SAAM LABU 52
Pathian Thukhennak le Hehpihnak
1 Maw mi ngilpa, itakaw
na ngitlohnakte, na ultun pih lih?
Pathian muantak a hihnak cu
kho leleng hi.
2 Nang in, midang siatsuah tuk
ngaisung ci;
Na lei cu sam mehnak
naam bangin hiam hi.
Catngawlin zolthu son leleng ci.
3 A pha mi sangin a sia mi deih saw ci.
Thutak sangin thuman ngawl zui saw ci.
4 Maw zolthu son pa,
na awnkam tuah
Midang thasiatik tuk cu nopsazet ci.
5 Mah hangin, Pathian in
kumkhua in siatsuah tuk hi,
Na umnak inn pen
dokvawk tuk hi.
Mihing tei umnak ngam pen
vawk tuk hi.
6 Mahmi cu midik ten
amuh haw ten lau haw tuk hi.
Nuihsan haw tuk a,
7 “Himnak deihin
Pathian muang ngawlin
ama letnak saw a muangtu zo un.
Phatngawlnak tuah lungmuannak
a zeitu pa hi,” tin ti haw tuk hi.
8 Mahnaven kei cu
Pathian inn el a po mi
olif thingkung bang ing.
A kho mi a ihnak cu
kumkhua in muang ing.
9 Maw Pathian aw, na thil bawlsa hangin
pahcawi leleng tung.
Na mihing tei mai ah
na phat daan cu aupih leleng tung.