vtyi vkamh, lyeis jyang zvnglo lhwih teh lhwih das. Mungkvn gas nyah yaunos yah nhiq khyoq das. Houka lains loeu las khanhamp eq ma toq lo das.
21 Yhensain ka nyhang mha yomsoq yahge, nyeisjvng mas guon bang lyis joeng das shishenh jweh los.
22 Thung dius jens lyis dwang mas kat toh teh, Mangso ka hwankti jens lyis tsainh las nyamoq lyis joeng shishenh jweh los shoq thung mha lhunk toh das.
23 Lhamhmuh gas soeng soeng noq las, buis eq ma tso lo das. Khasoeh ge lyis Maukhung Jesphung Yhensain ka hwankti kuot das. Nyang Zion boms Yerusalem wus lyis guon das las nyah dius jens dah logis jens gas nyah phunk lyis nyvng das.