SAAM LABU 66
Thangphatnak le Lungdamnak La
1 Leihum mite,
Pathian thangphatin
lungdam zetin au un.
2 Ama min sunloihnak lasa un,
sunglawi zetin
a lakah pahcoihnak pia un!
3 Pathian nelah,
“Na thil bawl mite
thasiahhuai daan hi!
Na huham a nasezet tak,
na ngalte cawmin lau in,
na mai ah bok haw hi.
4 Leihum mi hempohin,
na mai ah kuunin bia haw hi.
Thangphatnak lasa haw hi.
Na min pahcoihnak lasa ung,” tin
Pathian nelah ti un!
5 Pathian i bawlmi hi zo hem un!
Mihing tei lak a bawlmi
thasiahhuai hi!
6 Tuipi leiko in, a suahtik bangin,
a pu le pa uhten
tuipi sung pen leiko tawnin
tan haw hi.
Mahti bangin a bawl hangin
a humah a lung uh dam hi.Ref 66:6 Suah 14:21; Josh 3:14-17;
7 A ngilnak tuah kumkhua uk lelengin,
a mit tuah miphunte cu
zo leleng hi.
Iti bang ngal hei in amah dodalin,
tho haw pahsuh hen.
8 Miphun hempoh, a Pathian uh
thangphat un!
Na thangphatnak uh cu
thang khawng hen!
9 Aman nungcatik zo a,
bah tuk phal ma hi.
10 Pathian aw, kohte cu
khingkhai zo ci.
Ngun cu somei tuah
a khingkhai haw bangin,
kohte vang khingkhai zo hi.
11 Thang a siah haw mi sungah
caaktikin
ka ngum uhah thil ngitzet koih ci.
12 Ka ngal tei sihpekmi in bawl ci.
Meipi le tuilun lakah hawh ung.
Mahnaven atu-in himnak munah
henpih zo ci.
13 Na innah meihal biaknakte
cawi tung.
Ka tepsa mi cu pia tung hi.
14 Haksatnak ka tawh laihin,
ka thutepmi cu kimtik tung hi.
15 Biaklandawh humah
halkang biaknak tuk tuu pia tung hi.
Khuicang le keelcangte
biakpiaknakah pia tung hi.
16 Pathian a upattute,
hung unna, ngai un;
A ca in, a na bawl mite hilh tung hi.
17 A lakah bopnak ngenin au ing.
La in thangphat ing.
18 Ka sualnak hi imah kinmawh ngawlin
ka um ahin,
Topa in ka thungetnak
ngai tukma hi.
19 Mahnaven Pathian in thei zo hi.
Ka thungetnak ngai zo hi.
20 Ka thungetnak lawlthong ngawlin
a ihnak vang ka lak pen
a lak kikleh ngawl hangin
Pathian cu thangphat ing.