32
Assiria Ten Jerusalem Sim
(2Kum 18:13-37; 19:14-19; 35-37; Isa 36:1-22; 37:8-38)
1 Hezekiah in, “ Topa i na cu muantak zetin a deh nungten Assiria kumpi Sennacherib in, Judah ngam do hi; ngal kulhtian tuah upmi khua tampi siatsuah tukin thupia hi.
2 Sennacherib in Jerusalem khuapi vang do tum hi, tih Hezekiah in, amuh ten,
3-4 Assiria ngalkapte Jerusalem a heng haw hei in, tui intuk nei haw ma hen tin kumpi Hezekiah le a khutnuai a, bawi ten khuapi pualeu lam a, um a tuinakte bin khawng tum haw hi. Bawi tei ho in, khua sungmi tampi tul haw a, tuinak hempoh a hubin khawng haw hangin tui luang ngawlin kang khawng hi.
5 Kumpi in ngaldo in, a sihsan khualnak tukte cu phano in bawl hi, khuapi kulhtian lemleh hi; a humah ngalvilnak tausangpi sa hi; khuapi kulhtian tiang hi. Jerusalem khua lun nisuahnak lamah a um ngaldo sihsan khualnak tukin, a sak haw mite vang lemleh hi. Ceipi le lumphaw tamzet bawl hi.
6 Jerusalem khuasung mi pano hempoh cu ngalbawite khawngtikin; khuapi kongka el muallawnah a venghawngin khawmduntikin, sosuahnak nei hi:
7 Ngilzet le ngalpha zetin um un; na thinnau pahsuh un. Assiria kumpi hihen, a ngalkap haw hihen lau pahsuh un. Amuh panpihtu sangin eimu lam panpihtu ngil saw hi.
8 Ama neihmi cu mihing ngilnak bek hi, mahnaven ohte a bawmtu tukin le eimu ca in do saktu tukin Topa a Pathian uh nei hung,” ti hi. Mah thu a zak haw ten mipite cu a tha haw tho ngangai hi.
9 Sennacherib le a ngalkapte cu Lakhish ah a um haw laihin, Jerusalem khua a um kumpi Hezekiah le Judah mitei lakah Sennacherib in, mi hahin hi bangin thucah hi;
10 “Assiria kumpi keimah Sennacherib i thucahmi hi ngaisung un; Judah mite, i na muansan uh hang kaw Jerusalem khua kulhtian sungah na um uh?
11 Assiria kumpi khut sung heng tuk ngawlin, Topa ka Pathian uhin, hup tuk hi,” tin Hezekiah in nangmuhte hilh naven zolthu son hi, tui le an ngawlin thi tuk uh ci.
12 Topa Pathian biaknak munte le biaklandawh a siatsuah khawngtu cu amah Hezekiah hi a, Judah le Jerusalem cu biaklandawh pa khat bekah Pathian bia tukin le namtui haal tukin atiktu cu amah leleng hi.
13 Minam dang le ngamdang tei lakah, “Ka pu le pa ten hihen, keimah in hihen ka bawl uh mite thei khawng zo ma uh cim? A koi pathian bekin, a mihingte Assiria kumpi le keima khutsung heng tuk ngawlin hup thei awng maw?
14 Ituk hunin, ka siatsuah uhmi hinnam tei pathian ten a ngam haw cu ka khut uh pen pantul awng haw kaw? Ka Pathian uhin hup tuk hi,” tin ita tithei uh cim?
15 Hezekiah zolmi le puisualmi hi nuam pahsuh un, sang hei sang pahsuh un. “Iti bang minam tei pathian hei in, a hinnamte Assiria kumpi khut pen hup thei awng haw ma hi. Nohtei pathian sesemin hup thei tukma hi!” ti hi.
16 Sennacherib i hahmi palai ten Topa Pathian le a sila Hezekiah a zotsaknak haw cu hi sangin cuangdeuhin, a otmi haw umlaih hi.
