SAAM LABU 55
Bopnak Tuk Thunget
1 Maw Pathian aw,
ka thungetnak hi ngai zalin;
ka ngetnak hi nunghek
zal pahsun.
2 Ngai inna, don zalin hi.
Ka lauthawngnak hangin cawl zo ing.
3 Ka ngal ten a thup haw hangin le
mipha ngawl ten a zotsak
haw hangin amthong ing.
Haksatnak ka humah hengtik haw.
Ka humah a thin haw ukin
4 Launak tuah ka lungmu cu dimin,
thih tuk lauthawngnakin
ka hum pen delh hi.
5 Lauthawngnakin keimah delhcih a,
mulcangsuakin can tawtok ing.
6 Aw, khulo bangin ha ka nei ahin
nuam sing!
Leeng tung a, colhnak mu tung hi.
7 Khawlapi ah leng tung a,
ngamkhing munah umnak inn sa tung.
8 Huihsia le nguah thuak tuk ngawlin
manlang zetin buknak zei tung.
9 Topa aw, ka ngalte
a lung haw siltik inna,
a awn haw pahpaltik khawngin hi.
Itahim titale khuapi sungah
sualdunnak le,
hauhdunnak bek mu ing.
10 A sun a zanin khuapi kulhtian
hum pen khuapi cu
kil haw in, khuapi cu hauhdunnak le
liamsuah dunnak tuah dim hi.
11 Mun hempoh siatsuahnak bek um a,
Khuasung lampite cu
siatsuahnak le
zoldunnak tuah bekin dim hi.
12 Kei zawnsaktu cu ka ngal ahi ahin,
thuak thei leng tung.
Ka humah a tuangkhawngtu cu
ka ngal ahi ahin,
a lak pen ngelhsan tung.
13 Mahnaven tu a ka ngal cu
ka theih mi nangmah,
ka nadehpih le ka ngualcam hi ci.
14 Nop zetin thu hilhdun hung a,
biakinn ah mipite tuah
hawh langkhat mek hung hi.
15 A hun haw a heng laih ngawlin
ngalte cu thi haw hen,
thihnak ngamah a nungcungin
heng haw hen,
A innkua sung hawah le
a lungmu sung hawah,
phat ngawlnak nguakcangin dim hen.
16 Bopnak ngenin
Topa Pathian sam ing.
Aman pan tuk hi.
17 Na phuk lihnak le
ka taunak cu a lakah,
Zing, sun le zanin hengin,
ka aw cu za tuk hi.
18 Ngal tampi ka donak mun pen
himdamno in kihpih tuk hi.
19 Kumkhua in uktu bawi
ahi lelengmi Pathian in
ka aunak za tuk a,
ka ngalte cu neh tuk hi.
Amuh ten imah bawl thei haw tukma
itahim titale amah kihcaknak
nei haw ma hi.
20 Masa laih a, ka ngualcam awng ten
a ngualcamte do hi.
A thutepsate siatsuah
khawng hi;
21 A kam cu sathau sangin naal saw hi;
Mahnaven a lungmu sungah
huatnak dim hi,
A awnkam cu sathau sangin naal saw hi;
Mahnaven ngalnam bangin
mi at thei hi.
22 Na van ngit uh cu Topa i lakah
ap unna, na tha uh damtik tuk hi.
Midik cu ituk mahten sungtik tukma hi.
23 Mahnaven maw Pathian aw,
nangin mithat tute le
zolthu sontute cu a khan haw
thanthep laih ngawlin
khuk thukzet sungah khiasuk tuk ci.
Kei cu nangmah bek muang ing.