21
Van Thak le Lei Thak
1 Mahceng ten van thak le lei thak mu ing. Amasa a ummi lei le vante pai in, tuipi vang umleh ma toh hi.Ref 21:1 Isa 65:17; 66:22; 2Pet 3:13;
2 Mahten khuapi thiangtho Jerusalem thak cu pasal nei tuk khanglai in, a pasal tukmi tawk tukin a mansa in, a thuamdun bangin thuamin Pathian lak pen tolhsuk khi mu ing.Ref 21:2 Isa 52:1; Mang 3:12; Isa 61:10;
3 Kumpi khunnak pen aw ngingzet ka zakmi in, “Pathian umnak inn cu mihing lakah hi zo! Amah cu amu lakah um tuk a, amuhte cu ama mihing hi haw tuk hi. Pathian amah loli cu amu lakah um tuk a, a Pathian haw hi tuk hi.Ref 21:3 Ezk 37:27; Thiam 26:11, 12;
4 A mit hitui hempoh huksak khawng tuk hi. Thihnak umleh tukma toh hi. Khaw-ngaih lungleng kahnak le natnak umleh tukma toh hi. Itahim titale mah mite cu pai khawng zo hi.”Ref 21:4 Isa 25:8; 35:10; 65:19;
5 Mahten kumpi khunnak hum a, khungtu in, “Zo un! thil hempoh a thakin bawl zo ing,” ti hi. Ka lakah, “Hi thu hi nganin, itahim titale a dikmi le muantakmi thu,” ti hi.
6 Mahten hitin hilh lehleu hi, “Ihempoh bawl khawng hi zo hi. Keimah cu Alfa le Omega ing, a bulpatnak le a tawpnak ing hi. Akua abang a dangdum mite cu man piak kul ngawl ciktui pen a luangmi nunnak tui intik tung hi.Ref 21:6 Isa 55:1;
7 Nehtu hempoh ten hihi co haw tuk hi. A Pathian haw hi tung a, amuhte cu ka casuante hi haw tuk hi.Ref 21:7 2Sam 7:14; Saam 89:26-27;
8 Mahnaven, ngalnawm mite, ngalnawmte, ningdelhhuai khawhuai biatute, laithatte, nupa sualnak bawltute, mitzial thiamte, milim biatute le zolthu sontu tei umnak tuk cu tuitingpi bangin meipi le kaat mei sungah na hi tuk a, mahmi cu vei nih thihnak hi,” ti hi.
Jerusalem Thak
9 Vancungmi salih lak pen a dawltabel vancungmi, a lauhuai bawlsiatnak salih tuah a dimmi khuat salih a cawitu in ka nelah, “Hungin hi, Tuuno i zi tuk mothak lak nang,” ti hi.
10 Hawvang Thiangtho in keimah zialin, vancungmi in, a sang zetmi mual humah hawhpih hi. Mahten Jerusalem khuapi thiangtho cu Pathian lak pen tolhsuk khi lak hi.Ref 21:10 Ezk 40:2;
11 Pathian sunloihnak tuah a vakmi khuapi hi. Jasper tihmi suang manpha bang de in, thalang bangin ciang hi.
12 A kimkotah a sang zetmi pang tuah um haw a, kongka sawm le pa nih nei hi, mah kongka cu vancungmi sawm le pa nih ten cing haw hi. Mah kongka ah Israel hinnam sawm le pa nih tei min ngan haw hi.Ref 21:12-13 Ezk 48:30-35;
13 Pang khatah kongka pa thum ten um hi, nisuahnak lamah kongka pa thum, hanglamah kongka pa thum, saklamah kongka pa thum, nitumnak lamah kongka pa thum tin um hi.
14 Khuapi upnak kulhtian cu, inn kil tawphah suang sawm le pa nih humah phutmi hi haw hi; mahmi suang humah Tuuno i a tiikmi sawm le pa nih tei min ngan haw hi.
15 Ka lakah a hilhtu vancungmi in khuapi le a pang le kongkate tehnak tukin sui ngolh cawi hi.Ref 21:15 Ezk 40:3;
16 Khuapi i a zallam, a sau lam, a sanglam bangve khawng hi. Vancungmi in tehnak ngolh tuah mah khuapi cu teh hi. A zallam peng thawng khat le za nga, a sau lam peng thawng khat le za nga le a sanglam vang peng thawng khat le za nga leleng bok hi.
17 Vancungmi in, a tehnak tuah lengin pang vang cu a teh ten pi za nih le sawm le pi luk sang hi.
18 Pang cu Jasper tihmi suang manpha tuah bawlmi hi a, khuapi cu thalang bangin a ciangmi sui ngek tuah bawlmi hi.Ref 21:18-21 Isa 54:11-12;
19 Khuapi tohnak nuaitabel suang phah cu suang manpha a tuatuam tuah puahmi hi. A pa khatnak cu jasper suang manpha, a pa nihnak cu safira suang manpha, a pa thumnak cu agate suang manpha, a pa linak cu emerald suang manpha,
20 a pa nganak cu onyx suang manpha, a pa luknak cu karnelian suang manpha, a salihnak cu aile le sui pianzia tawhhelmi quartz suang manpha, a liatnak cu beryl suang manpha, a kuahnak cu topaz suang manpha, sawmnak cu chalcedony suang manpha, sawm le pa khatnak cu turquoise suang manpha, a sawm le pa nihnak cu amethyst suang manpha nam tuatuam tuah bawlmi hi.
21 Kongka pi sawm le pa nih cu kep suang manpha tuah bawl haw in; kongkapi pa khat tek cu kep suang manpha pa khat tek tuah bawlmi hi. Khuapi lampi cu sui ngek tuah bawlmi hi a, thalang bangin ciang hi.
22 Mah khuapi ah biakinn umma hi. Itahim titale a biakinn cu Topa Pathian Cungnungbel le Tuuno hi cih toh hi.
23 Ni le hade tei vaknak vang kulma hi. Itahim titale Pathian sunloihnak cu mah khuapi ah vakin, a mei inn haw cu Tuuno hi.Ref 21:23 Isa 60:19-20;
24 Leihum mi hempoh ten mah khuapi vaknak hangin hawhnak mu haw tuk a, leihum kumpi bawi ten mah khuapi sungah a hauhsaknak haw sum le pai keng haw tuk hi.Ref 21:24 Isa 60:3;
25 Mah khuapi i kongkapite cu sun nilui in hong haw a, khakleh haw tukma toh hi; itahim titale mahlai ah zan tih umma toh hi.Ref 21:25-26 Isa 60:11;
26 Leihum hinnam hempoh ten a hauhsaknak haw le a phatnak haw cu khuapi ah hunpih haw tuk hi.
27 Mahnaven mah khuapi sungah a thiangtho ngawlmi imah tum tukma hi. Zahcakhuai thil a bawltute le zolthu sontute vang tum haw tukma hi. Tuuno i nunnak laibu sung a minngat mite bek tum haw tuk hi.Ref 21:27 Isa 52:1; Ezk 44:9;