33
Ezekiel lyis Zungh Soeu khyvlyis Toh
(Ezk 3:16-21)
1 Yhensain ngos lyis jis.
2 Nyang taiq, Lvcang eh, ngos dvmau mas jes she kat lyis cha bweh yvlyis nah dius jens lyis taiq kyoh aq. Hauh mau mas bang gas nyamoq mas zungh das soeu dvyuk lyis khyen toh.
3 Hauh soeu ka jeswus ni los nyeis zis nyvng lyis nyang lvbuh muot las dius jens lyis zaih nhang.
4 Dvyuk yuk lvbuh thwe xauhgyo laus eq chaxwe ma nhang lha jeswus nyang lyis los sat lyis nyang shei zis gas nyang yau wons chah.
5 Nyang gas zaih nhang yvlyis chaxwe ma nhang yvmvyah nyang shei zis gas nyah yobos dvnghuot. Nyang gyo lyis gas nyah kang yoh phang luiq das.
6 Nghuot laus eq zungh soeu ka jeswus los nyeis zis nyvng lyis lvbuh ma muot las, jeswus gas hau yaunos bos bang lyis los sat lyis, nyamoq dah shei cho ka zungh soeu dah yvwons nghuot yvmvyah ngos hau zungh soeu lhyi zwi das.
7 Lvcang eh, gvshih ngos nvng lyis Israel dius nyau xiklyis zungh soeu kuot nhang toh. Ngos nvng lyis dyei dah zaih nhang dang nyamoq jyank mas cheh dyei chah.
8 Ngos gas ma gis soeu ka shei das oen taiq hoeuh lyis, nvng hauh soeu lhyi nyah kang yoh khyuot das nyhenshang nyah cho thaiq das zis ma zaih nhang lha, nyang yaunos bos zis shei loh. Nyang shei cho nvng mas yvwons bos las nvng lyis cangjau sang das.
9 Ma gis soeu lhyi nvng zaih nhang laus eq nyang yaunos kuot cho ma no, nyang yaunos bos soeu nghuot shih lyis shei loh lyis nah kang lhyi ka lhuiq dyei das.
Dvyuk dvyuk dah Yvwons
10 Yhensain ngos lyis jis. Nyang taiq, Lvcang eh, Israel jens taiq zis nyamoq lyis puk taiq aq: Yang gas yah yaunos yahge yang kuot shuot cho yvwons lyei. Yang yomnhuk las Yang kang khasoeh yoh dwis das.
11 Nyamoq lyis taiq aq, jyoengh ngos Yomzains Yhensain ka dwis nyeis Mangso nghuot zis yah dvyhangteh ngos yaunos wons bang lyis nyvng las ma gaus, nyamoq yaunos tyamp las dwis nyeis das zis nyvng mes. Israel jens eh, namoq kuot nyeis dah ma gis cho toh tyamp geh. Namoq chamus shei mes goh.
12 Lvcang eh, Gvshih nvng Israel jens lyis taiq kyoh aq. Gis soeu dvyuk yuk yaunos kuot lyis nyang kuot goeus dah gis cho yah nyang lyis ma yoh khyuot yoeus; ma gis soeu dvyuk nyah ma gis cho tyamp lyis nyang joeng zis ma xauh das. Gis soeu dvyuk yaunos kuot loh lyis, nyah kang lhyi ma yoh lhaiq toh.
13 Ngos gis soeu dvyuk yuk dah kang lhyi dangthoengh toh mvbeh, nghuot laus eq nyang xikpheh dah gis cho ka geh goeus ge nghamh las yaunos kuot loh lyis, nyang kuot goeus dah gis cho dvkoeuq lyis eq ngos ma soh dyei lo das. Nyang gas nyah yaunos gvng mas shei das.
14 Ngos ma gis soeu dvyuk yuk lyis, Nvng shei das oen zaih nhang mvbeh, nghuot laus eq, nyang yaunos kuot cho toh tyamp las jus cho yahge gis cho kuot lyis,
15 Dangtoeuq, jyeih dyei yvmas tank toh vyhang tauh dyei, khauh toh vyhang doms dyei, nyang yaunos tyamp las kang dyei dah lyi chank lyis, nyang ma shei, dwis nyeis das.
16 Ngos nyang kuot cu goeus dah yaunos lyis khyuot dyei das. Nyang gas jus zis yahge gis zis kuot goeus yvmvyah dwis nyeis das.
