23
Athaliah Suam Haw
(2Kum 11:4-16)
1 Kum salihnakin thiampi Jehoiada in, thil pa kha khat bawl tuk hun kim hitin ngaisung hi. Ngalbawi pa nga: Jeroham capa Azariah, Jehonan capa Ishmael, Obed capa Azariah, Adaiah capa Maaseiah le Zikhri capa Elisahfat tuah thutepnak pa khat bawl haw hi.
2 Judah ngamsung khua hempoh ah hawhin, Levi mite le a hinnam tek haw pen a lubelte a venghawng haw in, Jerusalem ah sam khawng haw hi.
3 Mipite cu Biakinn ah khawmdun haw a, kumpi capa Joash tuah thutepnak bawl haw hi. Jehoiada in, a lak hawah, “A thihsantu kumpi i capa cu hilai ah um hi. Topa in David casuante cu kumpi hi leleng haw tuk hi tin, thu a tepsa bangin atu-in amah cu kumpi hi tuk hi.Ref 23:3 2Sam 7:12;
4 Kumpi a hihnak tukin hi bangin bawl tuk hung. Thiampi le Levi mite Sabbath ni nadek tukin na hun uhten khen thum khenkhat ten biakinn kongkate cing un;
5 a dang khen thum khenkhat ten kumpi inn cing unna; a dang khen thum khenkhat ten Bulphuhnak Kongka cing un hi. Mipite cu Biakinn tualah khawmdun un hi.
6 Nadeh neitu thiampi le Levi mite sialngawl kuamah Biakinn sungah tum un. Thiampi le Levi mite cu thianthohtikmi na hih uh hangin tum pahsuh un; mahnaven midangte cu Topa i thupiakmi bangin a pualeu lamah um un.
7 Levi miten na ngalnam uh doksa in kumpi cing unna, a hawhnak hempoh ah na zui un. Biakinn sung tum tukin a tumtute cu akua ahi hei in, na that un,” ti hi.
8 Levi mite le Judah mipi ten Jehoiada ih thupiakmi cu ngai in, a hilh bangin bawl khawng haw hi. Nadeh a nei ngawl toh mite vang, a inn hawah a pintik haw ngawl hangin nadeh hotu bawi ten nadeh a pan tukmite hei hihen, a celh zotu hei hihen, ho tukin mihing catngawlin nei leleng haw hi.
9 Thiampi Jehoiada in Biakinn sungah a koih leleng haw mi kumpi David i ceipi le ngal lumphawte cu bawi tei lakah pia hi.
10 Kumpi cing tukin mi tampi cu a ngalnam haw doksa in, Biakinn mailam kimsuakin koih haw hi.
11 Jehoiada in Joash cu tulpihin, a lu ah kumpi lukhuh khutik hi. Kumpi i zui tuk daan laibupi pia haw a, kumpi in bawl haw hi. Thiampi, Jehoiada le a capa ten Joash cu sathau thih haw in mi hempoh ten, “Kumpi a nunkhua sau tahen!” tin au haw hi.
12 Mipi ten kumpi a pahcoihnak haw thawm cu Athaliah in, a zak ten mipi a khop khawmnak haw Biakinn ah manlang zetin hawh hi.
13 Mahlai ah kumpi thak cu kumpi ca tuk a tih haw Biakinn kongka khuam elah ngalbawite le pengkul tumtu ten kimin, a din cu mu haw hi. Mi hempoh lungdam thatui zetin au haw in, a pengkul tumin, lasatute cu a tum haw mite tuah a pahcoihnak munah mi hotubel hi haw hi. Athaliah in khawngai lungsia in, a puan bot kek a, “Suam kuhnak! Suam kuhnak!” tin au het hi.
14 Biakinn mawk pen Athaliah thah tuk cu Jehoiada in, a nuam ngawl hangin ngalbawite hahin, “Ngalkap ten a langkhat veve pen cing haw henna, hawhpih haw hen; kua hei hihen Athaliah a pan tumtu cu that un,” tin thupia hi.
15 A tih bangin manin kumpi innah hunpih haw in Cipuh kongka tihmi mun pen that haw hi.
Jehoiada Bawlphat Lehnak
(2Kum 11:17-20)
16 Jehoiada i vaihawmnak hangin kumpi Joash in mipite tuah Topa i mihing hi tukin Topa i lakah thutepnak bawl haw hi.
17 Baal biakinn ah hawh khawng haw in, siatsuah khawng haw hi. Biaklandawh le milimte cu sepkeh belhin, biaklandawh mai loli pen Baal thiampi Mattan that haw hi.
18 Jehoiada in thiampi le Levi mite cu Topa i Biakinn a nadektu tukin dehvo pia hi. David Kumpi i dehvo bangin nadektu hi tukin Moses Daan bangin Topa i lakah a piak haw mi biakpiaknakte mei in haal haw tuk hi. Biakinn ah lasa tukin le lungdam puai bawlnakte vang amu dehvo ngeh hi.
19 Jehoiada in Biakinn sungah mithiang ngawl kuamah tum tuk ngawlin khamtu tuk Biakinn kongka ah kongka cingtute koih hi.
20 Ngalbawite, bawi dangte le khuasung upa minthang ten Jehoiada cu zui in, kumpipa cu Biakinn pen kumpi innah a venghawng haw in hawhpih haw hi. Humta kongka pi pen tum haw in, kumpipa cu kumpi khunnak humah khung hi.
21 Mi hempoh lungdam thatui in, um haw a, Athaliah a thih zo hangin khuapi sung vang cu buainak imah umma toh hi.