43
Yhensain Yhenmuh mas Tauh los
1 Hauh dius yuk ngos lyis buisthuq pheh xoeu dah khyam khomh mas shwih loh.
2 Houmha Israel Mangso dah phunk buisthuq pheh yah los nyei yvlyis ngos nyvng. Mangso dah thwe ka thomh nyings huomh toh teh nghuot las nyeisjvng gas nyah phunk yah bvng joq.Ref 43.2: Ezk 10.3-4, 18-19, 11.22-23; Nyoq 1.15
3 Haih nyoqnyvng gas Mangso Yerusalem wus lyis mhont das xiklyis thuq los uhlyis nyvng dah nyoqnyvng teh, Kheba lvng yvm mas nyvng ku dah nyoqnyvng teh nghuot. Housoeh ngos nyeisjvng mas gop gyoh.
4 Yhensain dah phunk gas buisthuq khyam khomh cho lai las Yhenmuh khau mha wvng loh.
5 Yhensain dah dyos ngos lyis toqh kat las khyamkhau vkhau puk mas shwih loh. Houmha Yhenmuh gas Yhensain dah phunk yah dyingh joq yvlyis ngos nyvng.
6 Hauh dius yuk ngah yvm mas yap joq lyis Yhenmuh masyah Yhensain ngos lyis taiq zis xauhgyo.
7 Lvcang eh, Haih zis gas ngah hwankti tank nghuot, ngos Israel jens mas nyeis las nyamoq lyis vcaiq vto guon nyeis das. Israel dius jens eq, nyamoq dah hwankti jens eq gohtoeu mangso jens lyis paiq, nghuot ya nyamoq dah shei hwankti jens dah mvng lyis nyhang yvmas toh las paiq zis yah eq ngah gyingshang nyings lyis khanhamp eq nyoqnho ngelang ma doms khyoq lo das.
8 Hwankti jens gas nyamoq dah hwankti yhen jens dah khomhzains yahge khomhtank jens lyis ngah Yhenmuh khomhzains yahge khomhtank jens yah twi twi mas cuk toh. Housoeh hauh zis gas yah vjo mas tyoyvm kyingh duot joq. Hai nyamoq kuot dah vchoqh vlhauq vyhang yah ngah gyingshang nyings lhoq lhoeuh. Housoeh ngos nhaiqyo zis yah nyamoq lyis mhont.
9 Gvshih gas, nyamoq gohtoeu mangso jens lyis paiq cho no las nyamoq hwankti jens dah mvng lyis tsain yoeus tyamp chah. Nyamoq housoeh kuot lyis ngos nyamoq mas vcaiq vto nyeis das.
10 Yhensain tsoq shih, Lvcang eh, Israel dius jens lyis Yhenmuh cho taiq las nyah dah nghamh toeuq cho xuq nhang aq. Nyamoq lyis nyamoq kuot dah yaunos cho xoqphuh nhang aq.
11 Housoeh nyamoq kuot goeus zis xoqphuh lyis, Yhenmuh dah nghamh toeuq cho nyamoq lyis phui kyoh aq. Houka nyah vzwvng, nyah wumuk jens, thuq khomh jens, nyah vkhyoh toeuq toh cho dvnganh yahge houyah sen lyi thungh, kuot chah cho dvnganh nghuot. Hau dvnganh khasoeh gvn toh yvlyis nyamoq yoh nyvng las hau lyi dvnganh yoh chank bas jungh nyamoq xiklyis dvnganh lhaih toh dyei aq.
