34
Israel lyis Yoeuh bang
1 Yhensain ngos lyis jis.
2 Nyang taiq, Lvcang eh, Israel dah guon bang lyis taiq hoeuh aq. Nyamoq lyis lvpe pe aq, Ngos Yomzains Yhensain nyamoq lyis cha taiq zis taiq kyoh aq. Yvng nghuot dah Israel lyis yoeuh dah yvng yoeuh bang gas mvtanhzoe nghuot. Namoq gas namoq nyang gungs lyis loqzamh zwi laus eq yvng lyis gas khanhamp eq ma dyangh.
3 Namoq gas nauh shuk, yvng mauh dyi wuot, gis thank yvng lyis sat zo. Nghuot laus eq, yvng lyis khanhamp eq ma dyangh.
4 Namoq yomnhuk dah yvng lyis loqzamh ma zwi, nos dah yvng lyis ma yhoh; thungh nho dah yvng lyis ma thop dyei. Chowhang loh, dyuk loh dah yvng lyis ma chank xo. Hauh gungsthaiq, nyamoq lyis lhoeng khyvlyis kuot.
5 Yvng jens gas yoeuh soeu ma bos yvmvyah, dyos sanh loh las yewus jens yah ngat sat zo tyamp.Ref 34.5: Gyu 27.17; 1Hw 22.17; Mat 9.36; Mak 6.34
6 Housoeh las ngah yvng jens gas jing nyhang mha, boms mas suh whang yenh. Nyamoq gas nyeisjvng gonh dyos loh laus eq hank ma xo, nyvng shoq hank ma chank xo.
7 Gvshih namoq yvng yoeuh bang ngos Yhensain namoq lyis taiq nyeis zis gyoh geh.
8 Ngos dwis nyeis Mangso nghuot jyoeng zis yah dvyhangteh, namoq ngah dang gyo gis. Ngah yvng jens gas yvng yoeuh soeu ma bos yvmvyah, nyamoq lyis yewus yah khat ngat sat zo. Ngah yvng yoeuh bang gas ngah yvng lyis ma chank xo, yvng lyis ma gomh, vsainnyang gungs lyis loqzamh dvtsain zwi.
9 Housoeh las namoq yvng yoeuh bang eh, ngos lyis kamp gyo geh.
10 Ngos Yomzains Yhensain ka, Ngos namoq dah jeswus nghuot oen taiq hoeuh. Ngos ngah yvng jens lyis namoq masyah yoeus tyamp las namoq lyis khanhamp eq nyamoq dah yvng yoeuh bang ma bweh nhang lo das. Ngos namoq lyis khanhamp eq namoq nyang gungs lyis kyingh loqzamh ma zwi nhang lo das. Ngos ngah yvng jens lyis namoq masyah khyuot las namoq lyis ma zo nhang lo das.
Gis dah Yvng yoeuh Soeu
11 Ngos Yomzains Yhensain nvng lyis, ngah yvng jens lyis ngvnyang chank xo lha loqzamh zwi das oen taiq kyoh.
12 Yvng yoeuh bang gas dyos sanh loh dah nyamoq yvng jens lyis doms shwih tsainh los zis yah dvyhangteh, ngos ngah yvng jens lyis jyommauh noengh las chuot nyeih lyis nyamoq dyos sanh loh dah joqyos dvnganh masyah shwih tauh los das.
13 Ngos nyamoq lyis lvbaus mau masyah shwih yoeus zis yah, dvgeh xwih tsainh las, nyamoq nyang mau mas shwih tauh los das. Ngos nyamoq lyis choshe lha Israel jens dah boms yahge jeislo lvng mas shwih los las pyo dah katjang mas kat tsoh das.
14 Ngos nyamoq lyis Israel mau, boms jens langhkhau jens chungh noeuh yos katjang mas, jesluiq shohluiq zo nyeis nhang das.
15 Ngah yvng xiklyis yvng yoeuh soeu ngvnyang duot das; ngos nyamoq no nyeis das joqyos xo das. Ngos Yomzains Yhensain taiq goeus.
