13
Sahang Pa Nihte
1 Mahten tuipi sung pen sahang pa khat a tul mu a, ki sawm khat le lu salih nei hi. A ki humah kumpi lukhu pa khat ten khu in, a lu humah Pathian zotsaknak min pa khat ten um hi.Ref 13:1 Dan 7:3; Mang 17:3,7-12;
2 Mah sahang cu tavang bang hi a, a ke cu vom ke bang, a kam kiosa kam bang hi. Ngulpi in, a neihmi a huham, a kumpi khunnak le a thuneihnakte cu mah sahang lakah pia hi.Ref 13:2 Dan 7:4-6;
3 Sahang i lu pa khat cu thihpih takin nase zetin liam naven a meima cu damleh zo hi. Leihum buppi in lamdangsa in mah sahang cu zui haw hi.
4 Ngulpi in, a thuneihnak hempoh cu sahang lakah a piak hangin mi hempoh ten ngulpi cu bia haw hi. Mah sahang vang cu bia bok haw in, “Sahang bangtu akua um kaw? Akua in kaw amah a do thei tuk?” tin ti haw hi.
5 Sahang cu tuangkhawngzet le Pathian zawnsakin ot theihnak tuk hon haw a, ha sawm li le ha nih sung thuneihnak vang hon haw hi.Ref 13:5-6 Dan 7:8,25; 11:36;
6 Sahangin Pathian, a min, a umnak mun le vanhum a um hempoh khi heh tin tam hi.
7 Pathian i mihingte do tuk le neh tukin hun piak na hi a, miphun hempoh, ngam hempoh, awn namkim le hinnam hempoh humah thuneihnak piak na hi.Ref 13:7 Dan 7:21;
8 Thahnak thuaktu Tuuno i nunnak laibu sungah leipi pian laih ngawlin min khumsa mite sial ngawl, leihummi hempoh ten mahmi sahang cu bia haw tuk hi.Ref 13:8 Saam 69:28;
9 Beng na nei uh tale ngai un!
10 Sal a mat tuk tihsa mite cu mat hi haw tuk a, namsau tuah thah tuk tihmite cu thah ngangai hi haw tuk hi. Hiti bang hun ten Pathian mihing ten thinsaunak, thuak theihnak le muankhonak langtik tuk kul ngangai hi.Ref 13:10 Jer 15:2, 43:11;
11 Mahten a dang sahang pa khat leisung pen tul khi mu ing. Mahmi sahangin Tuuno bangin ki pa nih nei a, ngulpi bangin awn hi.
12 Mahmi in sahang pa khatnak i thuneihnak khi ama umlaih loli in mang hi. Thihpihtak ma liamin, a dam lehmi sahang pa khatnak khi bia un, tin leipi le a hum a um hempoh tiklo hi.
13 A pa nihnak sahangin nalamdang ngengpite bawl hi. Mi hempoh tei mitmuhin van pen mei alh cu lei ah caksuktik hi.
14 A pa khatnak sahang i umlaih loli in nalamdang bawl theihnak khuan piak a hih tak cu leihum a ummi hempoh cu zol thei hi. Namsau tuah liam naven a nung lengmi sahang upat piaknakin ama zuk bawl un tin thupia hi.
15 Sahang pa khatnak i zuk milim cu awn thei in amah bia ngawltute a thah khawng theihnak tukin, sahang pa nihnakin pa khatnak i zuk milim sungah nunnak haihawh piaktum theihnak khuan pia hi.
16 Mah sahangin mi hempoh, a ngeng neu, mihau, mi ca-ngah, sal miluat akua abang a taklam khut hawah ahimata, a cal hawah melciknak nei tukin a nuam ngawl vangin bawlsaklo hi.
17 Mah melciknak nei ngawltu cu kuamah in zuakin, lei thei haw tukma hi; mah melciknak cu sahang i min ahimata sahang min i a manmi nambat hi.
18 Hithu ah cihnak kulzet hi. Cihnak neitu in sahang nambat i sullam cu tuat thei tuk hi; itahim titale mah nambat cu mi pa khat i min ai-awhin manmi hi. A nambat cu 666 hi.