9
Gohnyau lyis Nyihwank
1 Hauh muh dye thang lhyi uhshe bang dvyhamh ngah jyank mas los taiq zis gas, Israel jens, phudyei bang, Lewi jens gas, haih mau mas nyeis Khanan, Hiti, Perizi, Yebusi, yahge Amori dius jens, maukyo Amon, Moab, yahge Egutu mas dah dius nyau yah ma gang, hauh bang dah vwot v-oeu cho yah dvyhangteh chank kuot.
2 Khasoeh ge lyis hauh bang dah lonyi jens lyis Yuda vbusbih jens yahge loloeu jens yoeus las hau Mangso dah gyingshang vnyau gas hauh mau bang yah lhoeuq tyamp. Uhshe bang yahge guon bang gas haih lom ma luk cho pheh uhshe loh nyeis, ge.
3 Ngos hauh zis xauhgyo lyis nhaiq ngis las ngah khau dyi yahge dyixing langchuiq, cam eq nhuotmi eq dvkhamh nuot tyamp las mauh tsung toh.
4 Hauh uhlyis jonsdoeus loh bang dah yobos gvng mas Israel Mangso dah dang lyis gyukwoms bang gas ngah jyank mas zain los. Ngos gas, nyenhthang ngheq phudyei yoq jweh shoq mauh tsung toh.
5 Nyenhthang phudyei yoq jweh uhlyis, ngos womkyi masyah toq las juiq dah dyilo yahge dyixing wuot zis, Yhensain, ngah Mangso lhyi phvluk zomhgyuis, loq lhywa lha,
6 dung zis gas, Ngah Mangso eh, ngamoq dah yobos gas uhloms nyop shoq nyo joq las maukhung lhyi thuk shoq nghuot. Housoeh las ngah Mangso eh, ngos nyo xoq las nah nyoqnho lhyi ma womh nghank yoeuh.
7 Ngamoq dah phauh thyeih moq zaih masyah khvnyhik jweh shoq yobos nyo joq. Housoeh yobos thoeu yvmvyah khvnyhik nghuot nyeis zis yah dvyhangteh ngamoq eq, ngamoq hwankti jens eq, ngamoq dah phudyei bang eq gohmau hwankti loq mas kyauh zis, sham mha kyauh zis, jonsdoeus loh zis, thyoq zo zis, nyoqnho shen zis xauh goeus.
8 Gvshih dvdvm Yhensain, ngamoq dah Mangso ka ngamoq lyis nyah jyehjuh chixoeuq las, nyet nhang zis yah nyah gyingshang joqyos mas jesluiq shohluiq nyeis nhang. Nvng gas ngamoq lyis jons duot masyah lhuiq kat las kang dwis cho vsaiq dyei.
9 Ngamoq gas jons duot khoq. Khasoeh ge lyis ngamoq dah Mangso ka ngamoq lyis hau jons duot yvmas tyamp toh zis ma nghuot. Ngamoq lyis luiq nhang zis yahge ngamoq Mangso yhen lhyi yoh kuot las hau dyoq joq yvlyis soq das nyhenshang, Yuda mau yahge Yerusalem wusciank yoh doms ci das xiklyis nyang gas nhaiqnyen ehnyet yah ngamoq lyis Persia hwankti xikkhonh mas nyoqnho yoh nhang.
10 Nghuot laus eq ngamoq dah Mangso eh, heisoeh bweh thang lhyi gvshih ngamoq cha yoh taiq shih das lah? Ngamoq nah tyingtoh dang lyis domsyos ma doms gyo lo.
11 Hauh zis gas nah jyeidwis lvpe jens lyis yah taiq toh, Namoq loh wvng sain das mau gas ma shang dah mau, dvthang mhayah gohtoeu dvthang mha jweh shoq ma lhoq ma shang dius yah dyingh las vwot v-oeu mau nghuot.
12 Housoeh las namoq dah lonyi jens nyamoq lyis vdyeizo goh, nyamoq dah lonyi jens namoq vyoeus goh. Namoq yombos las hauh mau, hauh nyeiscoeu xauh zo zis namoq lo jens xiklyis vcaiq vto vso xauh sain das xiklyis nyamoq yah buisnoms kuot cho khanhamp eq vxo goh, ge toh.Ref 9.12: Dyu 34.11-16; Lyi 7.1-5
13 Ngamoq dah yobos yahge cu cho gvng mas joeng cho vja ja xauh thang lhyi yangh, ngamoq dah Mangso nvng gas ngamoq xauh vvng nyhoq ngamoq lyis yobos ma dyei, ngamoq lyis luiq nhang goeus cho lhyi ngamoq seq.
14 Housoeh las ngamoq gas nah tyingtoh dang lyis cha xwe ma nhang cho doms kuot las hau vwot v-oeu muh kuot bang yah nyiyoeus, lonyi dyeizo cho yoh kuot das lah? Kuot lyis, dvyuk eq ma luiq lo, ma nyet lo shoq nvng nhaiqyo las ngamoq lyis thyuk das zis nghuot.
15 Yhensain, Israel Mangso eh, nvng gas dan. Nghuot laus eq nvng ngamoq lyis lhuiq kat. Ngamoq nah xikkhonh mas ngamoq dah yobos cu rhen; ngamoq gas nah xikkhonh mas, wvng los das toeuh yoh bang ma nghuot, ge.