22
1 Mahten mahmi vancungmi in, thalang bangin a de mi nunnak luitui cu lak hi. Mah lui cu Pathian le Tuuno i kumpi khunnak pen puttulin,Ref 22:1 Ezk 47:1; Zek 14:8;
2 khuapi lampi laizangah luang hi. Mahmi lui i lang le langah nunnak thingkung umin, ha khat vei khat, kum khat vei sawm le vei nih ngah hi. A cehte cu mi namkim i damnak hi.Ref 22:2 Pian 2:9;
3 Pathian i tamsiatnak tawktu hempoh mahlai khuapi sungah muh tukin um haw tukma hi. Pathian le Tuuno i kumpi khunnak cu mah khuapi ah um tuk a, a nadektu ten amah cu bia haw tuk hi.Ref 22:3 Zek 14:11; Pian 3:17;
4 Amuh ten a maicang mu haw tuk a, a min cu a calah ngan haw tuk hi.
5 Mahlai ah zan umleh tukma toh hi, mei inn hei hihen ni i vaknak hei hihen kul haw tukma toh hi, itahim titale Topa Pathian cu amuh tei vaknak hi tuk a, amuh cu kumpi bawi bangin kumkhua in uktu hi haw tuk hi.
Jesuh Hunlehnak
6 Mahten vancungmi in ka lakah, “Hi thute hi a manmi le muantakmi hi. Profet tei lakah a Hawvang Thiangtho a hahtu Topa Pathian in, a hengpal tukmi thilte khi ama nadektute theitik tukin a vancungmite hah hi,” ti hi.
7 Jesuh in, “Ngai un, hungpal tung hi. Hi laibu sung a, ngatmi profet awnkam a zuitute cu mi lungdam haw hi,” ti hi.
8 Keimah Johan in hite hi za ing a, thei ing hi, mahtin ka muh ka zak nungten hitih bang thil a laktu vancungmi i ke bulah bokin bia tukin um ing.
9 Mahnaven amah in, “Bia pahsun! Kei hei nangmah bangin le na unau profette le hi laibu sung a ngatmi thu a zuitute bangin Pathian i nadektu hi bok ing hi. Pathian bia saw in hi,” tin ti hi;
10 Mahten ka lakah, “Hi laibu sung a, ngatmi profet awnkam hi thu-ip bang koih pahsun, itahim titale hi thute hi kim pal tuk hi.
11 Akua hei hihen thilpha ngawl bawltu in, bawl hih hawta poh henna; thilpha bawltu in bawl hih bok poh hen: ningdelhhuai a ngamtatu in ningdelhhuai in ngamta hih haw tahen. Mahten a thiangthomi cu thiangtho in um hih tahen,” ti hi.
12 Jesuh in, “Ngai un, hungpal tung hi. A nadehnak haw babangin pia tukin a dehman haw keng tung hi.
13 Keimah cu Alfa le Omega, ihempoh i bulpatnak le a tawpnak ing,” ti hi.
14 A vansilh haw mi thianglim zetin, a sawpciangtute le nunnak thingkung le a ngah eih theihnak thu le khuapi kongka pi pen tum theihnak thu a neitute cu mi lungdam mi haw hi.
15 Mahnaven uicote, mitzial thiamte, nupa sualnak bawltute, laithatte, milim biatute le zolthu sontute cu khua pualamah um haw tuk hi.
16 “Keimah Jesuh in, pawlpi tei lakah hi thute than tukin ka vancungmi nohtei lakah hawhtik ing. Keimah hi David casuan ing hi. Keimah hi a vak zetmi nikonghong Aksi ing,” ti hi.
17 Hawvang Thiangtho le mothak ten, “Hungin hi,” ti haw hi.
Hi thu a zatu hempoh ten, “Hungin hi,” ti haw hi.
Adangdummi hempoh hung un, nunnak tui a duhtu hempohin man piak ngawlin in haw hen.
Thukhupnak
18 Keimah Johan in hi laibu sung a ngatmi profet awnkam a zatu hempoh lakah ngallinnak pia ing hi; Hi profet awnkam humah akua hei hihen thudang a bettu cu Pathian in, a humah hi laibu sung a, ngatmi a lauhuai bawlsiatnak khi beet hi bok tuk hi.
19 Mahten akua hei hihen hi laibu sung a, ngatmi profet awnkam hi cangkimno phuang ngawlin a phiat vawktu cu hi laibu sung a, a co tukmi nunnak thingngah le khuapi thiangtho sung a, tum theihnak a co tukmi khi Pathian in phiah vawk sak bok tuk hi.
20 Hi thu hempoh hi man hi tin theihpihtu in, “Man loli hi, hungpal tung,” ti hi. Amen. Topa Jesuh! Hung tohin hi.
21 Topa Jesuh i hehpihnak thupha cu nohtei humah um tahen.