15
Israel Ten Amalek Mite Do
1 Samuel in Saul lakah, “Pathian mihing Israel mite uktu kumpi tukin sathau thih tukin Topa in kei cu hah zo hi. Mah hangin Topa i hilhmi cu ngai in hi.Ref 15:1 1Sam 10:1;
2 Izipt ngam pen Israel mite a tul haw laihin, Israel mi a dodaltu Amalek mite cu Topa in bawlsia tum hi.Ref 15:2 Suah 17:8-14; Daan 25:17-19;
3 Hawh inna, Amalek cu na do un hi. A neihmi hempoh haw siatsuah khawng un. Imah khawih pahsuh un; pano, numei, naupang le a hingsem nauno tianin that khawng un hi. Khui, tuu, kalauk le laak hei that khawng un,” ti hi.
4 Mah hangin Saul in, a ngalkapte samin, Telem ah khawmdun haw in Israel mi lak pen ngalkap thawng za nih le Judah mi lak pen ngalkap thawng sawm haw hi.
5 Saul le a ngalkapte cu Amalek khuapi lamah hawh haw in, lui ngumsung pen ngalte cu pang haw hi.
6 Saul in Kenite mitei lakah, “Izipt ngam pen Israel mite a tul haw laihin, Israel tei lakah noh cu pha uh ci. Amalek mitei lakah ka thah cih ngawlnak tukin Amalek mite cu taisanin tul un hi,” tin ngallinnak pia hi. Mah hangin Kenite mite cu tul haw hi.
7 Saul in Amalek mite cu Izipt ngam nisuahnak lam Havilah pen Shur tian neh khawng hi.
8 Amalek kumpi Agag cu a nungin, manin, midang cu that khawng hi.
9 Saul le a ngalkap ten Agag i nunnak cu khawih haw in, a phabel tuu le khui, a phabel tuuno le khuinote le a pha a tih haw pawpoh cu that haw ma hi. Nemcuamnak nei ngawlmi le man nei ngawlmi hempoh cu that belh haw hi.
Saul Cu Pathian In Vawk
10 Topa in Samuel lakah thu hilh lehin,
11 “Kumpi in Saul ka bawl cu lungsiazet ing. Keimah cu nunghekin ka thupiakmi zui ma,” ti hi. Samuel cu a thinuk ngangai in zankhua Topa i lakah thungen hi.
12 A zingten zingtungno in Saul tawk tukin hawh hi. Saul cu a min phawkngil tuk ngawlnak suang a sehnak Carmel khua ah hawhin, mah nungten Gilgal ah hawh hi, tih thu Samuel in za hi.
13 Samuel cu Saul lakah hengin Saul in nuksat hi. “ Topa in muicu pia zal tahen, Samuel. Topa i thupiakmi zui ing,” ti hi.
14 Samuel in, “Mah ahi tale itakaw tuu ham aw le khui ham aw za li kam ing?” tin dong hi.
15 Saul in, “Amalek mitei lak pen ka ngalkap tei lakmi hi. Tuu hihen, khui hihen a phabel mite cu Topa na Pathian nelah biakpiaknak tukin koih ing, a dang cu that khawng ung,” ti hi.
16 Samuel in, “Cawl hih inna,” “zan takin Topa i thu a hilhmi hilh tung,” ti hi.
“Hilh hemin,” tin Saul in ti hi.
17 Samuel in, “Nang cu imah kha mang tin ngaisung tuk navecin Israel miphun hotu hi ci. Topa, Israel kumpi in sathau thih hi.
18 Mipha ngawl Amalek mite that khawng tukin Topa in thupia in, a venghawngin, na thah khawng laklawh do tukin komno in tiam hi.
19 Mah tale ita a thungai ma nge cim? Ita na lonsak mite cuh tukin manlangzet zuanin, Topa i lungkim ngawlmi cu bawl cim?” tin ti hi.
20 Saul in, “ Topa i thu cu ngai leng sing! A hilhnak bangin hawhin, Amalek kumpi Agag bek a nungin henpih ing. Midang hempoh cu that khawng ing.
21 Mahnaven ka ngalkap ten a mat haw mi sung pen tuu le khui phabelte cu that haw ma hi. Gilgal khua ah Topa na Pathian nelah biakpiaknak piak tukin hunpih hi saw haw,” ti hi.
22 Samuel in, “I kaw Topa i deih saw mi? Ama thu zui maw, ahimata biakpiaknak piakmi kaw? Tuu a phabel tuah ama lakah biakpiaknak sangin, ama thuzui cu pha saw hi.
23 Pualthau nun cu milim bia bangin a sualmi hi. Topa i thupiakmi na deih ngawl bang bokin, amah hei in kumpi tukin nang cu deih bokma,” ti hi.
24 Saul in, “Hi zuh hi, sualzet ing hi, Topa i thupiakmi le nangma thucahmi zui mang. Ka mihingte ka lau deuh hangin a deihnak haw bangin zui ing.
25 Topa ka biak theihnak tukin ka sualnak cu ngaidam zal inna, ka umnak Gilgal ah kiklehin hi, tin hehpih ngen ing,” ti hi.
26 Samuel in, “Na lakah kikleh hihim tuk mang,” “ Topa i thupiakmi na deih ngawl hangin, nang vang Israel kumpi tukin deih bokma toh hi,” ti hi.
27 Samuel cu pin tukin tul hi. Mahnaven Saul in, a puan dokin, a puan cu bal hi.Ref 15:27-28 1Sam 28:17; 1Kum 11:30-31;
28 Samuel in, “ Topa in Israel ngam uknak cu tuni in, na lak pen la in, nangmah sangin, a phadeuhmi lakah pia zo hi.
29 Israel tei sunloihmi Pathian cu zolthu in, a lungmu thekdun li ma hi. Mihing a hih ngawl hangin a lungmu thek li ma,” ti hi.
30 Saul in, “Sual zo ing. Mahnaven Israel mi hempoh le ka mihing puitu tei mai cang bekah keimah na upatnak cu langtik zal inna, Topa na Pathian ka biak theihnak tukin ka lakah kik hih zalin,” tin ngen hi.
31 Mah hangin Samuel cu Saul lakah kiklehin, Saul in Topa cu bia hi.
32 Samuel in “Ka lakah kumpi Agag cu hunpih un,” tin thupia hi. Agag cu lungdam zetin Samuel mai ah hungin, “Thihtuk luat zo ing ngei!” tin amahno ngaisung hi.
33 Samuel in, “Na ngalnamin numei tampi ca nei ngawlin a bawl bangin atu-in, na nu vang cano nei ngawlin suak bok tuk hi,” ti hi. Gilgal biaklandawh mai loli ah Agag cu Samuel in thatin satcen khawng hi.
34 Samuel cu Ramah ah hawhin, Saul cu Gibeah a innah pin hi.
35 Samuel in, a nun sung hempoh ah Saul kumpi cu tawkleh ma toh hi, mahnaven a ca in lungsia in um leleng hi. Saul cu Israel kumpi in, a bawl hangin Topa Pathian cu sikleh ngangai hi.