28
Judah Kumpi Ahaz
(2Kum 16:1-4)
1 Ahaz cu kum sawm nih a kim ten kumpi dekin, Jerusalem pen kum sawm le kum luk sung uk hi. A cikhaihtu kumpi David i nundan cu cung kha ma hi. Topa i lungdam ngawlnakte bawl saw hi.
2 Israel kumpi tei nundan cung hi. Thik tuah Baal pathian milimte bawlin;
3 Hinnom Munlawnah namtui halin, Israel mite Kanaan ngam a tum haw laihin, Topa i hawlvawkmi miphun tei lakah namtui halin, Israel mite Kanaan ngam a tum haw laihin, Topa i hawlvawkmi miphun tei ningdelhhuai a bawl haw mite bawlin a capate tian milim biakpiaknakah pia hi.
4 Dawi biaknak hempoh, mualhum tihkim le thing nilim nuai tihkimah Ahaz in biakpiaknak bawlin namtui haal pepel hi.
Judah Ten Siria le Israel Do
(2Kum 16:5)
5-6 Ahaz a sual hangin Topa a Pathian in Siria kumpi lakah nehnak pia a, Judah mi tampi manin, Damaskas thawngah khia haw hi. Topa i bopnak hangin Israel kumpi Remaliah i capa Pekah in, Ahaz a neh ten ni khatah Judah ngalkap phabelte thawng za khat le thawng sawm nih that haw hi. Topa nung a hek haw hangin, a pu le pa tei Pathian Topa in hiti bang tukin thupia hi.Ref 28:5-6 2Kum 16:5; Isa 7:1;
7 Israel ngalkap pa khat Zikhri a tihmi pa in kumpi Ahaz i capa Maaseiah le kumpi inn uktu Azrikam le thuneihnak lamah kumpi domtu Elkanah that khawng hi.
8 Judah mi cu a unau haw hi naven, Israel ngalkap ten Judah numei le naupang thawng za nih manin, Samaria thawngah khia haw hi. Thil tampi lonsakin, Samaria ah pinpih haw hi.
Profet Oded i Awn
9 Topa i profet pa khat, Oded a tih haw cu Samaria khua ah um hi. Ngaldonak pen a pin mi Israel ngalkapte cu khuasungah a tum kuan haw ten muakin, a lak hawah, “ Topa, na pu le pa tei Pathian cu Judah mitei humah a thinuk hangin Judah mite cu nehtik hi, mahnaven supnak nei ngawlin na thinuk hangin tam leita a valin, na thah uh cu amah in thei hi.
10 Atu in Jerusalem le Judah pen pano le numei ti ngawlin na sal tukin bawl tum khawng bok uh ci. Topa na Pathian uh i mai ah sualnak na bawlbok uhmi hi thei ma uh cim?
11 Hu ngai hem un! Hi na mat uhmite hi na unau uh le na celnute uh hi. Hahleh khawng un, mah ahimata Topa a thinukin, nohte bawlsia tuk,” ti hi.
12 Saklam ngam pen minthangzet mihing pa li Jehohanan, capa Azariah, Meshillemoth capa Berekhiah, Shallum capa Jehizkiah le Hadlai capa Amasa ten ngalkap tei thil bawlmi cu lungkim ngawlin,
13 ngalkapte cu “Na mat uh mite cu hilai ah hunpih pahsuh un. Topa i lakah sual zo hung a, eimuh bawl sia tuk tianin, a thinuktik zo hung hi. Mah hum pen a sualnak uh tam dedeuh tukin hiti bang bawl nuam hih laih si uh ci,” ti haw hi.
14 Mah hangin ngalkap tei matmi le a lonmi nate cu mipi le a hotu tei lakah pia in,
15 a lon haw mi nate le puante semtu tukin a matmi haw sung pen upa pa li teng haw hi. A silh haw tuk puan le kedam pia in, tui le an vang phazetno pia in, a meimate cu olif situi noihsak haw hi. A hawh thei ngawl tohte cu laak humah khungtik haw in, a matmi haw venghawngin Judah ngam, tuumkung khua a tihmi Jerikho khua tian kuat haw hi. Israel mite cu Samaria ah pin haw hi.
Ahaz In Assiria Bopnak Ngen
(2Kum 16:7-9)
16-17 Edom miten Judah ngam cu tu le tu sim haw a, mi tampi manin pui haw hi. Mah hangin kumpi Ahaz in, Assiria kumpi Tiglath Pileser lakah bopnak ngen hi.
18 Mahlai takin Filistin miten nitumnak lam mualhum ngam le Judah ngam hanglamte sim haw hi. Beth Shemesh, Aijalon le Gederoth khua la in, Soko, Timnah le Gim zo khua le a elkim a, um mi khuanote vang la in, luahtum hawta hi.
19 Judah kumpi Ahaz in, a mihing tei humah thil mawi ngawl le thil dik ngawl tampi bawlin, Topa vang a langpang hangin, Judah ngamah Topa in haksatnak hengtik hi.
20 Mah hangin Assiria kumpi Tiglath Pileser in, Ahaz cu bop tum ngawlin dodalin, haksatnak tampi pia thuah hi.
21 Ahaz in biakinn sumpai le nate, kumpi inn nate, sumpaite le Judah ngam hotu upa tei neihmi hempoh laksawngin Assiria kumpi pia naven bawm nuam cuang ma hi.
Ahaz i Sualnakte
22 Ahaz i sualnak cu nase ngangai hi! A ngam sungah haksatnak a hen dedeuh ten Topa i mai ah sual dedeuh hi.
23 Amah a nehtu Siria mitei pathian lak tianah biakpiaknak bawl hi. “Siria pathian ten Siria kumpi cu bawm haw hi. Mah hangin biakpiaknak ka bawl ahi tale bawm bok tuk hi,” tin ngaisung hi. Mahmi in amuh le a ngam mihing tei humah siatsuahnak hengtik dedeuh hi.
24 Mah hum pen Biakinn kuang hempoh la in, sepkeh khawng hi. Topa i Biakinn cu khakin, Jerusalem khuasung mun tampi ah biaklandawh bawl hi.
25 Judah ngam khuapi ah hihen, khuano ah hihen, ngamdang pathian tei lak a, namtui halnak tukin dawi biaknak mun bawl pepel hi. A pu le pa tei Pathian, Topa i thinuknak cu ama humah hengtik dedeuh hi.
26 Kumpi a deh sungin na a piangmi le a bawlmi dangte cu a pat pen a bo tian Judah le Israel kumpi Tangthu Laibu sungah ngan haw hi.
27 Kumpi Ahaz cu thi in, kumpi khanah vui ngawlin Jerusalem khua ah vui haw hi. A capa Hezekiah in kumpi dek hi.Ref 28:27 Isa 14:28;