44
Buisthuq Khyamkhomh Yhung
1 Hauh dius yuk gas ngos lyis Yhenmuh joqyos dah buisthuq shot nghe khyam khomh mas shwih los. Hauh khyam khomh gas nyheih toh.
2 Hauh uhlyis Yhensain ngos lyis taiq, Haih khyam khomh gas khanhamp eq ma phank nyheih toh chah, dius hank lyis eq ma yhung nhang. Khasoeh ge lyis ngos, Yhensain, Israel Mangso houcho wvng. Houka nyheih toh chah.
3 Nghuot laus eq guon nyeis dah zau gas ngah xikkhonh mas gyingshang zonoms zo shuk das xiklyis houmha gis loh. Nyang vkhau vthang mha wumuk yvp chank, khyam khomh cho wvng las thuq das, ge.
Yhenmuh mas wvng das Lyi
4 Hauh thang lhyi hau dius yuk ngos lyis mautsung khyam khomh cho yah Yhenmuh ganthoq mas shwih loh. Ngos yoeuh kat lyis Yhensain dah Yhenmuh khau mha Yhensain dah phunk yah dyingh joq. Housoeh ngos nyeisjvng mas gop gyoh.
5 Yhensain ngos lyis taiq, Lvcang eh, nvng nyvng zis yahge xauhgyo zis dvnganh lyis kamp gyo aq; ngos nvng lyis Yhenmuh xiklyis lyi thungh tsain taiq kyoh bah. Yhenmuh mas khah dius jens thuq wvng gis kuot, kha dius jens ma gis kuot yvlyis vlhomuh comh aq.
6 Ngos, Yomzains Yhensain ka Israel dius jens kuot nyeis dah vchoqh vlhauq vyhang lhyi ma jhen toh lo das oen, nyamoq gomloeus seq toq bang lyis taiq kyoh aq.
7 Nyamoq gas lomhxangh coeu yahge suih ngos lyis dyei uhlyis, ngah domsyos ma gyo, vthyoh ma tyomh dah lvbaus jens lyis ngah Yhenmuh mas wvng nhang zis yah hauh yvlyis lhoq lhoeuh. Housoeh las ngah dius jens gas nyamoq kuot goeus dah vchoqh vlhauq dvnganh yah ngah thanghchvp lyis thyoq.
8 Nyamoq ngah Yhenmuh mas gyingshang, toeuq toh yvwons lyis ma yoeuh, nghuot laus eq hauh gungsthaiq lvbaus lyis yoeuh nhang.
9 Ngos Yomzains Yhensain taiq hoeuh. Vthyoh ma tyomh dah lvbaus, ngah domsyos ma gyo soeu hank eq ngah Yhenmuh mas ma yoh wvng das. Israel jens mas nyeis dah lvbaus yangh ma yoh wvng das.
Peq toh Lewi jens
10 Yhensain ngos lyis taiq, Ngos yah gang las phvra lyis paiq loh dah Lewi jens yah dvgeh nyet dah Israel jens lyis ngos joeng nyeis.
11 Yhenmuh mas khyam khomh jens lyis yoeuh zis yah eq, Yhenmuh khau mha muh kuot zis yah eq nyamoq ngos lyis phuqsoe mvbeh. Ngheq dyei jyungshuk xiklyis yahge lomhxangh xiklyis dius jens dyei dah gaunyhauq jens sat las dius jens lyis phuqsoe yvwons yoeus mvbeh.
12 Nghuot laus eq nyamoq gas Israel dius jens xiklyis phvra paiq cho shwih uhshe loh. Heisoeh khyvlyis dius jens lyis yaunos mas shwih wvng yvmvyah ngos Yomzains Yhensain ka nyamoq joeng cho xauh chah oen maukhi toh.
13 Nyamoq gas phudyei bang khyvlyis ngos lyis ma gis phuqsoe, nghuot ya ngah gyingshang vyhang nvm mas ma gis loh, nghuot ya Gyingshang Thank Joqyos mas ma gis wvng. Heika nyamoq kuot goeus dah vchoqh vlhauq xiklyis joeng cho nghuot.
14 Ngos nyamoq lyis Yhenmuh mas nyhen dah muh kuot das xiklyis toeuq toh dyei, ge.
Phudyei Bang
15 Yomzains Yhensain taiq, Nghuot laus eq Lewi vkoq yah sen lha Zadok vnyau vshih mas dah phudyei bang gas, nyet dah Israel jens ngos lyis nungs phuk loh laus eq nyamoq gas Yhenmuh mas ngos lyis lomluk luk tsoq phuqsoe nyeis. Housoeh gvshih nyamoq gas ngos lyis phuqsoe das bang nghuot. Ngah xikkhonh mas los las lomhxangh coeu yahge suih ngos lyis dyei das.
