SAAM LABU 119
Topa i Daan
1 A nunnakah sonsiatnak a um ngawlmi le
Topa i daan bangin
a nungtute cu mi muicute haw hi.
2 A lungmu venghawng tuah
Topa i thu a ngaitu le
a thupiakmite a zuitu cu
mi muicute haw hi.
3 Hihi, thil sual i mah bawl ngawlin,
Topa i lampi ah hawh haw hi.
4 Na daante cu pia zo ci a,
cangkim zetin zui thei leng nuam sing!
5 Topa na thupiakte
pa khatno hei pelh ngawlin,
zui tuk cu ka tupbelmi hi.
6 Na thukhamte zui tukin
ka zuamzet tale zakca in
um tuk mang!
7 Lungthiangin nang thangphat tung.
Na thukhennak dikzia ka theih hangin
8 Na daante cu zui tung hi,
kei hawhsan zal pahsun.
Topa i Daan Zui Theihnak
9 Itin kaw khangno in ziaza thiangtho
a neih theih tuk?
Na thupiakmi zuinak bek tuah
nei thei tuk hi.
10 Ka lungmu venghawngin
nangma na dek tukin pia ing.
Na thupiakte palcat tuk ngawlin
kei cingkhawi in hi.
11 Na humah ka sual ngawlnak tukin,
ka lungmu sungah na daan cu
koih zo ing.
12 Topa aw, nang thangphat ing;
Na daante hilh zalin hi.
13 Na thukham piakmite cu
nging zetin lo leleng tung.
14 Sumpai tampi neih sangin,
na thupiakmi zui cu nop ti saw ing.
15 Na thu hilhhawlnak cu
cung tung.
Na thuzilhmite pha zetin
ngaisung tung.
16 Na daan piakmi ah lungdamnak nei ing.
Na thupiakmite cu phawkngil tuk mang.
Topa i Daan Ah Lungdamnak
17 Lungdamin, na thu
ka zui theihnak tukin,
kei na sila humah pha zalin hi.
18 Na daan sungah thasiahhuai thudik
ka muh theihnak tukin,
ka mit cu vaktik zalin hi.
19 Leihumah ngei ngawlno sung bek um ing.
Ka lak pen na thukham cu
sel zal pahsun.
20 Na thukhennak ka theih nuam hangin,
ngakhelin ka lungmu na leleng hi.
21 Mi pualthaute cu liat ci,
na thupiakmi a palcattute cu
tamsiat co haw hi.
22 Na thukhamte ka zui zo toh hangin
ka hum a,
zotsaknak le thangsiatnak;
a neihmi haw pen luattikin hi.
23 Hotute tawkdun khawmin,
a suam li haw hei in,
kei na sila in, na daan cu
cung leleng tung.
24 Na thuzilh mite cu lungdamnak
piatu hi in, ngaihsutnak pha
pia tuk hi.
Topa i Daan Zui Nuamnak
25 Ka sun hangin leivul bual ing.
Na thutepsa bangin
ka tha umlehtik zalin hi.
26 Ka bawlmi hempoh phuang ing
a nangin thei ci;
Na thupiakmite zilh zalin hi.
27 Na daan zui thei tukin zilh inna,
na thuzilhmi thasiahhuai cu
cung tung hi.
28 Ka thasia leita a hih ten,
na thutepsa bangin
tha neitikleh zalin hi.
29 Lampeng ka zui tuk ngawlnakin
cingkhawi in;
na phat hangin na daan cu zilhin hi.
30 Na thu zuitu hi tukin ngaisung
cat zo ing;
Na thukhamte ka mai ah koih zo ing.
31 Topa aw, na thuzilh mite cu
zui zo ing;
Mualpho in koih zal pahsun.
32 Nangmah in theihtupnak
na piak tuk hangin,
na thupiakmi cu thatho zetin zui tung.
