SAAM LABU 34
Pathian i Phatnak Pahcoihnak
1 Topa i humah
ka lungdam leleng tung.
Amah thangphat cu cawl awng tuk mang.
2 A thil bawlmi hangin amah cu
thangphat tung.
A cim a kham ten thei unna,
na lung uh dam un.
3 Topa i thawmngeng dan cu
pahcoih pih unna,
ama min cu thangphat ten nung.
4 Topa i lakah thungen ing a,
amah in donleh hi.
Ka launak hempoh sung pen
luattik hi.
5 Mi cimkham ten amah cu zo in,
a lung haw dam hi.
Itik hei ten zakca haw
tukma toh hi.
6 Bawmtu nei ngawl ten
amah sam haw in aman donleh hi.
A haksatnak hempoh haw pen
luattik hi.
7 Topa a kihcatute cu
a vancungmi ten cing haw in,
Thinsuk launak pen amuhte cu pan hi.
8 Topa i phat daan cu
nangmuhno tep ten un;
A lakah himnak a ngahtu cu
mi muicu haw hi.Ref 34:8 1Pet 2:3;
9 Ama mihing ten Topa cu kihca un.
Amah a kihcatu cu
tingsam awng haw tukma hi.
10 Kiosa hei ngilkialin um mek hi.
Mahnaven Topa i deihnak
a zuitu cu, thilpha tingsam
11 Hung un, khangnote, ngai hem un,
Topa kihcakdan hilh nang.
12 Leihumah nop zetin nung nuam uh cim?Ref 34:12-16 1Pet 3:10-12;
Khansau le lungdam nuam uh cim?
13 Na nuam uh ahi tale, a pha ngawlmi
awn tuk ngawlin le zolthu
son tuk ngawlin ngalling un.
14 Thilpha ngawl cu pial unna,
a pha mi bawl un.
Lemdaihnak tumtah unna,
a ngah thei tukin zuam un.
15 Topa in midikcangte cu
zo leleng hi, a aunak aw vang ngai hi.
16 Mahnaven mipha ngawlte cu
leihum pen, a min haw tian
paithong tukin phiatvawk hi.
17 Midik ten Topa cu
samin, a aw haw thei hi;
A haksatnak haw hempoh pen
luattik hi.
18 Topa cu thinnau tei elah umin,
muansannak a nei ngawl toh tei
nunpan hi.
19 Mipha in haksatnak tampi thuak mek hi;
Mahnaven Topa in
mahmi hempoh sung pen suah hi.
20 Topa i amuh tei nguhte
pha zetin cingin a nguh pa khat hei
ek ma hi;Ref 34:20 Jn 19:36;
21 Mipha ngawl cu phat ngawlnakin
that tuk hi;
Midik a huatute cu bawlsiatnak
tawk haw tuk hi.
22 Topa in, a silate cu tan tuk hi;
amah belnuamin, a lakah
a zuantute cu himdam haw tuk hi.