12
Pathian Nadehnak Sung Nunnak
1 Mahti bang a hih hangin ka u le naute aw, Pathian i hehpihnak hangin Pathian nelah na pumpi uh cu a nungin apmi biakpiaknak bangin pia un tin ngen ing. A nadehnakah pum a pia mi le a lungdamtiktu hi tukin sawm ing. Mahmi cu Pathian nelah na piak tuk uhmi biaknak tatak hi.
2 Hi leihum mihing nundan hi zui kha toh pahsuh un; mah sangin na sunglam uh pen Pathian in, na lungmu uh thek khawng saw hen. Pathian i deihnak cu thei tuk uh ci a, Pathian mai ah a pha mi, a lungdamnak tuk ikaw tih cu cangkimin thei tuk uh ci.
3 Pathian in, a hehpihnak laksawng a piaknak hangin nangmu bulpak tek humah hitih bangin hilh ing hi: Na ngaihsut tuk uhmi sangin sang saw deuhin ngaisung pahsuh un. Iti bang ing kaw tih khi theidun saw unna, Pathian i upnak a piakzat tenin, na ngaihsut dan uh cu hi saw tahen.
4 A pumpi uh hi pa khat hi naven taksa khen tampi um haw a, mah taksa khen tei nadeh dan cu bangten haw ma hi.Ref 12:4 1Kor 12:12;
5 Mahti bangin ohte vang cu mi tampi nave hungin Khrih tuah a pehdunnak uhah pumkhat hung hi. A pumpi uhah tisa khen tampi a pehdun khawng haw bangin pehdun khawng bok hung hi.
6 Mah hangin laksawng phun dadang a ngah uhmi cu Pathian i hehpihnak a co uh zah ten uhin mang nung hi. A ngah uhmi laksawng cu Pathian Thuthang phuan ahi tale upnak a co uhmi zahin phuang nung.Ref 12:6-8 1Kor 12:4-11;
7 Mahti bang lelengin midang tei nadektu tuk ahi uh tale dek tuk hung, zilhtu tuk ahi uh tale zilh nung hi;
8 midangte thazaang pia tuk ahi uh tale pia nung hi. A neih uhmi na khi midangte tuah kawmdun tuk ahi uh tale phal zetin kawm nung. Hotu tuk ahi uh tale ngeikhei zetin dek nung inna, midang tei lakah hehpihnak langtik tuk ahi uh tale lungdam thatui zetin langtik nung hi.
9 Itdunnak a tih uhten lungmu tak tuah ihdun tukmi hi. A pha ngawlmi cu hua unna, a phami lenkhim un hi.
10 Khristian unau ten na hih uh hangin pa khat le pa khat sunsak dunzetno in itdun un hi. Pa khat le pa khat maizah dunnak thiam un hi.
11 Thazawng pahsuh unna: nase zetin nadek un hi. Na lungmu uh venghawng pia in, Topa i na cu dek un hi.
12 Na muansannak uhin, na lung uh damtik hen; haksatnak na tawh uhten thinsau in um un; catngawlin thungen un.
13 A tingsammi Khristian unaute tuah na neih uhte mangkawm ten unna, mikhual tei ca in, na kongkhah uh hon un.
14 Nangmuh a bawlsiatu tei ca in Pathian thupha ngetsak un; tamsiatnak hi ngawlin thupha khi Pathian nelah ngen un.Ref 12:14 Mt 5:44; Lk 6:28;
15 Lungdam mite tuah lungdam ten unna, a kap mite tuah kap ten un hi.
16 Nangmu ca na ngaihsut uh bangin midang tei ca hei ngaihsutsak bok un. Keimah hibel ing tin ngaisung pahsuh un; nadeh neuno hei hihen deh nuamnak lungmu nei un. Cip ing tin ngaisungdun pahsuh un.Ref 12:16 Thup 3:7;
17 Mi pa kha khatin, na hum uhah phatngawlnak a bawl haw ten a hum hawah phatngawlnakin lul viang pahsuh un. A kuakua hei in, a pha, a mawi a tihmi khi bawl tuk zuam un.
18 Mi hempoh tuah a lemno in um tuk khi a cangthei tawkin zuam un.
19 Ka ngual aw, itik hei ten hihen phula tukin ngaisung pahsuh un hi; Pathian i thinuknak saw in mahmi cu bawl tahen. Itahim titale Lai Thiangtho sungah, “Keimah in phula tung; keimah in lul tung, tin Topa in ti hi,” tin um hi.Ref 12:19 Daan 32:35;
20 Lai Thiangtho in, “Na ngal uhte a ngilkial haw tale an pia in hi; a dangdum haw tale, a in haw tukin tui pia saw in hi; mahtin na bawl thei tale, a zahcaknak tuah meikang bangin kang tuk,” ti hi.Ref 12:20 Thup 25:21-22;
21 Ngitlohnakin neh pahsuh hen; ngitlohnak khi phatnak tuah neh sawta un hi.