16 Ngah Yhenmuh mas nyamoq kyingh wvng das, ngah phon mha phuqsoe das, Yhenmuh paiq cho mha shwih uhshe das.
17 Nyamoq Yhenmuh khyamkhau vkhau puk khyam khomh cho wvng lyis, jeiyhwiq dyimis wuot chah. Nyamoq Yhenmuh mas nghuot ya khyamkhau vkhau puk mas muh zwi uhlyis yvngmauh yah kuot dah zis cha eq ma gis wuot.Ref 44.17-18: Dyu 28.39-43; Lew 16.4
18 Gywesjeis ma thuq dah dyimis, jeiyhwiq uhthop thop, jeiyhwiq lhuhkhyaq wuot chah, dyichih gas ma gis chih.
19 Dius jens nyeis dah khyamkhau nghe puk pheh ma thuq loh shih lyis, Yhenmuh mas muh zwi lyis wuot dah dyimis cangxeih khyuot las gyingshang yvp jens mas toh khoq chah. Dius jens lyis nos nhang cho ma bweh das xiklyis nyamoq gyingshang dyimis thaiq las gohtoeu dyimis wuot chah.Ref 44.19: Lew 16.23
20 Phudyei bang gas uh ma gis yuk, cam xing shoq eq ma gis toh, geh ko toh chah.Ref 44.20: Lew 21.5
21 Phudyei bang gas khyamkhau vkhau puk mas ma wvng shih lyis zvbiq ma gis shuk.Ref 44.21: Lew 10.9
22 Phudyei soeu hank eq yhensain phoq kangh tyamp dah vmesbih lyis nyi ma gis hwank. Nyang gas Israel lonyi gyingh lyis kyingh nyihwank chah, nghuot ya phudyei soeu dah chauhmuh gis shoeuh.Ref 44.22: Lew 21.7, 13-14
23 Phudyei bang gas ngah dius jens lyis kha ka gyingshang, kha ka ma gyingshang; khah zis lhoqshang nhang toh, khah zis gas ma lhoq yvlyis seq das xiklyis jyauh chah.Ref 44.23: Lew 10.10
24 Soe bos lyis, phudyei bang gas ngah lyi yah dvyhangteh thyet chah. Nyamoq gas lomsnoq cho pwe lhyi ngah lyi thungh yah dvyhangteh tsain kuot chah. Nyamoq gas ngah no nyeih lyis gyingshang nhang chah.
25 Phudyei bang gas mvng lyis zangh zis yah nyamoq gungs lyis ma lhoq ma shang ma gis kuot. Nghuot laus eq shei soeu ka nyhiphoq dvyuk yuk, lo dvyuk, vmang vnoeuh, yhen ma loh shih dah nhamhmuh nghuot lyis ma lhoq ma shang gis kham.Ref 44.25: Lew 21.1-4
26 Nyang doms lhoqshang thang lhyi nyhet nyeih langh chah shih.
27 Hauh thang lhyi Yhenmuh khyamkhau vkhau puk pheh wvng las nyang cheihshang cho xiklyis phudyei chah. Housoeh nyang Yhenmuh mas yoh doms phuqsoe das. Ngos Yomzains Yhensain taiq goeus.
28 Phudyei bang gas ngos Israel jens lyis dvcaiq thang dvcaiq dyei nyeis, nyamoq dah gvmboms khyvlyis phudyei gyamh yoh. Nyamoq gas Israel jens mas zisyos ma yoh. Ngos gas nyamoq chah nyeis zis dvnganh nghuot.Ref 44.28: Gyu 18.20
29 Jyo jyungshuk, yaunos jyungshuk, yobos khyuot jyungshuk gas nyamoq dah zonoms nghuot. Israel jens ngah xiklyis gvm toh zis dvnganh nyamoq xauh yoeus.Ref 44.29-30: Gyu 18.8-19
30 Gis thank cangxeih yhomh zis dvnganh, ngos lyis dyei zis dvnganh phudyei bang yoh chah. Dvlhain dvlhain dius jens ohlhyoq piq las cangxeih vlhyoq gas vlu khyvlyis phudyei soeu lhyi dyei chah. Nyamoq yhen mha ngah shvmanh joq das.
31 Phudyei soeu ka, nghoq shoh ma gis zo; nyang pheh shei dah shoh yahge yewus ngat sat shoh ma gis zo.Ref 44.31: Lew 22.8