SAAM LABU 22
Vansannak le Thangphatnak La
1 Ka Pathian, ka Pathian,
Ita kei zamsan cim?
Bopnak ngenin ka au lih laihtakin,
ita khawlapi ah um cim?Ref 22:1 Mt 27:46; Mk 15:34;
2 Maw ka Pathian, sunlamin nangmah
sam naveng don ma ci.
Zanlam vangin au li naveng,
colhdamnak ngah cuang mang.
3 Mahnaven nang cu Thiangtho in,
kumpi khunnak humah khung ci;
Israel tei la tuah a thangphat
haw mi hi ci.
4 Ka pu pa ten nang cu muang haw hi.
Nang cu muang haw in,
a muhte cu pan ci.
5 Nangmah sam haw in, thinsuk
linglawngnak pen luat haw hi;
Nang cu muang haw in mualpho
haw ma hi.
6 Mahnaven kei cu mihing
hi lehma toh ing, tenghol poh ing.
Mi hempoh tei zotsakmi le
nuihcipmi ing.
7 Kei a mutu hempohin cekpan
bawlnak mang haw hi.
A Lei haw siakin, a mitphen haw hi.Ref 22:7 Mt 27:39; Mk 15:29; Lk 23:35;
8 “ Topa muang sisi;
ita nang pan ngawl kaw?
Topa in nang a deih tale
itakaw a bop ngawl?” tin ti haw hi.Ref 22:8 Mt 27:43;
9 Ka nui pum sung pen damno
a hingtiktu cu nangmah hi ci;
Ka nui nawitui ka inlaih hei in hi.
Himdamno in, a cingkhawitu cu
nangmah hi ci.
10 Ka suah bek ten nangmah muang ing;
Ka suah pepan nangmah cu
ka Pathian hi ci.
11 Ka lak pen tai pahsun;
haksatnak ka elah heng,
kuamah bawmtu nei mang hi.
12 Ngal tampi ten khuicang bangin
kei kilin, ka elah um khawng haw hi.
Bashan ngam a khuicang hang
bang haw hi.
13 Kiosa bangin a kamka haw,
thumin, botkek tum haw hi.
14 Ka tha bo hi.
Leiko hum a tui caak bangin,
ka tha nem dikdek hi.
Ka lungmu cu mei el a,
khuainun bangin, ka sungah
zung khawng hi.
15 Ka dang cu beellei bangin ko in,
ka lei cu ka dangah kopto hi.
Nangin, a thi zo heng sa in,
leivul lakah zamthong ci.
16 Uicote cu ka elah um haw hi.
Mipha ngawl ten kei kilcih haw in,
ka khut le ka kete sun let
khawng haw hi.
17 Ka nguhte lang khawng hi,
ka ngal ten zo in, angzet haw hi.
18 Ka puansilhte semdunin,
ka angki cual ngah tukin
aisan haw hi.Ref 22:18 Mt 27:35; Mk 15:24; Lk 23:34; Jn 19:24;
19 Topa aw, ka lak pen
hu tai zal pahsun!
Kei pantu manlangin hung inna,
kei hu bawmin hi.
20 Ngalnam lak pen kei pan inna,
ka nunnak cu hi uico tei lak pen
hei hup zalin hi.
21 Hi kiosa tei kam sung pen
kei hu suahin;
a hang zetmi khuicang tei ki pen,
pan tul zo ci.
22 Na bawlmi hempoh hi
ka hinnam tei lakah hilh tung;
A khawpdunnak haw pen
nang thangphat tung.Ref 22:22 Heb 2:12;
23 “ Topa i silate,
amah cu thangphat un!
Jakob i casuante, amah cu upat un!
Israel miphunte, amah cu bia un!
24 Mi ca-ngahte zamthong ngawlin,
mi haksa tei thuaknakte
zamsan thong ma hi.
Mahnaven bopnak ngenin,
a au haw ten, don mek hi,”
tin ti tung.
25 Na thil bawlmi hangin, a khawmnak
mun haw pen nang thangphat tung.
Biakpiaknak pia tukin ka tepsa bangin,
nangmah a kihcatu tei mai ah
pia tung hi.
26 Mi ca-ngah ten a deihzahin
ei haw tuk hi;
Topa i lakah a hungmi ten
amah cu thangphat haw hi.
Lungdam thatui in um leleng haw tahen.
27 Minam hempoh ten, Topa cu
theileh haw tuk a, vanhaang nuai
hempoh ten a lakah kik haw tuk hi.
Miphun hempoh le
hinnam hempoh ten
amah bia haw tuk hi.
28 Topa cu kumpi hi in,
minam hempoh uk hi.
29 Mi ultung tuangkhawng le
mihaute a mai ah bok haw tuk hi.
A thi thei mi mihing hempoh le
mahno in, a nungleh duntik
thei ngawlte cu a mai ah
kun haw tuk hi.
30 A casuan haw ten,
Topa i na dek haw tuk hi.
A heng tukmi khang hei ah,
Topa i thu cu hilh haw tuk hi.
31 “A piang tuk laihmi tei lakah,
Topa in, a mihingte pan hi,”
tin hilh haw tuk hi.