24
Judah Kumpi Joash
(2Kum 12:1-16)
1 Joash cu kum salih a kim ten Judah kumpi dekin, Jerusalem pen kum sawm li sung ngam uk hi. A nu cu Beersheba khua mi Zibiah hi.
2 Thiampi Jehoiada a dam sungin, Joash in Topa i mai ah thilpha bawlin, Topa i lungdamtik hi.
3 Kumpi Joash ca tukin, Jehoiada in zi pa nih huaisakin, canu le capa tampi hing haw hi.
4 Hun demno sung kumpi a deh nungten Joash in, Topa i Biakinn lem tukin tum hi.
5 Thiampite le Levi mite cu Judah ngamsung khua tihkimah hahin, kum sial Biakinn lepnak tukin a kulmi sumpai khon tukin thupia hi. Manlangzet bawl tukin thupia naven Levi miten nawhkhah haw ma.
6 Mah hangin a hotu haw Jehoiada cu samin, “ Topa i umnak puanbuk cinkhawinak tukin mipi ten siah pia haw hen, tin Topa i sila Moses in thu a zapmi cu ita Judah le Jerusalem mitei lak pen Levi mite na khontik ngawl?” tin dong hi.Ref 24:6 Suah 30:11-16;
7 (Misual nu Athaliah le a zuitu ten Topa i Biakinn cu tampi siatsuah haw a, na thiangtho tampi Baal biaknak tukin mang haw hi.)
8 Kumpi bawipa i thupiak bangin Levi miten sumpai koih khawmnak tuk thingkuang pa khat bawlin Biakinn kongka ah koih haw hi.
9 Pathian sila Moses in masabel siah cu hampa lak pen a khon bangin Topa i lakah siah pia tukin Jerusalem le Judah ngamsung hempoh ah thuthan haw hi.
10 Mah thuthatmi a zak haw ten mipi le a hotute cu lungdamzet haw in, a siah haw cu pia susuihin thingkuang a bawl haw cu dim paih hi.
11 Nisialin dehvo neitu kumpi khutnuai a, bawi pa khat lakah mah kuang cu Levi miten puak mek haw hi. Thingkuang dim zo tih amuh haw ten sumpai cu kumpipa i nadektu sungta le thiampi Sang i palai pa in, la in thingkuang cu a koihnak lengah koihleh haw hi. Mahti bangin sumpai tamzet khawl haw hi.
12 Kumpi Joash le thiampi Jehoiada ten biakinn lem nadektu tei lakah sumpai cu pia in, amuh ten Biakinn lemtu tukin suang sektu, lettama le thik bawltute la haw hi.
13 Nadektu hempohin lol zetin dek haw a, Biakinn cu a sak sem haw laih bangin phazet le khoh zetin lem theileh haw hi.
14 A lep celh haw ten a valmi sui le ngunte cu kumpipa le thiampi Jehoiada lakah kikleh haw in, amah in Biakinn ca a kulmi kuangte bawlnakin mang hi. Jehoiada a damsung cu Biakinn ah catngawlin biakpiaknak bawl haw hi.
15 Jehoiada cu tekkun tiang nungin, kum za le sawm thum a kim ten thi hi.
16 Israel mipi tei ca, Pathian ca le Topa i Biakinn ca in, thilpha bawltu a hih hangin Jehoiada cu David khuapi, Jerusalem khua lun kumpi khanah vui haw hi.
17 Jehoiada a thih nungten Judah hotu ten kumpi Joash cu sosuahin amu thu zui in nung hi.
18 Mah hangin mipi ten Topa i Biakinn ah a pu le pa tei Pathian bia ngawltohin milim le Asherah milimte bia haw hi. Mahtibang a sual haw hangin Topa i thinuknak cu Judah le Jerusalem humah heng hi.
19 Topa in ama lakah kikleh tukin profette hah naven a thu ngai nuam haw ma.
20 Pathian hawvang cu thiampi Jehoiada capa Zekhariah lakah hengin, mipi tei muh theihnak munah dingin, a lak hawah, “ Topa in, ita kaw ka thukham zui ngawlin na hum uhah siatsuahnak hengtik uh cim?” tin thu dong hi. “ Topa nung na hek uh hangin nunghek bok hi,” tin au hi.Ref 24:20-21; Mt 23:35; Lk 11:51;
21 Kumpi Joash le mipi ten Zekhariah cu Biakinn tualah kumpi thupiak bangin suang tuah sep hum haw hi.
22 Zekhariah pa Jehoiada in hehpihin, a cinkhawi lihmi cu kumpi Joash in, a theihleh ngawl toh hangin Zekhariah cu that hi. Zekhariah in, a thihsuk tuk ten, “Na thil bawl uh hi Topa in mu zal henna, na hum uhah phu la hen,” tin au hi.
Joash i Uknak Bo
23 Mah kum khuakhal hun a hen ten, Siria ngalkap ten Judah ngam le Jerusalem khua cu do haw hi. Judah hotu hempoh thatin, nate le sumpai tampi a laksak nung haw ten Damaskas khua ah pua haw hi.
24 Siria ngalkap cu demno haw naven Judah miten a pu le pa tei Pathian a nunghek haw hangin Topa in Judah ngalkap tamzet cu nehtik hi. Kumpi Joash in, Topa i bawlsiatnak tawk ngangai hi.
25 Ngal a donak haw pen nase zetin liamin, a ngalte a kihleh nung haw ten, a khutnuai a bawi pa nih ten suamin, Jehoiada capa phulaknakin, a zaunak hum pen that haw hi. David khuapi ah vui haw a, kumpi khan hei ah vui tawk ma hi.
26 Joash suamtu cu Ammon numei Shimeath i capa Zabad le Moab numei Shimrith i capa Jehozabad haw hi.
27 Kumpi Tangthu Laibu Hilhciannak sungah a capa tei tangthu, ama hum a, profet thuphuan suah mite le Biakinn a lepnakte cu ngan haw hi. Mah nungten a capa Amaziah in kumpi dek hi.