SAAM LABU 99
Pathian Humtabel Kumpi
1 Topa cu kumpi hi,
leihum mihing ten lau in
can tawtok haw hi.
Topa cu Cherubim hum a,
kumpi khunnakah khungin,
Leipi cu hiing hi.Ref 99.1 Suah 25:22;
2 Topa cu Zion ah
Cungnungbelin um hi.
Miphun hinnam hempoh
uk khawng hi.
3 Mi hempoh ten a thawmngeng le
a sunglawi mi a min cu
pahcawi haw tuk hi.
Amah cu thiangtho hi.
4 A Cungnungbel kumpi, nang cu
thumanmi deih ci;
Israel tei lakah dikcangnak hengtik ci;
Nangmah in dikcangnak le
thuman hengtik ci.
5 Topa a Pathian uh cu
thangphat pahcawi un!
A kumpi khunnak mai ah kuunin bia un!
6 Moses le Aaron cu ama thiampite
hi haw hi;
Samuel vang amah biatu hi.
Amuh ten Topa i lakah
thu a nget haw ten
Topa in ngai hi.
7 Amuh tei lakah Topa in
meingo khalpi sung pen thuhilh hi.
Amuh tei lakah daan le thukham
a piak mite cu amuh ten
zui in mang haw hi.Ref 99.7 Suah 33:9;
8 Maw Topa ka Pathian,
na mihing tei sam ten don ci.
A bawl sualnak haw hangin
dantat navecin,
Amuh tei sualnak ngaidamtu
Pathian hi ci.
9 Topa a Pathian uh cu
thangphat pahcawi un,
A mual thiangtho ah amah bia un!
Topa a Pathian uh cu
thiangtho hi.