SAAM LABU 9
Pathian Dikcangnak Hangin Lungdamnak
1 Topa aw, ka thin le
lung venghawng tuah
nangmah cu pahcawi tung,
na lamdang thasiahhuai
na bawlmi cu hilh tung.
2 Nangma hangin lungdam zetin
lasa tung.
Maw Cungnungbel, na lakah
thangphatnak lasa tung.
3 Nangmah amuh haw ten ka ngalte cu
kik haw, lumin thi haw hi.
4 A dikmi thukhentu hi ci a,
na khunnak humah khung ci;
Keimah panin, thu khen ci.
5 Pathian thei ngawl minamte cu
lawlin, mipha ngawlte cu
siatsuah ci.
Amuhte cu kumkhua in lalthong
haw tuk hi.
6 Ka ngalte uh cu bolal khawng in,
theih hi lehma toh hi,
A khuapi haw cu sia laltik khawng ci.
Theih batleh tuk hi haw ma toh hi.
7 Mahnaven Topa cu
kumkhua in kumpi hi.
Thukhen tukin a kumpi khunnak
humah khung hi.
8 Lei buppi cu diknak tuah ukin,
Pat peng mi nei ngawlin
mi hempoh tei thu khen hi.
9 Bawlsiatnak a thuaktu tei ca in,
Topa cu buknak kulhtian hi.
Haksat hun ten himnak kulhtian hi.
10 Topa aw, nangmah
a theitu ten nang cu muang haw tuk hi.
Itahim titale na lak a hung mite cu,
Nunghek awng ma ci,
11 Zion pen mi a uktu Topa i lakah,
thangphatnak lasa un.
A thil bawl mite cu mi hempoh lakah
hilh un.
12 Mi haksa tei thuaknak cu
Pathian in thei hi,
A taunak haw phawkngil awng ma hi;
Mah hangin a bawlsiatu tei
humah phuba la hi.
13 Topa aw, kei hehpih zalin,
Kei a huatu tei a bawlsiatnak haw hi
mu zalin hi.
Topa thihnak pen
pansuak zalin hi.
14 Jerusalem khuasung tei
mai ah dingin,
Nang ka pahcoihnak thu le late
hilh tung.
Na patsuah hangin lungdam thu
hilh tung.
15 Pathian thei ngawl minamte cu
amu cawhmi khuk sungah caak haw;
Thangsiahin, amuh le muh
awkcop haw hi.
16 Topa cu a dikmi
a thukhennakin amah langtik cop hi.
Mahnaven mipha ngawlte cu
amu bawlmi in awk cop haw hi.
17 Mipha ngawlte le
Pathian a nunghektu hinnam tei
lampi tawpnak cu thihnak hi.
18 Mahnaven mi ca-ngahte cu
phawhngilh leleng haw tukma hi,
Mi haksa tei muansan mi cu
kumkhua in nepsuk hi tukma hi.
19 Topa aw, hungin hi;
Mihingin nangmah do in
ultung toh pahsuh hen.
Pathian nei ngawlte cu
na mai ah sam khawm inna,
a thu haw khensakin hi.
20 Topa aw, a thin haw sutikin;
Mihing thawthong a hih haw lam
theitik zalin hi.