23
Taire lyis Tyi
1 Heika Taire cho loeus nghuot.Ref 23.1-18: Ezk 26.1—28.19; Yol 3.4-8; Amo 1.9-10; Zek 9.1-4; Mat 11.21-22; Luk 10.13-14
Thomh mas loh dah sangpho lo jens eh, kuk las oeu ngaus geh. Namoq dah yhen Taire sangpho goeukhanh gas dyoqbis goeus. Houmha dah yhen jens eq goeukhanh eq dyoqbis goeus. Hauh loeus lyis nah sangpho Kupru masyah tauh los uhlyis xauhgyo.
2-3 Sidon mas dah soenghi jens eh, kuk geh! Namoq gas Shihor lvng cho dius nhang lha Egutu mas yuk dah jyo lhyi wis ungh zis yah dius nyau dvnganh yah soenghi tsain kuot.
4 Sidon wus eh, nvng xoqphuh goeus! Thomh yahge nvmukdra jens gas nvng yah ma sen ge taiq zis gas, Ngos khanhamp eq loshang ma bos, ngos khanhamp eq loloeu lonyi jens ma nyhoeu bes kat, ge.
5 Taire wus dyoqbis goeus ge dah loeus xauhgyo lyis Egutu bang yangh dyosdvn das, yom gyau das.
6 Phoenisia dius jens eh, kuk las oeu geh. Spain pheh phang luiq loh geh.
7 Haih Taire mas dah wus gas gohnhamp yah kuot toh las namoq pyo dah wus nghuot lhyeh? Haih wus gas nyeis das bang thomh kyo lha los bang nyeis das joqyos nghuot lhyeh?
8 Hai kuhxing dah Taire wus mas hau dvnganh nghamh toeuq las she los zis hank? Haih wus mas dah soenghi zau jens gas nyeisjvng thoq mas nyoqnho ngelang bos thank bang ma nghuot lhyeh?
9 Maukhung Jesphung Yhensain nghamh toeuq toh goeus. Nyang gas nyamoq kuot goeus yvmas dah Khwank cho thank nhang das zis yahge nyamoq dah nyoqnho ngelang bos bang dvnganh lyis o mha khyoq tyamp das zis nghamh toeuq.
10 Namoq Spain mau mas los nyeis bang eh, Yos loh zwi geh. Houmha namoq lyis hank ma gos dyei lo.
11 Yhensain ka nyah loq thomh thoq mas lvm lha munghdan jens lyis mhuk tyamp. Nyang gas Phoenisia Soenghi joqyos vpom lhyi thyoq tyamp das xiklyis tying toh goeus.
12 Sidon wus eh, nah pyo cho ka thank goeus, nah dius jens eq zaiq zis xauh. Kupru pheh phang luiq loh bang yangh jes ma luiq das.
13 Houka Taire mau lyis yewus nyenh loh nhang dah Asiria bang ma nghuot, Babilon bang dvnghuot. Hau Babilon bang gas Taire mas lhaink nyeis das tyoeuqzvm jens tsuk, Jesdvp jens thyoq khyoq las hauh wus gas dyoqbis joq.
14 Nvmukdra mas loh dah sangpho lo jens eh, kuk las oeu geh. Namoq nges toh dah wus gas dyoqbis goeus.
15 Taire wus gas hwankti dvcaiq, nyhetci zvn tohnyhik toh das shishenh jweh los. Nyhetci zvn thank lhyi hauh wus gas lvkhyank mas dah nghe nyhiq teh nghuot das.
16 Tohnyhik toh dah nghe nyhiq eh,
toenk chi lha wus mas loh chwang yenh aq:
yukgis jens lyis doms shwih los das nyhenshang
toenk bat las lvkhyank doms kat aq, ge.
17 Nyhetci zvn lai lyis Yhensain ka Taire wus lyis nyah nghe nyhiq soenghi doms kuot nhang das. Nyang gas mungkvn mas dah munghdan jens dvnganh lyis nyah gungs yah nghoh das.
18 Nyang soenghi kuot las yoh dah ngwis gas nyang ma yung toh, Yhensain lhyi kyauh toh das. Yhensain lhyi paiq bang gas nyah ngwis lyis nyamoq chah dah zonoms yahge dyimis wis yvmas yhung das.