SAAM LABU 21
Nehnak Hangin Thangphatnak
1 Topa aw, kumpi cu
ngilnak na piak hangin,
a lungdam hi.
2 Nehtu na hihtik hangin
lungdamnak tuah dimin,
a lungtupmi pia in;
A ngetmi hempoh el ma ci.
3 A lakah muicu a phunkim tuah
hung ci.
A lu humah sui lukhu hei khutik ci.
4 Nunnak a ngetmi cu na piak bek
sialngawl a bo thei ngawl
kumkhua nunnak pia zo ci.
5 Na bopnak bangin
a sunloihnak cu ngeng hi.
Hauhsaknak le minthannak pia ci.
6 Na muicu cu a humah
kumkhua in kho hi.
Na umpih hangin lungdamnak tuah
dim hi.
7 Kumpi in Cungnungbel Topa cu muang hi.
A kheel awng ngawl mi
Topa i itnak hangin,
amuh cu el theih ngawlin
kumpi hi haw tuk hi.
8 Na ngal hempoh na khut tha
ngilnak tuah man tuk ci;
Nang a huatu hempoh cu
man khawng tuk ci.
9 Na henleh ten amuhte cu,
pumsuknak meiling bangin
haal khawng tuk ci.
Topa in, a thinukin,
siatsuah khawng tuk a,
mei tuah kangtum khawng tuk hi.
10 Kumpi in, a cano haw cu
cimittik tuk a, a casuan haw vang
siatsuah khawng tuk hi.
11 Thil pha ngawl ngaisungin,
a suam haw hei in
pitung haw tukma hi.
12 A thalcang tuah kap tuk a,
taivawk khawng haw tuk hi.
13 Topa aw, na ngilnak hi
cawisanin um hen na,
na thil tihtheihnak cu
la tuah thangphat tuk ung.