23
1 David cu a tekzet zo a hih toh hangin Israel kumpi tukin a capa Solomon cu koih hi.Ref 23:1 1Kum 1:1-40;
Levi Mi Nadehnak
2 David Kumpi in Israel hotute, thiampite le Levi mite cu sam khawm hi.
3 Levi mi pano, kum sawm thum le a humlam hempoh mipum sialin, thawng sawm thum le thawng liat kim hi.
4 Kumpi in thawng sawm nih le thawng li cu biakinn nadeh hotu in koih hi; thawng luk cu cazin lentu le thukhentu in koih hi;
5 thawng li cu inn le kongkhah cingtu tuk koihin, a dang thawng li cu kumpi i koihmi awnmawi namkim tumin, Pathian thangphattu in koih hi.
6 David in, Levi hinnam cu amu hinnam tekin khen thumin khen hi, Gershom hinnam, Kohath hinnam le Merari hinnam tin khen hi.
7 Gershom in capa pa nih nei in: Landan le Shimei haw hi.
8 Ladan in capa pa thum nei in: Jehiel, Zetham le Joel haw hi,
9 Ladan i casuante ah a hinnam tek haw pen lupibel hi haw hi. (Shimei in capa pa thum nei in: Shelomoth, Haziel le Haran haw hi.)
10-11 Shimei in capa pa li nei in: Jahath, Zina, Jeush le Beriah haw hi. Jeush le Beriah cu casuan a neih haw ngawl hangin hinkhatin sial hi.
12 Kohath in capa pa li nei in: Amram, Izhar, Hebron le Uzziel haw hi.
13 Upabel Amram cu Aaron le Moses tei pa hi. Aaron le a casuante cu na thiangtho a kumkhua in, a cingkhawitu, Topa biak ten namtui haltu, Topa nadektu le a min tuah mipi muicu piatu tukin koih mite haw hi.Ref 23:13 Suah 28:1;
14 Mahnaven Pathian mihing Moses i casuante cu Levi mi lakah sialcih hi haw hi.
15 Moses in capa pa nih Gershom le Eliezer nei hi.
16 Gershom capa lak pen Shebuel cu upabel hi.
17 Eliezer in capa pa khat Rehabiah bek nei hi. Rehabiah in casuan tampi nei hi.
18 Kohath capa pa nihnak Izhar in, capa pa khat Shelomith nei in, amah cu a hinnam haw pen a lubel hi.
19 Kohath capa pa thumnak Hebron in capa pa li nei in: Jeriah, Amariah, Jehaziel le Jekameam haw hi.
20 Kohath capa pa linak Uzziel in capa pa nih Mikahleh Isshiah nei hi.
21 Merari in capa pa nih Mahli le Mushi nei hi. Mahli vangin capa pa nih nei bokin: Eleazar le Kish haw hi.
22 Eleazar cu capa nei ngawlin canu bek nei in thi hi. A canu ten a unau haw, Kish i capate pasal haw hi.
23 Merari i capa pa nihnak Mushi in, capa pa thum nei in: Mahli, Eder le Jeremoth haw hi.
24 Hi cu Levi casuan, a hinnam le a unaupih tek pen sialmi le pa khat nawno in min khummi haw hi. A casuan sung pen kum sawm nih le a humlam hempoh cu Topa i Biakinn ah nadek nei tek haw hi.
25 David in, “Israel i Pathian in, a mihing lakah lemdaihnak pia zo in, amah vang kumkhua in Jerusalem ah um tuk hi.
26 Atu-in Levi miten Topa i umnak puanbuk le Pathian biaknak nate zawn lih kul tukma toh hi,” ti hi.Ref 23:26 Daan 10:8;
27 David i nungdawlbel thupiaknak bangin Levi mi hempoh cu kum sawm nih a kim bek haw ten nadektu in, lak hi haw hi.
28 A dehvo haw cu Aaron casuante biakinn a, Pathian a biak haw ten a nadeh haw mi, inn hempoh le a elkim le inn khante cinkhawinakah le na thiangthote nintik ngawlin a zohnak hawah bawmtu haw hi.Ref 23:28 Mipum 3:5-9;
29 Mah hum pen Pathian lak a cangho luihmi, biakpiaknak a piakmi cangho vamte, naman hel ngawl cangho panote, cangho em piakmite, situi tuah cawhhelmi cangho vamte le biakinn a biakpiaknak a piakmite cuai khai tuk le tehsak tukte cu amu dehvo hi.
30 Zingsial le taksial Topa thangphat sunloihtu hi bok haw hi.
31 Sabbath ni, ha thak puai le puai dadang bawl ten halkang biakpiaknak Topa i lakah piak ten Topa thangphat sunloihtu hi bok haw hi. Tum khatin, Levi mi hizah ten nadek haw tuk tih daan um khawng hi. Itik hun hei in, a dehvo haw cu Topa biak hi.
32 Topa i umnak puanbuk le biakinn zotu hi haw in, a unaupih haw Aaron casuan ten Pathian biaknakah a nadeh haw bawmtu vang hi haw hi.