29
Judah Kumpi Hezekiah
(2Kum 18:1-3)
1 Hezekiah cu kum sawm nih le kum nga a kim ten kumpi dekin, Jerusalem pen kum sawm nih le kum kuah sung uk hi. A nu cu Zekhariah canu Abijah hi.
2 A cikhaihtu kumpi David bangin Topa i lungdamnak bawl hi.
Biakinn Thiantiknak
3 Hezekiah kumpi a suah kum ha khatnakin, Biakinn kongkate cu Hezekiah in honglehin, lemleh khawng hi.
4 Biakinn i nisuahnak lam mawk inntualah thiampite le Levi mite samkhawmin
5 a lak hawah, “Noh Levi mite, na pu le pa tei Pathian Topa i biakinn cu na thiantiknak tukin nangmuh le muh thiangtik masa un. Mahnung ten Biakinn a nintiktu hempoh vawk khawng un hi.
6 A pu le pa uhte cu Topa a Pathian uh mai ah thil sual bawlin a khaw-ngaitik haw hi. Topa cu lawlin, a umnak mun cu nunghek haw hi.
7 Biakinn kongkate khakin, a vak haw mi mei-innte mittik haw hi. Israel Pathian i Biakinn sungah namtui haal haw ma toh, biakpiaknak vang bawl haw ma toh.
8 Mah hangin Topa cu Judah le Jerusalem humah a thinuk zetin, a hum hawah a bawlmi na ten mi hempoh mulling suaktik hi. Mah thu cu za khawng uh ci.
9 A pa uhte cu ngaldonak munah thi in, a zi le ca uhte salin man haw hi.
10 “Hiti bang a hih ten Topa, Israel i Pathian cu a hum uhah a thinuk tuk ngawltohin, amah tuah thutepnak bawl tukin ngaisung zo ing.
11 Mah hangin ka canote zulzau thong pahsuh un. Ama lakah namtui haltu tukin le mipi in Pathian a biak haw ten hotu tukin Topa in nangmuh hi a tenmi hi uh ci,” ti hi.
12-14 A nuailam a Levi hinnam ten nadek pan haw hi:
Kohath hinnam pen Amasai capa Mahath le Azariah capa Joel.
Merari hinnam pen Abdi capa Kish le Jehallelel capa Azariah.
Gershon hinnam pen Zimnah capa Joah le Joah capa Eden.
Elizafan hinnam pen Shimri le Jeuel.
Asaf hinnam pen Zekhariah le Mattaniah.
Heman hinnam pen Jehuel le Shimei.
Jeduthun hinnam pen Shemaiah le Uzziel haw hi.
15 Hi miten a unau Levi mite samkhawmin, a venghawngin, thianthohnak bawl haw hi. Kumpipa i thupiak bangin Biakinn cu Topa Daan piakmi bangin thiangtik haw hi.
16 Thiampite cu Biakinn sungah tumin, thiangtik haw hi, a thiang ngawlmi hempoh Biakinn tualah, tul khawngin, mahlai mun pen Levi miten Kidron Munlawnah hawhpih haw hi.
17 Nadeh cu ha khat ha, ni khat ni pepanin, ni liat ni-in celh haw; Biakinn sung a tumnak khante vang thiangtik khawng haw hi. Adang ni liat sung, ni sawm le ni luk tian dekleh haw in, Biakinn cu Pathian biaknak ca in, pha tukin cangkimno in bawl khawng haw hi.
Pathian Lakah Biakinn Ap Leh Haw
18 Kumpi Hezekiah lakah Levi miten thuthan haw in, “Biakinn cu biakpiaknak halnak biaklandawh le kuangte, cangho thiangtho luihnak cabuai le kuangte tuah thiangthotik khawng zo ung.
19 Kumpi Ahaz in, Topa i mai ah thil sual a bawl laihin, a lakmi nate la lehin, thiangtik khawng zo ung hi. Topa i biaklandawh mai ah a venghawngin koih zo ung,” tin ti haw hi.