17 Assiria kumpi in Topa Israel Pathian langpannak le nautatnak lai hi bangin ngan hi. “Minam dadang tei pathian ten a mihingte cu ka ngilnak khut sung pepan thei awng haw ma; Hezekiah i pathian vangin a mihingte cu ka khut sung pepan thei cuang tukma,” ti hi.
18 Jerusalem khuapi kulhtian hum a, ummi Jerusalem mite liat nuamin, le thum nuamin, mah palai ten Hebru awnin, mah thu cu nging zetin aupih haw hi.
19 Mihing tei khut tuah bawlcopmi hinnam dang tei pathian thu a son haw bangin Jerusalem a Pathian thu vang son bok haw hi.
20 Kumpi Hezekiah le Amoz i capa profet Isaiah ten bopnak ngenin, Pathian nelah au haw hi.
21 Topa in, a vancungmi pa khat hahin, mah vancungmi in ngalpha zetmi Assiria ngalkapte le a ngalbawite cu a ngiahbuk haw pen that khawng haw hi. Mah hangin Assiria kumpipa cu zakca le mitmai sia in, a ngamah kik hi. A pathian biaknak innah a tum ten a capa khenkhat ten a ngalnam haw tuah sunin thi hi.
22 Topa in kumpi Hezekiah le Jerusalem khua mite cu Assiria kumpi Sennacherib le a ngal tei khut pen hup hi. Topa in, a ngamsung khua tihkimah lemdaihnak umtik hi.
23 Jerusalem khua ah mi tampi hungin, Topa i lakah biakpiaknak le Hezekiah piak tukin laksawng tampi keng haw hi, mah pepan hinnam dang hempohin Hezekiah cu upatzet haw hi.
Hezekiah Natnak le Uangthuannak
(2Kum 20:1-3, 12-19; Isa 38:1-3; 39:1-8)
24 Mah hun laihin, Hezekiah cu thi awndiakin, na hi. Topa i lakah thungenin, Topa in, a thungetnak cu sangin dam tuk hi tin sialsiahnak pia hi.
25 Mahnaven Hezekiah cu uangthuang leita in, Topa in, a hum a thilpha a bawlmi humah lungdamnak imah langtik ma hi; mah hangin Judah le Jerusalem mitei humah Topa cu a thinuk hi.
26 Hezekiah le Jerusalem mite cu a lungmu haw a nemleh hangin Hezekiah i nunsung cu Topa i bawlsiatnak tawk haw ma hi.
Hezekiah i Hauhsaknak le Sunloihnak
27 Hezekiah cu hau zetin, mi hempoh ten upat haw hi. A sui le a ngun, suang manpha le namtui, ngalthuam le adang na manphate koihnak tukin inn tampi sa hi.
28 Mah hum pen a neihmi an le sabittui le olif situite koihnak tuk innte sa hi; a khui koihnak tukin khui inn sa in, a tuu koihnak tukin tuu inn sa hi.
29 Pathian in tuu le khui tampi pia in, sum le pai tampi vang a piak hangin khua tampi sat hi.
30 Gihon Ciktui luannak cu khamin, leinuai pen Jerusalem upnak pang sunglam tian tui luangin, a bawltu vang amah kumpi Hezekiah hi. A bawlmi hempoh ah Hezekiah cu lawhting hi.
31 A lungmu le a ziaza thei nuamin, Pathian in Hezekiah cu a nuanuamin ngamtatik hi; mah hei ten a ngamsung a, thasiahhuai nalamdang a piangmite dongkan tukin Babilon kumpi in palai hah hi.
Hezekiah Uknak Bo
(2Kum 20: 20-21)
32 Kumpi Hezekiah in, a bawlmi dadang le Topa nelah muantak zetin, a dehte cu Amoz Capa profet Isaiah Muhnak Laibu le Judah le Israel Kumpi Tei Khang Tangthu Laibu sungah sialsiah haw hi.
33 Hezekiah cu thi in, kumpi khan humta lamah vui haw hi. A thih ten Judah mi le Jerusalem khua mi hempoh ten upatnak pia haw hi. A capa Manasseh in Kumpi dek hi.