4
Ishbosheth That haw
1 Hebron ah Abner that haw tih thu Saul i capa Ishbosheth in, a zak ten thinsu zetin Israel mi hempoh vang a thin haw nop viangma hi.
2 Midang a sim haw ten hotu tuk bawipa nih Ishbosheth i neihmite cu Baanah le Rekhab hi. Amuh cu Benjamin hinnam, Beeroth ngam a Rimmon capate hi. Beeroth cu Benjamin ngam sungah sialcih hi.
3 Beeroth ah a um masate cu Gittaim ah tai haw in, mahlai mihingin cang hawta hi.
4 Saul i capa Jonathan in capa pa khat nei in, a min cu Mefibosheth hi. Saul le Jonathan i thihnak thu Jezreel pen a than ten Mefibosheth cu kum nga kim hi. A awhtu nu in, la in, taipih hi. Mahnaven manlang leita in, a taipih hangin caktik kha sualin, Mefibosheth cu a ke bai vawk hi.Ref 4:4 2Sam 9:3;
5 Rekhab le Baanah cu Ishbosheth i innlamah hawh a, sunlaih takin heng haw hi. Ishbosheth cu sun a colh lai tak hi.
6 A kongkhah cingtu numei cu sangvut a sak lih laihtakin, a hihbuh suakin hihbu hi. Mahti bangin a hihbuh laihtakin, Rekhab le Baanah cu tum kuh haw hi.
7 Innsung a hen haw bek ten Ishbosheth zaunak khansungah tumin, a hih buk laihtakin, Ishbosheth cu that haw hi. A lu tanin, a lak nung haw ten zan khua Jordan Munlawn pen hawhin, Hebron khua ah heng haw hi.
8 Ishbosheth i lu cu David lakah hawhpihin, a lakah, “Nangmah a ngaltu le thah a tumtu Saul i capa Ishbosheth i lu cu hihi hi. Tuni in, Topa Pathian in Saul le a casuan tei humah phu laknak cu kumpipa na lakah pia hi,” tin ti haw hi.
9 David in, “Launak hempoh sung pen a pantu a nungmi Topa i minin thutiam ing hi!
10 Ziglag ah hungin, Saul i thihnak a hilhtu in, thupha puak ing tin ngaisung hi. Mahnaven amah cu manin that ing. Thuthang a puak man ka piakmi cu thihnak hi.Ref 4:10 2Sam 1:1-16;
11 Mawhnak nei ngawlmi ama inn sungah a hihbu laihmi loli a thattu misual tei ca in ituk zahin haksa tuk him? Ishbosheth na thah uh hangin atu loli in, na hum uhah phu la tung a, leihumah na ci uh mit khawng tuk,” ti hi.
12 David in thupia in, a ngalkap ten Rekhab le Baanah cu thatin, a khut le a ke haw tanin, Hebron a tuinim elah khai haw hi. Ishbosheth i lu cu a lak ceng haw ten Hebron ah Abner i khanah vui haw hi.