12 Heika Yhenmuh dah lyi nghuot. Boms thyoh joqyos yahge nyah vyvm vwi dvnganh gas lhoqshang lha gyingshang.
Phon
13 Heika phon lhyi keq cho nghuot. Yhenmuh lyis keq dah keqseh yhung lha keq. Phon vkhyei yvmlhaink yah jeiskhyoh dvkoeuq bos. Hauh zis 21 loqshih nauh las 21 loqshih lvm, nghe pheh vzam gas 9 loqshih thoeu.Ref 43.13-17: Dyu 27.1-2; 2Ss 4.1
14 Phon dah nyhen thank vtsank gas vkhyei mhayah 4 pe nyhang. Gohtoeu dvtsank gas nyhen tsank vthang masyah yvmlhaink 20 loqshih nungs jik las houka 7 pe nyhang. Hauh thang lhyi vtsank eq vthang mhayah yvmlhaink 20 loqshih nungs jik las toh.
15 Hai lomhxangh tsain ngheq dah vthyoh tsank eq 7 pe nyhang. Nyei thunk mas dah zains jens gas gohtoeu thoq lyis zes nyhang joq.
16 Phon thyoh gas soehuqthunk nghuot, dvshot dvshot 20 pe nghuot.
17 Phon vgungs tsank eq soefuqthunk nghuot. Dvshot dvshot 24 pe nghuot las nghe pheh vzam gas 10 loqshih nyhang. (Hauh jeis khyoh gas 20 loqshih lvm.) Phon mha doq loh dah zvmlhangh gas buisthuq pheh joq, ge.
Phon Kyauh
18 Yomzains Yhensain ngos lyis taiq. Lvcang eh, ngos nvng lyis cha taiq nyeis zis gyo aq. Phon ci lhyi hou thoq mas ngheq phudyei zis yah eq, houmha phudyei dah lomhxangh gaunyhauq suih tsain tyitsant zis yah eq namoq phon lhyi kyauh chah.
19 Hauh phudyei bang gas Lewi vkoq yah sen lha Zadok dah vnyau vshih nghuot bang kyingh ngos lyis phuqsoe das xiklyis ngah xikkhonh mas dvyoh los. Haih zis ngos Yomzains Yhensain taiq toh. Nvng nyamoq lyis yaunos xiklyis phudyei khyvlyis noeulu kyoh dvdoeu dyei das.
20 Nvng hauh suih dvkhamh yoeus las phon thyoh vthunk mas dah khyau mha eq, vgungs tsank vthunk mas eq, yvmlhaink nyah vzam mas eq tsain juot aq. Heisoeh khyvlyis nvng hauh phon lhyi cheihshang toh das.
21 Nvng hau yaunos xiklyis phudyei das khyvlyis dyei dah noeulu lyis yoeus las, Yhenmuh nghe pheh toeuq toh joqyos mas ngheq das.
22 Nungs nyeih nvng nos ma bos beqlus dvdoeu yoeus las yaunos xiklyis phudyei khyvlyis dyei chah. Hauh suih yah phon lhyi noeulu lyis kuot zis yah dvyhangteh kuot las cheihshang chah.
23 Nvng housoeh dye kuot lyis, noeulu kyoh dvdoeu yahge yvnglus kyoh dvdoeu yoeus aq. Hau aiq doeu yah nos ma bos zis nghuot chah.
24 Nvng hau aiq ja lyis ngah jyank mas she los aq. Phudyei bang gas hauh aiq doeu thoq mas coh tyitsant zis yah ngos lyis jyungshuk khyvlyis ngheq dyei das.
25 Nvng nyhet nyeih top dvnyeih dvnyeih lyis yaunos xiklyis shvbeq dvdoeu, noeulu dvdoeu yahge yvnglus dvdoeu dyei las phudyei chah. Hau dvnganh gas nos ma bos zis nghuot chah.
26 Phudyei bang gas hauh phon lhyi nyhet nyeih top cheihshang lha yhung das xiklyis cicont kuot toh.
27 Dvdaus dye lyis, phudyei bang gas phon thoq mas ngheq dyei jyungshuk yahge dius jens dah nyenstap jyungshuk phudyei xi. Housoeh ngos gas namoq dvnganhmoq lyis nhaiqdoeus das. Ngos Yomzains Yhensain taiq goeus, ge.Ref 43.27: Dyu 29.35-37