SAAM LABU 63
Pathian Ngai Ingnote 63 Thulu 1Sam 23:14;
1 Maw Pathian aw, nang cu
ka Pathian hi ci.
Nangmah ngai ing.
Ka nunnak hempohin
nangmah ngai hi.
Tui um ngawlnak leiko in,
tui a kin bangin ka nunnakin
nangmah kin hi.
2 Mun thiangtho pen
nangmah tawk ing,
Na ngil daan le na sunloihdan
mu zo ing.
3 Na ihnak cu nunnak sangin
sunglawi saw hi.
Mah hangin nangmah
thangphat tung hi.
4 Ka nundam sung hempoh ah
na lakah lungdam thuhilhnak cu
cawl awng tuk mang.
Ka baan zakin, na lakah
thungen tung.
5 Ka hawvang cu an uk ei bangin
taizet tuk hi.
Lungdamin nangmah
thangphatnak lasa tung hi.
6 Zaunak humah ka zau ten
nang cu thei ing.
Zankhua in nangmah ngaisung ing.
7 Itahim titale nang cu
keimah bawmtu leleng ci.
Na ha lim nuai pen
lungdamnak lasa ing.
8 Ka nunnakin nangmah zuanin
na taklam khutin himtik ci.
9 Keimah thah a tumtute cu
mithi khua ah heng haw tuk hi.
10 Ngal donakah thi haw tuk a,
a luang haw cu cingne ten
ei haw tuk hi.
11 Pathian nangmah hangin
kumpi cu lungdam tuk hi.
Pathian minin thutepnak
a bawltute cu a lungdam tuk hi.
Mahnaven zolthu sontu tei
kam cu hup tuk hi.