14
Jonathan In Ngalpha Zetin Do
1 Ni khat cu Jonathan in, a hiamnam cawitu tangvalpa i lakah, “Filistin tei ngiahnak lamah hawh nung,” ti hi. Mah thu cu Jonathan in, a pa hilh ma hi.
2 Saul cu Gibeah el Migron khua a tale kung ngengpi nuai ah cam hi. A lakah ngalkap za luk um haw hi.
3 angki cualpi a cawitu cu Ahitub i capa Ahijah hi. Ahitub cu Ikhabod i unau hi. Ikhabod cu Finehas i capa hi. Finehas cu Shiloh khua a Topa i thiampi a dektu Eli i capa hi. Mahlai a um ngalkap ten Jonathan hawh zo tih thei haw ma hi.
4 Filistin ngalkap tei ngiahbukah hawh tukin Jonathan i tot tukmi mualkawn langkhat veve ah a hiam zetmi suang ngengpi pa nih um hi. Suangpi pa khat i min cu Bozez hi, adang pa khat cu Seneh ti haw hi.
5 Bozez cu zin saklam Michmash lamah um hi. Seneh cu lam hanglam Geba lam mawkah um hi.
6 Jonathan in tangval pa i lakah, “Pathian bia ngawl Filistin ngalkap tei ngiahbukah hawh tuk hung, Pathian in bawm kha tuk hi. A bawm ngangai tale iti zahin mi dawmno ahi uh vangin neh leleng tuk hung. Kuamah in kham thei haw tukma,” ti hi.
7 Tangval pa in, “Na tupmi cu bawlin hi; na lamah um ing.”
8 Jonathan in, “Pha hi! Hawh nung inna, mu haw tahen.
9 Ngak hih unna, na lak uhah hungtik tung, a tih haw tale hilai pen ngak tuk hung hi.
10 Ka lakah hung un,” a ti haw tale hawh tuk hung; itahim titale, “Hung un! a ti haw tale Pathian bopnakin neh tuk hung hi tih a langnak,” ti hi.
11 Mah hangin Filistin tei muh tukin lang him haw a, Filistin miten, “Zo kek un, a ngelhnak haw suangkua sung pen Hebru mi khenkhat tul haw toh hi,” ti hi.
12 Filistin ngalkap ten Jonathan le a hiamnam cawitu tangval pa cu “Hilai ah hung hih hem un. Thuhilh tuk nei ung hi,” tin ti haw hi.
Jonathan in, a tangval pa i lamah, “Manlangin zui in, Pathian in nehnak pia zo,” ti hi.
Jonathan in, a ngalhiam puatu samin “Ka lak hungto in; itahim titale Topa in Israel tei khut sungah nehnak pia khawng zo ti hi.”
13 Jonathan cu bokno in vakin, tangvalpa in zui pepel hi. Jonathan in Filistin mite cu namin vat lum pepel a, tangvalpa in that pepel hi.
14 Masabelin, a thahnak mun haw inn mun tia laih munah Jonathan le a tangval ten Filistin mite sawm nih laih that haw hi.
15 Filistin mi hempohin, a thinsuzet haw in ngalviltu ngalkap le ngiahnak a um ngalkapte cu can tawtok haw hi. Lei tianin hingin, Filistin mite cu lau le cantawtokin buai mahtak haw hi.
Filistin Neh Haw
16 Benjamin ngam, Gibeah khua Saul i ngalkap, ngalviltu ten Filistin mi suk le to in, a tai lih haw amuh haw ten,
17 Saul in, “Ngalkap nangmu le muh sialdun hem un; a kim ngawl un ung maw,” ti hi. A sialdun haw ten Jonathan le a hiamnam cawitu tangval pa umma tih thei haw hi.
18 Saul in thiampi Ahijah lakah, “Thiampi angki cualpi hilai ah hunpihin,” tin hilh hi. Itahim titale Israel tei mai ah angki cualpi cawitu cu amah hi.
19 Thiampi Ahijah lakah Saul a otlih laih takin Filistin ngalkapte cu a ngiahnak hawah buai sesem haw hi. Mah hangin Saul in Ahijah lakah, “Na kungkhai zohmi cawl hih hemin,” ti hi.
20 Saul le ngalkapte cu thakhatin Filistin do tukin hawh haw hi. Filistin mite cu buai leita haw zo in, a mihing haw tianin theidun ngawltohin, amuh le muh thatdun haw hi.
21 Filistin tei lak a teltu Hebru miten Saul le Jonathan amuh haw ten kikleh haw hi.
22 Efraim mualhum ngamah tai in, a ngelh Israel ngalkap cu Filistin mite sung haw tih a zak haw ten Saul le Jonathan lakah kikleh haw in, Filistin mite do haw hi.
23 Mah ni-in Israel cu Topa in, panpihin Bethaven khua kal tian hil haw hi.
Ngaldo Nung Ten Thil Cangmi
24 Saul in, “Ka ngal tei humah phu ka lak laklawh, tuni in kuamah in an ei pahsuh un. Na ei uh tale sualnak bawl hi tuk uh ci,” tin tamsianet hi. Mah hangin Israel mi cu sun thalengin imah a eih haw ngawl hangin ngilkial zetin tamsawl khawng haw hi.
25 Tukhaangpi sung heng haw in, mahlai ah khuaihum tamzet um hi.
26 Mah tukhaangpi cu khuaihum dimin um hi. Saul i siatcam mi a lau haw hangin kuamah in ei ngam haw ma hi.
27 Mahnaven Jonathan in, a pa i siatcam mi a theih ngawl hangin a kenmi thing tuah khuaiphang cu sunin, khuai hum dawm ei in, a ngilkial pha deuh hi.
