28
Taire Hwankti lhyi Tyi lha Pe
1 Yhensain ngos lyis jis.
2 Nyang taiq, Lvcang eh, Ngos Yomzains Yhensain Taire lyis guon soeu lhyi cha taiq nyeis yvlyis nyang lyis taiq kyoh aq: Nvng khwank las, nvng mangso nghuot, ge taiq. Thomh jens yah tsain lhaink toh hwankti tank mas tsung toh, ge nvng taiq. Nvng mangso teh nghuot, ge mvbeh, nghuot laus eq nvng gas gywes so ma nghuot, dius dvnghuot.
3 Nvng gas Daniel thoq lyis joeui zes bos las nah jyank masyah cha ma yoh nghop shung toh oen nghamh lhyeh?
4 Nah joeui yahge nah lyes cho ka nvng lyis ngwis xing zisyos yah dis los nhang.
5 Nvng yik dah soenghi cho kuot zis yah vmyat tsoq kuot nyeis. Nvng nah yoh khuiq cho mha kha iq khwank nyeis!
6 Housoeh las gvshih haih zis ngos, Yomzains Yhensain taiq nyeis zis nghuot. Khasoeh ge lyis nvng gas mangso teh joeui bos ge nghamh.
7 Ngos nvng lyis zan das zis nah jyank mas lhoeng dah jeswus shwih los das. Nyamoq gas nah joeui, nah lyes cho yah yomkat las yoh toh, yungh dah vyhang dvnganh lyis mhont das.
8 Nyamoq nvng lyis sat las jeis bos lop mas khyoq kat das.
9 Nyamoq nvng lyis sat das zis los lyis nvng mangso nghuot oen taiq nyeis shih das lah? Nvng lyis sat soeu yah xauhgoh lyis nvng gas gywes ma nghuot, seq shei soeu dvnghuot lo.
10 Nvng gas mangso ma bos dah lvbaus loq mas lvkhuih lvwuq teh shei das. Ngos, Yomzains Yhensain, hau zaudang khyoq goeus.
Taire Hwankti Gyoh
11 Yhensain ngos lyis doms jis.
12 Nyang taiq, Lvcang eh, Taire hwankti lhyi langh nyeis dah uhpui loqkyoq xiklyis kuk aq. Ngos Yomzains Yhensain taiq nyeis zis nyang lyis taiq kyoh aq. Nvng xikpheh dyinghjet dah yikhyoh nghuot khoq. Nvng gas kha iq joeui bos las yungh khoq.
13 Nvng Mangso dah Eden khyam mha nyeis las luksen vja ja, pvtvmya, sing, Utapvya, myet-yweh, unuk, nvgvtweq, nila, luknes yahge luk vja ja wuot toh. Nvng xing yah shunk ja eq yoh. Houka nvng lyis gvnkhanh nyeih lyis nah xiklyis kuot toh goeus.note 28.13 Hai thang lhyi vdoeus Hebre mas ma bvng.
14 Houmha ngos nvng lyis zungh dah loeuswons soeu khyvlyis coeu juot dyei. Nvng ngah gyingshang boms mas nyeis las, bvng dah luk mha suh nyeis.
15 Nah wotwu gas, nvng lyis gvnkhanh xauh buisnyeis masyah nvng ma gis zis kuot xi jweh shoq, dyinghjet joq.
16 Nvng gas ungh cho, wis cho mha muh nyo. Haih zis gas nvng lyis lhuotzo cho yahge yaunos shwih kuot loh. Housoeh las ngos nvng lyis ngah gyingshang boms masyah tsoengh thuq loh nhang. Nvng lyis zungh dah loeus wons eq nvng lyis luksen bvng masyah khat thuq tyamp.
17 Nvng yungh las khwank, nah nyings hoeuh cho ka nvng lyis koh soeu teh kuot nhang. Haih gvng mas ngos nvng lyis nyeisjvng mas khyoq las gohtoeu hwankti jens lyis zaih nhang khyvlyis toh tyamp.
18 Nvng ungh cho wis cho mha houteh ma gis cho kuot las, nvng paiq dah joqyos gas dyoqbis loh. Housoeh las ngos hauh wus lyis nyi ngheq kat las nyeisjvng mas ngeh gyop tyamp. Nvng lyis yoeuh bang dvnganh, gvshih nvng nyiyvp dvnghuot lo yvlyis nyvng.
19 Nvng gas dyuk goeus, vcaiq vto dyuk goeus, nvng lyis seq los dah dius nyau dvnganh gas dvn. Nyamoq eq nah uhpui loqkyoq bos xauh kham das yvlyis tsain gyuk.
Sidon lyis Tyi lha Pe
20 Yhensain ngos lyis taiq.Ref 28.20-26: Yol 3.4-8; Zek 9.1-2; Mat 11.21-22; Luk 10.13-14
21 Lvcang eh, Sidon wus lyis taiq hoeuh aq.
22 Houmha dah dius jens lyis ngos, Yomzains Yhensain nyamoq cho cha taiq yvlyis taiq kyoh aq. Sidon eh, ngos gas nah jeswus nghuot. Ngos nvng lyis kuot gvng mas dius jens ngos lyis chungh das. Ngos nvng mas nyeis bang lyis joeng zis yah ngos kha iq gyingshang yvlyis chixoeuq lyis ngos Yhensain nghuot yvlyis nyamoq seq das.
23 Ngos namoq thoq mas yomh nhang lha wus talhoeu mha suih lvng yaus nhang das. Shot khanghmuh masyah nvng lyis zan las nah dius jens sat xauh das. Housoeh lyis nvng gas ngos Yhensain nghuot yvlyis seq das.
Israel Shvmanh Yoh das
24 Yhensain taiq, Israel jens lyis jwangh zis yah kuot dah vyvm vwi dius nyau jens hank khanhamp eq zoeu teh, zoeukyank teh Israel lyis ma doms nos nhang lo das las, nyamoq gas ngos Yomzains Yhensain nghuot yvlyis seq das.
25 Yomzains Yhensain taiq, Ngos Israel jens lyis ngos nyamoq lyis sanh tyamp dah dius nyau jens masyah shwih tauh los das. Dius nyau jens dvnganh gas ngos gyingshang yvlyis seq das. Israel dius jens gas ngos ngah jyeidwis Yakop lyis dyei toh, nyamoq nyang mau mas nyeis das.
26 Nyamoq houmha jesluiq shohluiq nyeis das. Nyamoq yhen tsain tsuk das, zvbiq khyam tsungh das. Nyamoq lyis jwangh zis yah zaiq dah yhenkyoh jens dvnganh lyis joeng das las Israel jens gas samlo nyeis das. Housoeh lyis ngos Yhensain, nyamoq dah Mangso nghuot yvlyis nyamoq seq das, ge.