20 Kumpi Hezekiah in, khuasung mite samkhawmin, munkhatno ah Topa i Biakinn ah hawh haw hi.
21 Kumpipa i innkua le Judah mipi tei sual ngaihdamnak tuk le Topa i Biakinn thianthohnak tukin khuicang salih, tuucang salih, tuuno salih le keel salih hunpih haw hi. Kumpipa in Aaron casuan thiampite cu biaklandawh humah mah ngante biakpiaknakah piatik hi.
22 Thiampi ten masabelin, khuicang ngo haw, mahten tuucang, mah nungten tuuno ngo in, mah a thisan cu biaklandawhah a sasangin theh haw hi.
23 Nungdawlbel ten keelte cu la in, kumpipa le Pathian biatu ten mah keel i humah khutsuan haw hi.
24 thiampi ten ngo in, ngaihdam biakpiaknak cu bawl hi tuk hi, tin thu a piak bangin mah thisan cu mipi tei sual ngaihdam biakpiaknak tukin biaklandawh humah leih haw hi.
25 Topa in kumpi David ca in, profet a dektu profet Gad le profet Nathan mangin, David lakah a piakmi daante cu kumpi Hezekiah in zui in, Levi mite vang Biakinn sungah tingtang le daakkopte tuah koih hi.
26 Levi mite cu kumpi David i manmi tumnging nate cawi in, ding haw a, thiampite cu pengkul tuah ding haw hi.
27 Hezekiah in halkang biakpiaknak bawl tukin thupia hi, biakpiaknak a bawl bek haw le, mipi ten Pathian thangphatnak lasa in, tumnging tumtu ten a pengkul le adang tumtheih mite tum haw hi.
28 Biakinn ah a hungmi hempoh ten munkhatno in, Pathian bia haw in, a lasak haw le a tummi haw cu biakpiaknakah halkang tukte a halkang ceng tian cawlngawlin tum thuah leleng haw hi.
29 Kumpipa le mipite cu khukdinin, Pathian bia haw hi.
30 Kumpi Hezekiah le Judah hotu ten David le profet Asaf i ngatmi thangphatnak late cu sa tukin Levi mite hilh haw hi. A hilh haw bangin lungdam thatui zetin sa in, khukdinin, Pathian bia haw hi.
31 Hezekiah in mipite cu, “Atu-in thiangtho zo uh ci, mah hangin Topa i lakah na lungdamnak uh langtiknakin biakpiaknakte Topa i lakah bawl un,” ti hi. A tih bangin bawlin, mi khenkhat ten halkang biakpiaknak tukin lungtho zetin ngante cu pia haw hi.
32 A ken haw mite cu khuicang sawm salih, tuucang za khat le tuuno za nih hi, hite cu Topa i lakah halkang biakpiaknakin bawl haw hi.
33 Mah hum pen mipi tei eih tukin khuicang za luk le tuu thawng thum biakpiaknakah pia haw hi.
34 Ngan hizah ngo tukin thiampi cangkimno in, a um haw ngawl hangin mah nadeh a bo laklawh Levi miten bawm haw hi. Mah hunin, thiampi a tam saw ten thiangtho duntik zo haw hi. (Thianthohnak thu lamah thiampite sangin Levi mite a thu haw khoh saw deuh hi.)
35 Halkang biakpiaknak a piak haw i hum pen mipi tei eihmi biakpiaknak ngan thaute mei a haal tuk le halkang biakpiaknak tuah piak tukmi sabittuite leih tuk cu thiampi tei dehvo hi.
Mahten Biakinn a Pathian biaknak cu a thakin, panleh haw hi.
36 Pathian bopnak hangin mah nadehte cu man lang zetin, a celh theih haw hangin kumpi Hezekiah le mipite cu a lung haw damzet hi.