16 Dyuk loh yvng lyis chank xo das, chowhang loh dah yvng lyis shwih tauh los das, thungh nos yvng lyis lyet dyei das, nos dah yvng lyis yhoh das; nghuot laus eq coeu lha yombos yvng lyis ngos mhont das. Khasoeh ge lyis ngos gas jus zis kuot dah yvng yoeuh soeu nghuot.
17 Housoeh las gvshih ngah yvng phung eh, ngos Yomzains Yhensain nvng lyis taiq zis gas, Ngos namoq dvyuk dvyuk lyis soetuon lha gis zis yah gang zis, yvng yah shvbeq kangh das.
18 Namoq dvyhamh gas gis thank mhanh yos mas zo nyeis yvlyis nhaiq ma tap namoq ma zo yvlyis yangh nang nheh tyamp. Jeis gying lyis shuk lho lha nvng ma shuk yvlyis nghon nhang.
19 Gohtoeu ngah yvng jens gas namoq nang nheh dah mhanh zo chah, namoq nang nghon dah jeis shuk chah.
20 Housoeh las gvshih ngos Yomzains Yhensain namoq yombos yvng yahge yomnhuk yvng jo mas soetuon das oen taiq.
21 Namoq gas nos dah yvng jens lyis duon tyamp, yvng phung mhayah thungh tyamp.
22 Nghuot laus eq ngos ngah yvng jens lyis khyuot las, nyamoq lyis ma gis khyvlyis ma kuot nhang lo. Ngos ngah yvng jens lyis dvdoeu dvdoeu lyis soetuon lha gis gang lyis kangh das.
23 Ngos nyamoq lyis ngah jyeidwis Dawi teh dah hwankti dvyuk dyei das las nyang gas nyamoq dah yvng yoeuh soeu bweh das. Nyang nyamoq lyis loqzamh zwi das.Ref 34.23: Nyoq 7.17
24 Ngos Yhensain ka nyamoq dah Mangso, ngah jyeidwis Dawi teh dah hwankti ka nyamoq dah guon soeu duot das, oen ngos taiq goeus.Ref 34.24: Ezk 37.24
25 Ngos gas nyamoq dah sam cho lhyi pauh toh dah thanghchvp kuot das. Ngos hauh mau mas gyukphoh yewus dvnganh shang tyamp das. Housoeh las ngah yvng jens gas katjang mas jesluiq shohluiq xauh nyeis las saiqkhyam mha yoh yhet das.
26 Ngos nyamoq lyis shvmanh dyei las ngah yvmlhaink nyeis nhang das. Nyamoq chah uhlyis mau wus nhang zis yah shvmanh dyei das.
27 Saiqzains gas vshih tsain shih das; nyeisjvng gas jyo nyau shih nyau thuq los nhang das. Yuk khanghmuh nyamoq nyang mau mas jesluiq shohluiq yoh nyeis das. Ngos ngah dius jens dah shamjvng lyis khyauh las nyamoq lyis jons kuot bang masyah khyuot yoeus lyis, ngos Yhensain nghuot yvlyis nyamoq seq das.
28 Gohnyau bang nyamoq lyis ma thyoq zo lo das; yewus jens eq nyamoq lyis ma ngat zo lo das, nyamoq jesluiq yvmas nyeis das las hank eq nyamoq lyis ma kyuk tant das.
29 Ngos nyamoq lyis nyeis coeu bos dah khyam yos dyei las hauh mau mas yuot shet cho thank loh nhang das. Gohtoeu dius nyau jens nyamoq lyis ma jwangh lo das.
30 Ngos Yhensain, nyamoq dah Mangso ka Israel jens yah dvgeh nghuot las nyamoq ngah dius nghuot yvlyis yuk khanghmuh seq das. Ngos Yomzains Yhensain taiq goeus.
31 Namoq ngah yvng, ngos tsoh dah ngah yvng phung ka ngah dius jens nghuot, ngos gas namoq dah Mangso nghuot, ge Yomzains Yhensain taiq.