Theihtupnak Tuk Thungetnak
33 Topa aw, na thupiakmi
a sullam hilh inna,
Ituk hei ten zui leleng tung.
34 Na daante cu ciangno in zilh inna,
zui tung hi.
Ka lungmu venghawngin zui tung hi.
35 Na thukham i lampi ah pui in;
itahim titale mahlai ah
lungdamnak ngah ing.
36 Hauhnak sangin na thupiakmi
a zui nuamtu hi sawtikin hi.
37 Imah ngawlmi a zei litu
ka hih tuk uh ngawlnakin,
cingkhawi zalin hi.
Na thutepsa bangin
ka humah pha zalin hi.
38 Nangmah a kihcatu tei lak
a na thutepnak cu,
kei na sila lakah kimtikin hi.
39 Ka lauzet mi nautatnak pen
luattik zalin;
na thupiakmite cu thasiahhuai hi.
40 Na thukhamte cu sunsak ing.
A dikmi na hih hangin
nungtik zalin hi.
Topa i Daan Thukham Muannak
41 Topa aw, kei na ihnak
a ngeng dan cu langtik zal inna,
na thutepsa bangin kei pan zalin hi.
42 Kei a nautattute cu don thei tung.
Itahim titale na awnkam cu
muang ing.
43 A man mi na thu a phuang ngamtu
hitikin; itahim titale
na thukhennak cu ka muansan mi hi.
44 Na daante cu kumkhua,
catngawlin zui leleng tung.
45 Na thupiakmite ka zui hangin,
a cangkimmi zalennak sungah
nung tung hi.
46 Na thupiakmi cu kumpi tei lakah
than tung,
zahcak pih tuk mang.
47 Ka lungsi zetmi na thukhamte zui cu,
ka lungdamnak hi.
48 Na thukhamte cu, ka sunsakmi le
ka deihmite hi.
Na thupiakmite cu ka thin le
lung tuah cung tung hi.
Topa i Daan Ah Lungkimnak
49 Na sila, keima lak a na thutepmi cu
phawkngil pahsun.
Muansannak neitik zo ci.
50 Ka apthong hunlaih hei in
keimah zemtu hi.
Itahim titale na thutepmi in nunnak pia hi.
51 Mi pualthau ten zawnsak haw.
Mahnaven na daan piakmi pen
pial awng mang.
52 Nunglam a na piakmi na thute cu
cing leleng ing.
Topa aw, ka ca in hehnemtu ci.
53 Mipha ngawl ten na daan
a palcat haw ka muh ten,
ka thinukzet ing.
54 Khual ka zinnak ka innah
na thukhamte cu
ka lasak mite hi.
55 Topa aw, zanlam hei in
nangmah ngaisung ing.
Na daan cu zui zo ing.
56 Na thupiakmi zui cu
ka lungdamnak hi.
Topa i Daan Letkhimnak
57 Topa aw, ka deihmi cu
nangmah bek hi ci.
Na daan zui tukin thutiam zo ing.
58 Ka lungmu ngangai in ngen ing;
na thutepsa bangin,
Ka humah hehpihnak nei zalin hi.
59 Ka nunnak i zui mi lampi cu
ka zo kikleh ten,
na thupiakmi zui tukin thutiam ing.
60 Ka khing ngit ngawlin
na thutiam zui tukin
manlang zetin tho ing.
61 Mipha ngawlte in, a khau haw tuah
khoh zetin ken haw.
Mahnaven na thupiakmi cu
phawk ngil mang.
62 Zanngil ten ka hihbuhnak pen
na thukhen dikmi
thangphat tukin khang ing.
63 Na daan a zuitu le
na nadektu hempoh tei
ngualcampih ing.
64 Topa aw, leihum buppi hi
a kho mi na ihnak tuah dim hi.
Na thukhamte cu kei hu zilh zalin hi.
Topa i Daan A Manneih Dan
65 Topa aw, na thutepmi cu
kimtik ci.
