27
Taire Xiklyis Kuk Ngaus
1 Yhensain ngos lyis taiq.
2 Lvcang eh, Taire xiklyis uhngauh aq.
3 Hauh wus gas thomh thang mha joq las thomh yvm khanghmuh mas nyeis bang yah soenghi kuot. Yomzains Yhensain cha taiq nyeis zis nyang lyis taiq kyoh aq.
Taire eh, nvng gas, nvng svsoh yungh cho lhyi moengs.
4 Nah yhen ka thomh nghuot.
Nvng lyis kuot toh bang gas, nvng lyis yungh dah sangpho teh kuot toh.
5 Thyeh xiklyis Hermon boms mas dah xoeuh saiq lyis yhung.
Nah zains nyhang xiklyis Lebanon mas dah arit saiq tsain yhung.
6 Bashan mas dah wons saiq yah shvp kuot;
Nyamoq Kupru mas dah xoeuh yah thyeh nyhoeuh toh;
houmha cangzwis yah shunk toh.
7 Egutu mas dah misyhwiq seh yahge
khohkat misyhwiq seh gas,
nvng nah sangpho mha lhangh lhywa lha,
hauh yvlyis we masyah lwis lwis yoh yoeuh comh.
Vnghop gas mis yungh seh yah kuot,
Kupru goeujo masyah los dah mislanh seh gas sangpho nghop bweh los.
8 Nah sangpho lhyik zes bang gas Sidon yahge Awad wus mas bang tsain nghuot.
Namoq nyang dah sangpho lo jens gas Zemer mas dah lyes bang nghuot.
9 Sangpho tsuk bang gas
Biblo mas vlhomuh puot goeus bang nghuot.
Sangpho lo jens gas sangpho shot khanghmuh masyah los.
Nyamoq gas nvng yah dvgeh soenghi tsain kuot.
10 Persia, Lidia yahge Libya mas dah jeslo jens gas nah jesphung lhyi phuqsoe nyeis. Nyamoq dah gos jens yahge nyamoq uhkyop jens lyis nah jesdvp mas lhangh toh. Nyamoq gas nah xiklyis phunk nyoqnho she los dyei bang nghuot.
11 Awad mas dah jeslo jens gas nah wusciank lyis zungh dyei. Gamad mas dah jesphung ka nah tyoeuq zvm lyis zungh dyei, nyamoq gas nyamoq dah gos jens nah tyoyvm mas lhangh toh. Nyamoq gas nvng lyis yungh shoq kuot dyei bang nghuot.
12 Nvng Spain mau mas soenghi nyoshoq ja kuot las nyamoq gas ngwis, thyeq, thunk thyoeu, cui nyoshoq ja yah tsain thaiq.
13 Nvng Greece mau, Tubal, Meshek mas bang yah soenghi kuot las nyamoq gas jons yahge thunk kyahsoe tsain ungh.
14 Nvng nah hu ungh las Bet Togama masyah muhzwi nyang, jesnyang yahge luzoe soenghi tsain kuot.
15 Rhodenote 27.15 Rhode ge zis Hebre ma gas Dedan, ge bos. dius jens gas, nvng yah soenghi kuot; thomh yvm mas dah wus jens gas nvng yah cangzwis yahge saiq noq yah soenghi kuot.
16 Siria jens nvng yah soenghi kuot las, nah hu yah luknes, nesnoq seh, khohkat misseh, misyhwiq seh, thanda luk, pvtvmya los tsain thaiq.
17 Yuda yahge Israel jens gas nah hu nyhenshang sunghso, dyoyhei, tsanlun coeu yahge xangh yah soenghi kuot.note 27.17 Dang aiq khonh bos shih laus eq ma bvng.
18-19 Damasku mas bang gas nah hu yahge nyang kuot thuq dah hu lhyi Helbon mas dah zvbiq yahge Sahar mas dah yvng mauh yah wis. Nyamoq gas thyeq jen yahge xangh lhyi nvng yah soenghi kuot.
20 Dedan bang gas anhzoe misseh ungh las nvng yah soenghi kuot.
21 Arabia dius jens yahge Keda zau jens gas nvng kuot dah hu xauh yoeus das xiklyis yvnglo, yvnglus, shvbeq ungh las nvng yah soenghi kuot.
22 Sheba yahge Rama soenghi jens gas nvng yah soenghi kuot las, nah hu lhyi phauhdap xangh Luk, xing yahge xangh los tsain thaiq.
23 Haran, Khane, Eden, wus jens, Sheba soenghi jens, Ashur wus, Khilmad jens nyamoq dvnganh nvng yah soenghi kuot.
24 Nyamoq gas phauh dah dyimis, miskuq vlanh, khohkat misseh, bvng dah vwot mvlhyoeuq, vlhomuh lhyent dah khying yahge twihlyau los tsain ungh.
25 Nah soenghi ka sangpho jens kuh kuh yah hu tsain thuq los.Ref 27.25-36: Nyoq 18.11-19
Nvng gas thomh mas
hu dyingh shoq thuq las los dah sangpho teh nghuot.
26 Nah lhyik zes bang nvng lyis thomh mas shwih los lyis,
buisthuq lyeis yah nvng lyis tungyos yah we yvmas thyoq khyoq goeus.
27 Nah sangpho dyoq tyamp lyis,
nah soenghi dah yoh khuiq cho dvnganh,
nah sangpho lo jens mha muh zwi bang dvnganh,
nah sangpho tsuk bang,
nah soenghi jens, sangpho mha dah jeslo jens,
dvnganh thomh mas dyuk tyamp das.
28 Nyop loh dah sangpho komp bang kaiq thwe ka
thomh yvm mas lvngtang toeuh los.
29 Gvshih Sangpho khanghmuh dyuk loh goeus, sangpho mha loh bang yuk khanghmuh
sangpho goeukhanh masyah dyuk loh goeus.
30 Nyamoq dvnganhmoq nah xiklyis svsoh kuk,
nyamoq uhloms mas tsohmop doeuh lhyauq, nyiyvp mas lains lhoeuh.
31 Nyamoq gas nah xiklyis uhyuk,
yanghthung dyi tsain wuot.
Nyamoq ngaus zis yah dvyhangteh
nyamoq dah nhaiqlom kyik kyik khoh.
32 Nyamoq nah xiklyis uhngauh dang gas,
Taire wus yah hank yoh byi?
Gvshih Taire wus gas thomh mas tsing tsam nghuot goeus.
33 Nah soenghi kuot cho thomh cho loh lyis
dius nyau nyoshoq lyis
nyamoq chah nyeis yvlyis yoh tyink dyei.
Nah hu nyoshoq ungh zis yah
nyeisjvng hwankti jens lyis dis los nhang.
34 Gvshih nvng gas thomh mas dyoqbis goeus.
Nvng nauh dah nvmukdra mas nyop loh goeus.
Nah hu yahge nvng lyis muh zwis dyei bang dvnganh gas
thomh mas nvng yah dvgeh dyoqbis goeus.
35 Thomh yvm mas nyeis bang nah uhpui loqkyoq gvng mas tsain mauh. Nyamoq dah hwankti jens yangh gyuk dvn las gyuk cho ka nyamoq nyoqnho mha lhaih los.
36 Nvng gas dyuk loh goeus, vcaiq vto dyuk loh goeus. Mungkvn gonh mas dah soenghi jens gas dvn. Nyamoq gas nah uhpui loqkyoq bos kham das zis gyuk.