28 Mahmi amuh ten ngalkap pa khatin, ‘Kuamah an a eih uh ngawl hangin tha nei ma toh hung,’ tin hilh hi.
29 Jonathan in, “A mihing tei humah ka pa in thilpha ngawl ngangai bawl hi. Zo veule, khuaihum ka eih hangin pha deuh ngangai ing.
30 Tuni in Filistin mite nehin an a lonmi hempoh la in, a ei haw a hin, iti zahin amu ca nemcuam tuk him. Ituk zahin Filistin mite tam deuh that haw tuk him, ngaisung teh un,” ti hi.
31 Mah ni-in, Israel miten Filistin mite cu Mikmash pen Aijalon tian nawt haw hi. Israel mite cu ngilkialin tamsawl khawng haw hi.
32 Ngal teita a lon haw mi tuu le khui cu a munah ngo in, a cik cu a thi tuah ei tawtok haw hi.
33 Saul lakah, “Na ngalkap ten sathi tuah cik ei tawtok haw a hih ten Topa i mai ah sual haw hi,” tin miten hilh haw hi.
Saul in, “A miphun uh zawngkhaltik uh ci,” tin au hi. Mah hum pan, “Suangtum ngengpi hilai lamah tat un,” ti hi.Ref 14:33 Pian 9:4; Thiam 7:26-27; 17:10-14; 19:26; Daan 12:16, 23; 15:23
34 “Mi hempoh tei lakah hawh unna, a khui le a tuu haw hilai ah hunpih tukin hilh un. Cik cu a thi tuah a eih ngawlnak tukin le Topa i mai ah a sual haw ngawlnak tukin a ngan hilai ah ngo haw henna, ei haw hen,” ti hi. Mah hangin mah zan cu a venghawng haw in, a khui haw hunpihin mahlai ah ngo haw hi.
35 Saul in biaklan dawhin, Topa i ca in, a dawhmi masabel hi.
36 Saul in, a ngalkap tei lakah, “Hawh nung inna, zanlamin, Filistin mite do tuk hung hi. Zing khuavak tian sim nung inna, that khawng tuk hung,” ti hi.
“A phabel na tihmi cu bawlin hi,” tin ti haw hi.
Mahnaven thiampi pan, “Pathian dong ma sa hih nung,” ti hi.
37 Mah hangin Saul in Pathian nelah, “Filistin do nang maw? Ka do uh tale neh ni ung maw?” tin dong hi. Mahnaven Pathian in don ma hi.
38 Saul in Israel puitu tei lakah, “Hung hem un, tuni in i sualnak bawl uh cim, zei hem un.
39 A nungmi Topa, Israel pantu min tuah kam ing. Ka capa Jonathan hei a khelh ahi tale thah hi tuk,” ti hi. Midang cu imah awn haw ma hi.
40 Saul in, “Na venghawng uhin hilai lamah khin ding un. Kei le ka capa Jonathan hilai ah ding tuk ung,” ti hi.
“Na deih bangin hi tahen” tin mipi ten ti haw hi.
41 Saul in Topa Israel Pathian nelah, “ Topa ita, tuni in don ma cim? Topa, Israel Pathian, Urim le Thummim, Pathian deihnak theihnak tukin a man haw mi, awngbali phun man mi, suang thiangtho tuah thei lehtik zalin hi. Keima mawh, ahimata Jonathan mawh ahi tale Urim tuah hilh kiklehin hi. Israel mipi a mawh haw tale Thummim tuah theilehtikin,” tin ti haw hi. Urim tuah a theihlehtik hangin Jonathan le Saul cu mi khial hi haw a, Israel mite cu khial ngawlin suak haw hi.Ref 14:41 Mipum 27:21; 1Sam 28:6;
42 Saul in, “Keimah le ka capa Jonathan akua saw ung kaw?” tin, a dotleh haw ten Jonathan humah tawp hi.
43 Saul in Jonathan cu, “I bawl sual nge cim?” tin dong hi.
Jonathan in, “Khuaihum demno ei ing. Thi tukin ngalling ing, ti hi.”
44 Saul in, “Nangmah na thi ma tale keimah hi Pathian in that hen,” tin siatcam hi.
45 Mahnaven Israel miten Saul lakah, “Israel tei ca ngal nehtu Jonathan thi tuk maw? Thi hihim tukma! A lu hum a samzang khatno hei leihumah cak tukma hi, tin, a nungmi Topa i minin thutiam ung hi. Tuni a bawlmi cu Topa i bopnakin, a bawlmi hi,” tin ti haw hi. Israel miten Jonathan cu thi ngawlin hupsuak haw hi.
46 Mahnung siah Saul in Filistin mite cu hil ngawltohin zamin Filistin mite cu a ngamah pin haw hi.
Saul Uknak le A Innkua
47 Saul cu Israel kumpi a deh nungten khua hempoh ah ngaldo hi. Moab mi, Ammon mi le Edom mite do in, Filistin mite le Zobah kumpi vang do hi. Ngal a do hempoh ah neh leleng hi.
48 Ngalpha zetin do in, Amalek vang neh hi. Israel mi a dotu tei khut sung pen hum ngah hi.
49 Saul i capate cu Jonathan, Ishvi, le Malkhishon hi. A canu upa saw cu Merab hi, a nauta saw cu Mikhal hi.
50 A zi cu Ahimaaz i canu Ahinoam hi. A ngalkap uktu bawi cu a pasel Ner i capa Abner hi.
51 Saul i pa Kish le Abner i pa Ner cu Abiel i capate haw hi.
52 Saul in, a nunsung hempoh nase zetin Filistin mite do hi. Mi ngil le ngalpha amuh le a tawhmi hempoh cu a ngalkap tukin la mek hi.