5
Reuben Casuante
1 Jakob i capa upabel Reuben i casuante cu a nuailamte haw hi: (Reuben in, a pa i zineu pa khat a sualpih hangin capa upabel covo co theihnak nei ma toh hi; mah co theihnak cu Josef pia haw hi.Ref 5:1 Pian 35:22; 49:3-4;
2 Judah hinnam cu a ngilbel haw hi, a nam haw venghawng uktu vang amu hinnam sungmi na hi leleng hi; mahnaven upabel covo co theihnak cu Josef ta hi.) Ref 5:2 Pian 49:8-10;
3 Jakob capa upabel Reuben in capa pa li nei in, Hanok, Pallu, Hezron le Karmi haw hi.
4-6 Joel casuante cu khan khat nung khan khat a nuailam bangin: Shemaiah, Gog, Shimei, Mikah, Reaiah, Baal le Beerah haw hi. Assiria kumpi Tiglath Pileser in, a hinnam sungah hotubel Beerah cu manin puivawk hi. Ref 5:6 2Kum 15:29;
7 A innkua tangthu ngatmi sungah Reuben hinnam hotute cu a nuailamte haw hi. Jeiel, Zekhariah le
8 Bela. Bela cu Azaz capa, Shema casuan hi, Shema cu Joel hinnam hi. A hinnam haw cu Aroer khua le saklam pen Nebo le Baal Meon laklawh ngamah um haw hi.
9 Gilead ngamah ngan tampi a neih haw hangin Eufrates Ngun tian a zalmi, phillawn tian nisuahnak lamah ngam cu na luahtum haw hi.
10 Kumpi Saul khanin, Reuben hinnam ten Hagri mite do haw a, tampi a thah nung haw ten a ngam haw, Gilead i nisuahnak lam ngam cu luahtum haw hi.
Gad Casuante
11 Gad hinnamte cu Reuben hinnam tei umnak saklam Bashan ngamah um haw in, nisuahnak lam pen Salekah tian um haw hi.
12 A hinnam sung haw pen a ngilbel hinnam hotu cu Joel hi; a pa nihnak hinnam hotu cu Shafam. Janai le Shafat cu a dang hinnam tei hotu haw hi.
13 Gad hinnam lak pen hinnam dadang a umte cu: Mikhael hinnam, Meshullam hinnam, Sheba hinnam, Jorai hinnam, Jakan hinnam, Zia hinnam le Eber hinnam haw hi.
14 Amuhte hi Huri i capa Abihail casuante hi haw in, a pu le pate cu Abihail, Huri, Jaroah, Gilead, Mikhael, Jeshishai, Jahdo le Buz haw hi.
15 Hi hinnam tei lak pen a lubel cu Abdiel capa le Guni casuan Ahi hi.
16 Bashan le Gilead ngamsung a, khuapi ah um haw in, Sharon ngam ngan tatnak pha ah um khawng haw hi.
17 (A thu haw cu Judah kumpi Jotham le Israel kumpi Jeroboam khan a ngatmi hi.)
Nisuahnak lam hinnam Tei ngalkapte
18 Reuben, Gad le Nisuahnak lam Manasseh hinnam tei sung pen lumphaw, ngalnam le thal le thalcang a mangthiamzettu ngalkap thawng sawm li le thawng li, za salih le sawm luk um haw hi.
19 Himi ten Hagrite hinte, Jetur, Nafish le Nodab hinnamte do haw hi.
20 Pathian muang haw in, a lak pen bopnak a nget haw hangin Pathian in, a ngetnak haw cu theihsakin, Hagri hinnam le a pantu tei humah nehnak pia hi.
21 A ngal tei ngan; kalauk thawng sawm nga, tuu thawng za nih le thawng sawm nga le laak thawng nih lonsak haw hi. Ngalte thawng za khat man haw in,
22 Pathian in, a bop hangin, a ngalte tampi that hi. Mahlai munah sal a tan hun haw tian um leleng haw hi.
Nisuahnak Lam Manasseh Mite
23 Nisuahnak lam Manasseh mite cu Bashan ngam le saklam pen Baal Hermon, Senir le Hermon Mual tian um haw in, a mihingte cu pungzet haw hi.
24 A hinnam tei hotu cu Efer, Ishi, Eliel, Azriel, Jeremiah, Hodaviah le Jahdiel haw hi. Hi hotute cu ngalkap phazet le minthangzet haw hi.
Nisuahnak Lam Hinnamte Hawlvawk
25 Hi miphunte cu Pathian i muantak tukin um ngawlin a pu le pa tei Pathian cu zamsanin, Pathian i hawlvawkmi hinnam tei pathian cu bia haw hi.
26 Mah hangin Pathian in, Assiria kumpi Pul cu (Tiglath Pileser tih vangin sam haw) a ngam haw dotik hi. Kumpi Pul in, Reuben, Gad le nisuahnak lam Manasseh hinnamte cu manin, Halah, Habor, Hara le Gozan Ngunnote 5:26 Hih mun le khuate cu tu a, Iraq saklam ngam a ummite haw hi mawkah umtik hi. Ref 5:26 2Kum 15:19, 29; 2Kum 17:6;