SAAM LABU 5
Humhimnak Tuk Thungetnak
1 Topa aw, ka otmi hi
ngai zal inna, ka taunak hi
za zalin hi.
2 Ka Kumpi le ka Pathian,
bopnak ngenin ka aunak hi,
Maw Topa aw,
na lakah thungen ing.
3 Zingsialin ka thungetnak cu za ci,
ni a suah ten ka thu le late
na lakah hen ing a;
na don tuk ngakin um ing.
4 Sual bawlnakah a lungdamtu
Pathian hi ma ci;
phat ngawlnak cu na lakah
umtik ma ci.
5 Mi ultungte cu mu thei ngawlin;
mipha ngawl hempoh cu hua ci.
6 Zolthu sontu hempoh cu
siatsuahin, thisan suah nuamtu le
mizol theite cu ningdelh ci.
7 Mahnaven a kho mi
na itnak a nase leita hangin,
kei cu na inn sungah tum tung.
Na Biakinn thiangtho sungah
nang bia tung a,
kihcaknak tuah na mai ah
kun tung hi.
8 Topa, ka ngalte
tamzet haw ven!
Na deihmi bawl tukin kei hu pui in;
ka zui theihnak tukin
9 Ka ngal tei awnkam cu
muantak viang ma; mi siatsuah
tuk bek nuam haw hi.Ref 5:9 Rom 3:13;
A kam haw cu khan kong honmi
bangin a lei haw cu nal zetin
mizol thiam ngangai haw hi.
10 Maw Pathian aw, amuhte cu
lawl inna, bawlsia in hi.
Thusia a vaikup haw cu amuh tei
siatlalnakah cangtikin,
a sualnak haw a tam hangin le
nang a langpang haw hangin,
na umnak pen vawktulin hi.
11 Na lak a, himnak a tawktu cu
a lung haw dam tuk; lungdamin
lasa leleng haw tuk hi.
Nangmah a ittute cu hupin;
nangmah hangin amuhte cu
mi lungdam ngangai mite haw hi.
12 Topa aw, na thu
a ngaitu cu muicu pia inna,
na hehpihnak tuah amuhte cu,
lumphaw bangin hup ci.