8
Yhensain Dang thang thyet
1 Yhensain taiq, Lvbuh muot aq, jeswus gas zonsmuh teh ngah mau mas dang gyoh los. Ngah dius jens gas ngos nyamoq yah kuot toh dah thanghchvp thyoq goeus. Ngos jyauh cho lhyi gomloeus tsain toq.
2 Nyamoq gas, ngos lyis nyamoq dah Mangso ge lui, nyamoq gas ngah dius jens nghuot las nyamoq ngos lyis seq ge hoeuh laus eq,
3 nyamoq gas gis cho lhyi peq tyamp. Haih gvng mas nyamoq dah jeswus jens nyamoq lyis chank khat das.
4 Ngah dius jens hwankti jens khyen laus eq nyamoq nyang ehnyet yah dvkuot. Nyamoq uhshe bang toeuq toh laus eq ngos kyink cho ma bos. Nyamoq gas nyamoq dah ngwis xing yoeus las phvra kuot, houka nyamoq nyang dah dyoqbis cho xiklyis dvnghuot.
5 Ngos Samari wus mas dius jens paiq dah xing noeulu lyis hoeng: Ngos nyamoq lyis nhaiqlom dyis: Nyamoq khanhamp jweh shoq ma lhoq ma shang mus das lah?
6 Houka Israel loqmuh dap soeu kuot dah phvra dvnghuot las mangso ma nghuot. Samari mas paiq dah xing noeulu gas vdyis vmons thungh thyi tyamp das.
7 Nyamoq lyeis jyo khyoq lyis lyeisjyang jyo yhomh das, jyo zains mas jyo ma nyhink lyis ohlhyoq khanhamp eq ma yoh thuq los nhang. Yoh thuq los nhang lhyi yangh hauh zis lvbaus yah zo tyamp das.
8 Israel jens gas nyhau tyamp zis xauh goeus. Nyamoq gas dius nyau jens mas nyeis las hank ma o dah auh cauh teh nghuot.
9 Israel dius jens gas mauhlyihzoe lamh jens teh ehnyet than lha nyamoq nyang cho pheh loh. Nyamoq gas Asiria jyank masyah pangh cho loh sang. Uhkung phauh dyei zis yah gohtoeu dius nyau jens dah gos dyei cho yoeus.
10 Nghuot laus eq gvshih ngos nyamoq lyis dvgeh tsainh las joeng das. Ma nyangh lyis nyamoq gas Asiria hwankti zainsmuh nyamoq lyis zaiq cho vshoh vjyen xauh kham das.
11 Israel dius jens yaunos phui das zis phon nyoshoq she ci she nyamoq yaunos kuot das joqyos zes nyo los.
12 Ngos dius jens xiklyis ngos jyauh cho nyoshoq lhaih toh dyei laus eq nyamoq xiklyis lvbaus teh peq tyamp.
13 Nyamoq ngos lyis lomhxangh tsain dyei las hauh lomhxangh shoh nyamoq zo. Ngos Yhensain nyamoq lyis nhaiq ma doeus, housoeh gvshih ngos nyamoq dah yaunos lyis soh las hauh xiklyis ngos nyamoq lyis joeng das. Ngos nyamoq lyis Egutu pheh doms nhang kat das.
14 Israel dius jens gas hwankti yhen tsain ci, nyamoq nyang dah gvnkhanh soeu lhyi tohnyhik. Yuda dius jens gas ciank ci wus jens tsain kuot. Nghuot laus eq ngos nyi nhang lha nyamoq dah hwankti yhen jens yahge wus jens lyis ngheq khyoq das.