14
Tuuno le A Mihingte
1 Mahten ka zo le Zion mualah Tuuno ding leng mu ing. Amah tuah munkhatah mi thawng za khat le thawng sawm li le thawng li um haw a, mah mite cu a cal hawah Tuuno le a Pa i min ngatin um hi.Ref 14:1 Ezk 9:4; Mang 7:3;
2 Mahten vancung pen aw nging pa khat, tuihual pi aw le vanthum dudum bang za ing. A thiamzet tei tummi tingtang aw bang hi.
3 Mi thawng za le thawng sawm li le thawng lite cu kumpi khunnak, nganhing pa li le upa tei mai ah dingin la thak sa haw hi. Amuh bek i cun theihmi la thak hi. Amuhte cu mi hempoh sung pen tatsa mite haw hi.
4 Amuhte cu mi thiangtho, numei tuah sual awng ngawlmite hi haw in, khanglai thianlim bang haw a, tuuno i hawhnak hempoh ah zui haw hi. Mi hempoh lak pen tatlehmi hi haw in, Pathian le Tuuno lakah anthak bangin piak masabelmi hi haw hi.
5 Zolthu son awng ngawlmi le sonsiat tuk imah nei a ngawlmite hi haw hi.Ref 14:5 Zefa 3:13;
Vancungmi Pa Thumte
6 Mahten vanah a leng kawkawi limi vancungmi pa khat mu ing. Amah cu leihum hinnam hempoh, awn namkim, miphun hempoh le ngam hempoh ah kumkhua a khomi Thuthangpha a phuangtu haw hi.
7 Aw nging zetin, “Pathian upat unna, a thawmngengnak cu thangphat un! Itahim titale hinnam kim tei thukhen hun heng zo hi. Van le lei, tuipi le ciktui hempoh bawltu khi bia un,” ti hi.
8 Vancungmi pa nihnakin, “A pa khatnak cu zui in, a ngeng zetmi Babilon cu sia zo! sia ngah tatak zo! a tisa deihnak sabittui cu mi hempoh pia in, khamtik khawng zo,” ti hi.Ref 14:8 Isa 21:9; Jer 51:8; Mang 18:2;
9 Vancungmi pa thumnakin, a mai a, a lengmi vancungmi pa nihte khi zui in, awn ngingzet tuah “Akua hei hihen sahang le a zuk cu bia in, melciknak a calah ahimata a baan humah a neitu cu:
10 Pathian thinuknak khuathai sung a, sun tukmi sabittui cu intuk hi. Mahti bangin Pathian thinuknak sabittui a intu cu vancung mithiangthote le Tuuno mai pen kaat mei alh sungah bawlsiatnak thuak haw tuk hi.Ref 14:10 Isa 51:17; Pian 19:24; Ezk 38:22;
11 Amuhte bawlsiatnak meikhu cu catngawlin, a humlamah zaamto leleng hi. Sahang le a milim zuk biatu le a melciknak tacik neitu tei ca in sun le zanah hei hihen lungmuang zetin colhdamnak hun nei haw ma toh hi,” ti hi.Ref 14:11 Isa 34:10;
12 Hiti bang hun ten Pathian mihingte, Pathian thukham a zuitute le Jesuh ca in muantak zetin, a nungtu ten thinsau in thuak theihnak a neihmi haw langtik kul ngangai hi.
13 Mahten vancung pen aw pa khat ka zakmi in, “Hihi nganin hi. Topa i nadehnak hangin thihnak a thuaktu cu mi lungdamte haw hi,” ti hi. Mahten Hawvang Thiangtho in, “Hi zuh hi, a nadeh haw pen cawl haw tuk toh,” ti hi.
Leihum Ankung Cop Hun
14 Mahten zo ing a, a ngomi meingo mu ing; mah meingo humah a lu ah sui tuah bawlmi kumpi lukhu khu in, a khutah a hiam zetmi phio a cawitu mihing bangkek pa khat mu ing.Ref 14:14 Dan 7:13;
15 Biakinn sung pen vancungmi pa khat tulin meingo hum khungtu i lakah aw nging zetin, “Na phio cu cang ahnakah mangin, itahim titale a hun kim zo hi; ankung cop hun zo hi, leihum ankungte cop hun leita zo,” ti hi.Ref 14:15 Joel 3:13;
16 Mahten meingo hum khungtu in leihumah a phio cu khiasukin, leihum ankungte cu at hi.
17 Mahceng ten a dang vancungmi pa khat cu vancung biakinn pen a tulmi mu ing; amah vangin a hiam zetmi phio nei hi.
18 Mahten a dang vancungmi pa khat cu mei alh uktu biaklandawh pen tul hi. Phio hiamzet neitu vancungmi lakah nase zetin hitin au hi. “Na phio hiamzet mangin leihum sabit huan a sabitte at tohin, itahim titale sabitte min zo,” ti hi.
19 Mahten vancungmi in, a phio cu leihumah khiasuk a, sabit kung pen sabit ngah cu atin, Pathian thinuknak sabit ngawinak sungah khiasuk hi.
20 Sabit ngah cu khuapi pualeu lamah a ummi sabit ngawinakah a ngawi haw ten sabit ngawinak sung pen thisan luangin, mah thisanin, a zallam peng za nih, a thuklam pi nga tian khuh hi.Ref 14:20 Isa 63:3; Kah 1:15; Mang 19:15;