SAAM LABU 83
Ngal Nehnak Ca Thunget
1 Maw Pathian aw, daidenin
um pahsun;
Mengdenin umthong pahsun!
2 Zo hemin, na ngalte
ngal tho li haw hi;
A huatu ten ngal tho haw hi.
3 Na mihingte do tukin
sawm kuh haw hi.
Na humhim mi mihingte
do tum haw hi.
4 “Hung un, a miphun haw in
cimittik tung,
Israel cu a kumkhua in,
phawhngilh mi miphunin
5 Amuhte cu lungkim zetin,
a vaisiam khawm ceng haw ten
Nangmah langpang tukin
tangkhawm haw hi.
6 Edom mi, Ishmael mi,
Moab mi le Hagar mite,
7 Gebal mi, Ammon mi,
Amalek mi, Filistin mi le
Taiya mite,
8 Assiria mi le a cak zetmi
Lot i casuante,
Ammon mi le Moab mi vang
9 Midian mitei hum a na bawl bangin,
Kishon ngunah Sisera le
Jabin tei hum a na bawl bangin
amuh tei humah bawl bokin hi.Ref 83:9 Thuk 4:6-22; 7:1-23;
10 Endor ah neh ci, a luang haw
leihumah a muat a zan
khawng bangin!
11 Oreb le Zeeb tei hum a,
na bawl bangin amuh uktu
bawi tei humah bawl bokin hi.Ref 83:11 Thuk 7:25; 8:12;
Zebah le Zalmunna na neh bangin,
amuh puitute vang
neh bokin hi.
12 Amuhte in, “Pathian i ngam cu,
keimu ngamah cangtik tuk ung,”
13 Maw Topa cangvaite
huih i muhvawk bangin le
leivul bangin lengkektik khawng hi.
14 Tupite a kangtik thei
mei bangin hihen,
mualte a kangtik thei mei alh lek
bangin hihen.
15 Amuhte cu na huihpi in
hawlvawk inna,
a lauhuaimi na huihpi in,
a thin haw sutikin hi.
16 Maw Topa aw,
amuh ten na huham
a theihnak haw tukin,
a mai haw cu zahcaknak tuah
dimtikin hi.
17 Ngal sung lelengmi
hi haw henna,
kumkhua in, a thinsu haw tahen,
Mualpho zetin thi haw hen,
18 Lei buppi uktu Topa cu
nangmah bek hi ci,
tih thei haw hen hi.