2
A Dikmi Upnak Thu
1 Mahnaven nangin, a dik a manmi thupom tuah a lemcangmi khi zilhin hi.
2 Papi deuh ten zu poh cu in pahsuh un, lungmu ciangkai zetin um un, mah le mah ukdun theih tum un, upnak dik, itnak le haksat thuak theihnak neimi hi un, tin zilhin hi.
3 Mahtibang kek bokin numei upa deuhte khi numei hihnak danno tuah nun thiangtho nei tukin zilhin hi. Mi sonsia tuk ngawlin le zu i salah um tuk ngawlin, a phami zilhin hi.
4-5 Nupi deuh ten khangno deuh numeite cu a pasal le a cate it deuh tukin, mah le mah ukdun theitu hi tukin le mithiang a hih theihnak haw tukin a pasal tei khut nuai ah niamkhiat thiamin, zi pha a can theih hawnak tukin zilh inna, hilhin hi. Mahten Pathian lak pen a hungmi thuthang cu kuamah in sonsia haw tukma hi.
6 Mahtibang bokin tangvalte vang mahleh mah ukdun theitu a hih theihnak haw tukin sosuahin hi.
7 Ihempoh ah nangmah loli zohteh takin umin hi. Muantak le mifel hi inna, thu na zilh ten tihtak zetin zilhin hi.
8 Kuamah i sonsiat theih tuk ngawlin awnkam pha mang inna, a ngal uhten sonsia thei ngawlin amuh lehlam zakca saw haw tuk hi.
9 Sal cu na bawi tei nuai ah niamkhiat unna, ihempoh ah a lungdamtik un, tin hilhin hi. A awn haw don pahsuh hen.
10 Mahten nate vang ngu haw pahsuh hen. Mipha a hihnak hawleh muantak a hihnak haw langtik saw haw tahen na, mahten a bawl haw mi hempoh ah nunpantu a Pathian uh thu a zilh uhmi humah thangphatnak hengtik haw tuk hi.
11 Itahim titale Pathian in, a hehpihnak cu mi hempoh nunpan tukin langtik zo hi.
12 Mah hehpihnakin Pathian ziaza tuah a lemcang thei ngawlmi nundan le leihum tisa nopnakte zamsan tukin zilh hi. Mahten mah le mah ukduncop theimi le diknak le hi leihumah Pathian tuah a lemcangmi ziaza tuah a nun theihnak tuk uhin hilh sih bok hi.
13 Mahten a thawmngengmi a Pathian uh le Pantu Jesuh Khrih i sunloihnak lang tuk hi tin, a muansan uhmi Ni sunglawi cu ngak hung hi.
14 Ama nunnak loli in eimu phat ngawlnak pen suakca tukin, na pha bawl tuk a nuamtu hi tukin le ama bulta mithiang a cantiknak tukin ohte pia zo hi.Ref 2:14 Saam 130:8; Suah 19:5; Daan 4:20; 7:6; 14:2; 1Pet 2:9;
15 Hih thute hi zilh inna, na thuhilh a ngaitute thazaang na piak ten le nun na hilh ten hei hihen na thuneihnakte cangkim zetin mangin hi. Nang cu kuamah in zawnsak haw pahsuh hen.