31
Hezekiah In Daan Lemleh
1 A puai bawl a celh haw ten Israel mi hempoh a venghawng haw in, Judah ngamsung khua tihkimah hawhin, suangphut a thiangtho a tih haw mite sukehin, Asherah milimnu tatuk tin, a phut haw mi thingphut thiangthote phukin, biaklandawh le a milim biaknak munte phelet khawng haw hi. Judah ngam bekah hi ngawlin Efraim ngam, Benjamin ngam le Manasseh ngamte ah mahti bang bawlin, mah nungten a innah pin ten haw hi.
2 Kumpi Hezekiah in thiampi le Levi mitei nadeh cu phelphuahlehin, thiampi le Levi miten dehvo nei tek haw hi. A nadeh haw cu halkang biakpiaknak, pawlkom biakpiaknak le Biakinn sung Pathian biaknakah a tel tukmi le Biakinn sung khan tihkimah Pathian thangphat le Pathian nelah lungdamnak hilh haw hi.
3 Zinglam le taklam halkang biakpiaknak bawlnak tukin le Sabbath ni le Ha Thak Puai ca in hihen, Topa i Daan piakmi bangin bawl a kulmi puai dadang ca in hihen, kumpi Hezekiah in, a khuihon le tuuhon sung pen tampi pia hi.Ref 31:3 Mipum 28:1-29:39;
4 Mah i hum pen Topa i Daan piakmi bangin thiampi le Levi miten a hun neih zah haw a piak theihnak tukin mipi ten covo a neih haw mi biakpiaknakte cu pia tukin kumpipa in Jerusalem khua mitei lakah thupia hi.Ref 31:4-5 Mipum 18:12-13, 21;
5 Kumpi thupiakmi a zak bek haw ten Israel miten laksawngnote 31:5 Laksawng cu thiampi teita tuk na hi in, sumpi tih hei in tih theih hi; seh sawm seh khat cu Levi mitei ca tukin hi; hunpihin, a neihmi haw lak pen a phabel canghovam, sabittui, olif thau, khuaitui le a lo haw pen suakmi dangte vang pia haw hi; mahten a neihmi hempoh sung pen seh sawm seh khat vang pia haw hi.
6 Judah khua ah a, um mi hempoh, Israel mi hihen, Judah mi hihen, a khui le tuute seh sawm seh khat pia haw hi; mah i hum pen Topa i lakah a piaksa haw mi na thiangtho sung pen seh sawm seh khat pia bok haw hi. A piak haw mite cu vunmun hi.
7 Ha thumnakin laksawng pia pan haw in, ha salih ha tian catngawlin pia haw hi.
8 Kumpi Hezekiah le a khutnuai bawi ten hi bangin vun menmun a piakmi laksawng amuh haw ten Topa thangphatin, Israel tei ca in muicu ngetsak haw hi.
9 Mah laksawng thu cu kumpipa in thiampi le Levi mitei lakah a dot ten,
10 Zadok i casuan Thiampi Sang Azariah in, “ Topa i Biakinn ah laksawng a piakpat haw pepanin le eih tuk cu cangkim zetin nei hung, mah i hum pen a valte vang hizahin, tam hi. Topa in, a mihingte muicu a piak hangin hizah tamin nei hung,” ti hi.
11 Topa i Biakinn mawk a, na koihnak khante sa tukin kumpipa in thupia hi.
12 A thupiak bangin bawlin, mipi tei piakmi laksawng le seh sawm seh khat cu mahlai ah komno in koih haw, Levi mi Konaniah cu a cingtu in bawlin, a unau pa Shimei cu a domtu in koih haw hi.
13 A khutnuai ah nadektu tukin Levi mi sawm koihin: Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath le Benaiah haw hi. Hi a koih haw mite hi kumpi Hezekiah le Thiampi Sang Azariah i thupiak bangin koihmi hi.
14 Biakinn nisuahnak lam kongka cingtu Levi mi Imnah i capa Kore cu Topa i lakah a piakmi laksawng a sangtu le a semtu hi.
15 Thiampi umnak khua dangah mah nadeh cu Levi mi amah bawmtu dadang ten dek haw; a bawmtute cu Eden, Miniamin, Jeshua, Shemaiah, Amariah le Shekaniah haw hi. A nadeh haw mi zo in, a unau Levi mitei lakah a tam a dem bangtenin sem haw hi.
16 Hin le nam khen ngawlin sem haw hi. Biakinn a nadektu pano kum sawm thum le a humlam hempoh cu a nadeh haw zui in semtik haw hi.
17 Thiampite cu a hinnam haw tekin, nadeh nei haw; Levi mi pano kum sawm nih le a humlamte cu ahon ahonin nadeh nei haw hi.
18 A muhte cu a zite, canaute le midang amu lak a, umte tuah sialcih haw hi. Itahim titale ituk hun hei in, a na haw dek tukin mansa lelengin um haw tuk hi.
19 Aaron casuan khuasung a, um thiampite, ahimata, khua elkim ngan tatnak ngamsung a, um thiampi tei lak pen dehvo neitu pano um haw in, amuh ten thiampi innkua pano hempoh le Levi hinnam mipum sialnak sungah a telmi hempoh cu a covo tek haw sem haw hi.
20 Judah ngamsung hempoh ah kumpi Hezekiah in, Topa a Pathian i lungdamnak le a dikmi nate bawl hi.
21 Biakinn ca nadehnakah hihen, Daan thuzuinakah hihen, lungmu tatak tuah Pathian nelah a piak hangin lawhting hi.