17 Nah dius jens gas, ngos kuot zis ma jus, ge. Ma nghuot, houka nyamoq dah cho ma jus.
18 Dan soeu dvyuk yuk gis zis kuot cho toh tyamp las ma gis cho kuot loh lyis, hauh xiklyis nyang shei das.
19 Ma gis soeu dvyuk yuk, yaunos kuot cho tyamp las jus cho yahge gis cho kuot lyis nyang nyah kang lhyi khyuot yoeus goeus.
20 Nghuot laus eq Israel jens eh, namoq gas ngos kuot zis ma jus, ge. Ngos namoq lyis namoq kuot vgus soetuon das.
Yerusalem Gyoh dah Loeus
21 Ngamoq jonsdoeus loh zis dvci aiq vzvn, dvci vkhyvp, oeng vnyeih lyis, Yerusalem masyah phang luiq los soeu dvyuk ngos lyis hauh wus gyoh goeus cho los taiq kyoh.Ref 33.21: 2Hw 25.3-10; Yer 39.2-8, 52.4-14
22 Hauh nyenhthang hauh soeu ma jweh los shih lyis Yhensain dah yomsoq ngah jyank mas jweh los. Nungsnvp hauh soeu jweh los lyis Yhensain ngos lyis dang taiq nhang lha ngos samlo ma nyeis lo.
Dius jens dah Yaunos
23 Yhensain ngos lyis jis.
24 Nyang taiq, Lvcang eh, Israel mau dyoqgyoh joq dah wus jens mas nyeis dah dius jens taiq zis gas, Abraham gas dvyuk kyingh dvnghuot laus eq, nyang lyis dvmau gonh dyei toh. Ngamoq nyoshoq nghuot; housoeh las gvshih hauh mau gas ngamoq zis nghuot, ge.
25 Nyamoq lyis ngos Yomzains Yhensain taiq nyeis zis taiq kyoh aq. Namoq houmha suih yah shoh dvzo nyeis shih. Namoq phvra lyis paiq, dius sat. Namoq lyis hauh mau gas namoq yah sen oen lha cha yah nghamh nhang goh?
26 Namoq gas namoq dah sham lhyi khauq nyeis. Namoq kuot loh zis gas vchoqh vlhauq nghuot. Yuk khanghmuh nyi shuot lvng shuot. Haih mau gas namoq zis nghuot oen cha yah nghamh nhang goh?
27 Ngos Yomzains Yhensain nyamoq lyis zaih nhang zis taiq aq. Jyoengh, ngos dwis nyeis Mangso nghuot zis yah dvyhangteh, dyoq gyoh joq dah wus jens mas nyeis bang sat zis tsain xauh das. Boms mau mas nyeis bang lyis yewus yah zo das. Boms yahge luk-uk mas tamh joq bang gas noslom yah shei das.
28 Ngos hauh mau lyis jyamhjyuklhyuk tyeihgesles kuot das. Nyamoq khwank nyeis dah yomsoq dom nhang das: Israel boms mas vkom nghuot las hank ma suh lai das.
29 Ngos dius jens dah yaunos nyhenshang nyamoq lyis joeng las hauh mau tyeihgesles kuot lyis ngos Yhensain nghuot yvlyis nyamoq seq das.
Lvpe dah Loeus Gvng mas
30 Yhensain taiq, Lvcang eh, nah dius jens gas, nyamoq xauhgoh dah wusciank yvm mas, nyamoq dah yhen khomhdwang mas nah cho tsain taiq goh. Nyamoq nyang changh taiq goh zis gas, Gvshih Yhensain jyank masyah dang cha los zis loh tsain gyo goh, ge.
31 Housoeh ngah dius jens gas nvng cha taiq zis gyo das zis nah jyank mas tsain nhoenk wvng los. Nghuot laus eq nyamoq gas nvng nyamoq lyis kuot nhang zis ma kuot. Nyamoq nhuot kuk mas jyetdap dang bos laus eq nyamoq dah nyonsdot cho pheh dvtsoq loh.
32 Nvng gas nyamoq xiklyis toenk gis gis bat las gyo mes shoq hwank lvkhyank kat soeu teh nghuot. Nyamoq gas nvng taiq dang lyis gyo laus eq, dvkoeuq eq ma chank kuot.
33 Nghuot laus eq nah dang dvnganh bweh los das. Hauh zis jyoengh bweh los das. Housoeh lyis nyamoq mas lvpe nyeis yvlyis nyamoq seq das, ge.