2
Biakinn Saknak Vaihawm Haw
(1Kum 5:1-18)
1 Solomon in, Topa i Biakinn sak tuk le ama inn pa khat sak tukin vaihawm hi.
2 Inn saknak thingthatu tukin mihing thawng sawm salih le in suang sektu tukin mihing thawng sawm liat la hi. A na dehnak haw zotu le hotu tukin mihing thawng thum le za luk koih hi.
3 Solomon in Taiar kumpi Hiram lakah hi bangin thucah hi. “Ka pa kumpi David bawmin, a kumpi inn saknak tukin sidar thing na piak bangin kei vang na bop bok tukin hehpih kun ing.
4 Topa ka Pathian minthannak le upatnak tukin biakinn pa khat sak tum ing. Topa ka Pathian minthannak le upatnakin keimah le ka mihingte, zing le takin Sabbath ni, Ha Thak Puai hun le adang ni thiangtho ni-in, halkang biakpiaknak ka piaknak mun uh hi tuk a, catngawlin Topa i lak a cangho thiangtho ka luihnakah namtui a phunkim halin, Topa ka biaknak mun uh hi tuk hi. A kumkhua hi bangin bawl tukin Topa in Israel tei lakah thu a piak zo mi hi.
5 Ka Pathian uh cu pathian dangte sangin a thawmngeng saw a hih hangin ka sak tukmi biakinn vang ngengzet tuk hi.
6 Mahnaven van ngengzet le zalzet hei in, a khuh theih ngawlmi Pathian a hih hangin ama umnak tak tuk ngangai cu kuamah in biakinn sa thei tukma ung. Pathian lakah namtui halnak biakinnno poh tih ngawl cu kei in itin kaw ka sak theih tuk?Ref 2:6 1Kum 8:27; 2Khang 6:18;
7 Atu-in ka pa David in, a tensa mi Judah ngamsung le Jerusalem khua a khut zungthiamte tuah nadek ten tukin mi pa khat, suang hum lai ngan thiam, sui le ngun, daal le thiksek thiam, mepian puan, puan sandup le puan sante tak thiamtu kuat zalin hi.
8 Na mihingte thingat a thiam dan haw ka theih hangin, Lebanon a sidar thing, caak thing le hual thingte cu kuat zalin hi. Biakinn ka sak tukmi cu a ngengzet le a mawi zetmi a hih tuk hangin,
9 thing-ah tamzet kul tung, na mihing ten vaihawmsak haw henna, amuh bawmtu tukin ka mihingte hah tung hi.
10 Na mihing tei eih tukin sangvut beem thawn sawm nih, barli sangvut beem thawng sawm nih, sabittui lang thawng za li le olif situi lang thawng za li kuat tung,” ti hi.
11 Taiar kumpi Hiram in Solomon lakah a thucahmi cu lai tuah kuat kikleh hi. A lai sungah, “ Topa in, a mihingte a ih hangin, a kumpi haw in nang cu bawl zo hi.
12 Lei le van bawltu, Topa Israel Pathian cu thangphat hi tahen. Amah in kumpi David lakah cihnak le theihnak tuah a dimmi, Topa i ca tukin biakinn le kumpi inn sak a tumtu capa pa khat pia hi.
13 Micipzet le khutzung thiam zetmi Huram hah ing.
14 A nu cu Dan hinnam numei hi in, a pa cu Taiar khua mi hi. Huram cu sui, ngun, daal, thik, suang le thingtuah ihempoh a bawl thiamtu hi. Puan mepian, puan sandup, puan san le puancepte bawl thei khawng hi. A coih a phunkim bawl thiamin, a pungsan na hilh nungsang uh cu bawl thiam ngawlmi nei tukma hi. Na pa kumpi David nadektute le na nadektu khutzung thiamte tuah dek kawm haw hen.
15 kuat tukin na tepmi sangvut, barli sangvut, sabittui le olif situite cu hu kuatin hi.
16 Lebanon mualah na kulzahin, sidar thing cu phuk inna, pa khat le pa khat ken kawmin, Joppa tiang tuipi hum pen kuat tuk ung hi. Mahlai pen Jerusalem ah nangin thiakto lehin hi,” tin ngan hi.
Biakinn Sa Pan Haw
(1Kum 6:1-38)
17 Kumpi Solomon in, Israel ngamsung a, hinnam dangte cu a pa David i bawl bangin mipum sialnak bawl hi. A venghawng haw in, hinnam dangte cu thawng za khat, thawng sawm nga le thawng thum le za luk um haw hi.
18 Mah sung pen thawng sawm salih cu thingthatu tuk, thawng sawm liat cu mualhum a, suang cotu le sektu tukin bawlin, adang thawng thum le za luk cu nadektute zotu le hotu in koih hi.