4
Biakinn Nate
(1Kum 7:23-51)
1 Kumpi Solomon in, daal tuah biaklandawh pa khat bawl hi; pi sawm thum sau in, pi sawm thum zal le pi sawm le pi nga sang hi.Ref 4:1 Suah 27:1-2;
2 Daal tuah pi salih le a lang thukin, a ngawng bemmi maihum ngengpi bawl hi; mawk khat pen mawk khat tian cu pi sawm le pi nga hi, a ngawng kimsuakin, sawm li le pi nga hi.
3 A mawk pualamah kimsuakin, nuaita le humta tin, mawitiknak tuan nih bawl hi. A mawitiknak haw cu khuicang zuk cuangin, coih haw a, maihum tuah pehdunin sunmi hi.
4 Tui khawlnak maihumpi cu daal ngek tuah bawlmi khuicang zuk sawm le pa nih humah koih haw in, saklam, hanglam, nisuahnak lam le nitumnak lamah khuicang pa thum ten hektik haw hi. Khuicang tei nunglam cu a laizangah tawkdun khawng awn haw hi.
5 Maihum pang cu pi thum sah hi; a mawk cu khuat mawk bang, ahimata paak vangin a pualamah phalh thimin um hi. Mah maihum cu tui pung thawng nih val va hi.
6 Kuangkum ngengpi sawm bawlin, pa nga lam cu Biakinn hanglamah a dang pa nga cu Biakinn saklamah koih haw hi. Mah kuangkum tui cu halkang biakpiaknak a, piakmi cikte somnakin mang haw hi. Maihum kuang ngengpi sung a, tui cu thiampi ten tibualnakin mang haw hi.Ref 4:6 Suah 30:17-21;
7-8 A bawl mek haw milim bangin sui meivaknak sawm le cabuai sawm bawlin, Biakinn laizang khanpi sungah koih haw hi; saklamah meivaknak pa nga le cabuai pa nga, hanglamah meivaknak pa nga le cabuai pa nga koih haw hi. Mah hum pen sui kuang za khat bawl haw hi.Ref 4:7 Suah 25:31-40; Ref 4:8 Suah 25:23-30
9 A sunglam inntual le pualam inntual bawlin, a sunglam inntual cu thiampi teita tukin bawlmi hi. A sunglam le a pualam inntual laklawh a, kong khahnak kongkate cu daak ngek tuam haw hi.
10 Maihumpi cu biakinn nisuahnak hanglam mawkah koih haw hi.
11-16 Huram in beelte, lei suahnakte le kuangte bawl hi, kumpi Solomon lakah bawl tukin a tepmi Biakinn nate hempoh cu bawl khawng hi.
Khuam pa nih,
Khuambol hum a koihmi kuang bangmi khuambawk pa nih,
Khuambol hum a, khi-ngui pehdunte,
Khuambol kimkot, a hum le a nuaita tin, koihmi daal tuah bawlmi taleti za li,
Khuileng sawm,
Kuang kumpi sawm,
Maihum,
Maihum a dototu khuicang sawm le pa nih,
Beelte, kawpiate nei haw hi.
Khutzung thiam Huram in hi nate cu kumpi Solomon i thupiakmi bangin Topa i Biakinn sung a, man tukin nawt ciangmi daal tuah bawl khawng hi.
17 Kumpipa in, Jordan Munlawn, Sukkoth le Zeredah laklawhah a ummi daal cu pumsuknak munah bawltik khawng hi.
18 A bawlmi nate a tam leita hangin a man haw mi daal izong ngit him tih cu kuamah i tuat zawhmi hi ma hi.
19 Kumpi Solomon in, Biakinn sung man tuk nate cangkimno in bawltik khawng hi. Sui biaklandawh, Topa ca tukin koihmi cangho koihnak cabuaite,
20 meivaknak khuamte le Mun Thiangthobel mai a, vak tukmi sui phabel tuah bawlmi mei-inn le meica,
21 Biakinn mawitiknak paakte, mei-innte, sui phabel tuah bawlmi caicehte,
22 mei-inn, caicehte, kuangte, namtui halnak kuangte le meiling cawinak kuangte haw hi. A venghawngin sui ngek tuah bawlmi hi. Biakinn pualam kongkate le Mun Thiangthobel tumnak Kongkate cu suikhu tuah lotmi hi khawng haw hi.