SAAM LABU 80
Israel Tei Kihlehnak Tuk Thunget
1 Maw Israel tuucing, ngai hemin;
Maw tuuhon hotu bangin
Josef a puitu thei hemin!Ref 80:1 Suah 25:22;
Cherubim hum kumpi khunnakah
a khungtu aw,
2 Na itnak cu Efraim, Benjamin le
Manasseh phun tei nelah
phuanglangdun zal inna, na ngilnak
kohte lakin, pan zazalin hi.
3 Topa aw, kohte
tungdingleh zalin hi.
Na hehpihnak lak inna,
himnak ngah tuk ung hi.
4 Topa aw,
Cungnungbel Pathian,
I can tian him na mihing tei
thungetnak humah
na thin na uk hih tuk?
5 Ka eih tukin thasiatnak pia ci.
Ka in tukin hitui khuathai ngengpi
a dimin pia ci.
6 Ka elkim uh a hinnam dangte cu
ka ngam uh la nuamin,
ka ngamsung uhah dodun haw hi.
ka ngal uhten cekpan bawlnakin
mang haw hi.
7 Maw Cungnungbel Pathian
kohte tungdingleh zalin hi.
Mitmaipha langtik inna,
nunpatnak ngah tuk ung hi.
8 Izipt ngam pen sabit kung
pa khat keng ci,
Miphun dang hempoh
na hawlvawk ceng ten,
Amu ngam sungah
mah sabit kung cu phut ci.
9 A khantoh theihnak tukin
a lei bung ci;
Lei thukpi ah a zungte mutsukin
ngam hempoh khuh khawng hi.
10 Mualte cu a lim nuai ah um haw in;
Sidar thing ngengpi vang
kangkak ten khuh haw hi!
11 Mah sabit kangkak cu zaamin,
Mediterranean tuipi tian hengin
Eufrates tuipi tian zaam hi.
12 A kawnin upmi sente cu
ita phialet haw him?
A el a hawh hempoh ten
a ngah ngu thei haw hi.
13 Ngaalcangin, siatsuah khawng a,
hampa lak ngamsa ten ei haw hi.
14 Cungnungbel Pathian,
keimu lamah hek kiklehin,
vancung pen zo inna,
mu zal inna, hung inna,
nami tei nunpan zalin!
15 Hungin hi nangmah loli i phutmi
sabit, phazet tukin
na bawlmi sabit tawtsemnote panin hi.
16 Ka ngal uhten mah sabit cu
sattanin mei ah haal haw hi.
Na thinukin, a sat tantute zo inna,
siatsuahin hi.
17 Na tensa mi na mihingte hupin,
ngil zetin, na bawl zo mi
na miphun cu!
18 Na nel pen pialleh hihim tukma
toh ung hi.
Nungtik inna, pahcawi tuk ung hi.
19 Topa aw, Cungnungbel Pathian,
kiklehtik zalin hi.
Na mitmai pha lak inna,
nunpatnak ngah tuk ung hi.