Kei na sila lakah pha ci.
66 Cihnak le thu ngaihsut thiamnak
pia zalin hi.
Itahim titale na thupiakmi
muang zo ing.
67 Daan na tat laih ngawlin
thil sual bawlmek ing.
Mahnaven atu-in, na thu zui ing.
68 Na phatdan le mi na hehpih zia cu,
Na thupiakmite kei zilh zalin hi.
69 Mi ultung ten ka thu cu
zol thu ngehin son haw;
Mahnaven ka lungmu venghawngin,
na daan cu zui ing.
70 Hiti bang mihing ten
theihtupnak nei haw ma hi.
Mahnaven na dan sungah
lungdamnak nei ing.
71 Daan na tatnak cu ka ca in pha hi.
Itahim titale na thupiakmi theitik ci.
72 Kei na piakmi na daan cu leihum buppi
sui le ngun hempoh sangin,
ka ca in sunglawi saw hi.
Topa i Daan A Lamcam Zia
73 Nangmah in semsuahin,
himdamno in cingkhawi ci.
Na daante ka cunnak tukin
ngaihsut thiamnak hu pia zalin hi.
74 Nang a kihcatu ten kei amuh haw ten
lungdam haw tuk hi;
Itahim titale na thutiamnak
muang ing.
75 Topa aw, na thukhennak cu
dikcangzet hi tih cu thei ing;
Muantak na hih hangin dantat ci,
tihvang thei ing.
76 Kei na sila, na tepsa bangin
a khohmi na ihnakin,
kei hehnem zal hen.
77 Kei hehpih inna, nung tung.
Itahim titale na daan sungah
ka lungdam hi.
78 Mi pualthau ten sual a not haw hangin
a zak haw ca hen;
Kei in ka lungmu sungah na daante cu
ngaisung pha tung.
79 Na thupiakmi a theitu le,
nang a kihcatute cu
ka lakah hung haw hen.
80 Zakca mualpho in
ka um bok tuk ngawlnakin,
Na thutep cu cangkim zetin
zui thei zal nang ngei!
Suahcaknak Ca Thungetnak
81 Topa aw, na patnak
ka ngahnak hangin tamsawl zo ing.
Na thu cu muang sih bok ing.
82 Na thutepmi zohnakin
ka mit cawl khawng zo.
“Ituk ten kaw na bop tuk?” tin
dong ngawlin um thei sih mang.
83 A vawksa haw mi sabit thawl bangin,
nemcuam ngawlmi ing.
Mahnaven na thupiakmi cu
phawkngil ma laih ing.
84 Itik tian kaw ka ngah hih tuk?
Kei a bawlsiatute hi
ituk ten kaw na bawlsiat bok tuk?
85 Na daan a zui ngawltu mi ultung ten,
keimah awk tukin
khuk tampi co haw hi.
86 Na thupiakte cu muantakzet ngeh hi.
Mi ultungte ten zolthu ngeh tuah
bawlsia li haw.
Kei hu bawm zalin hi.
87 Atu-in that thei awndiak haw toh hi.
Mahnaven na thupiakmite cu
zulzaupih mang.
88 A kho mi na ihnak hangin
ka humah pha zalin hi.
na daante cu zui thei tung.
Topa i Daan Upnak
89 Topa aw, na thu cu
kumkhua in kho tuk hi.
Vancung pen a kho zo mi thu hi.
90 Muantak na hihnak cu
khang tawntungin kipkho hi;
Leipi cu nangmah in koih ci,
na koihnak bangin kho hi.
91 Ihempoh hi na sila hi.
Mah hangin na thupiaknak bangin
tuni tian kho hi.
92 Na daante hi ka lungdam lelengnak
ahi ngawl ahin,
ka nuncimnak hangin thi zo tuk toh ing.
93 Na thupiakmite cu zulzaupih tuk mang.
Mah mite cu mangin
keimah nunnak pia ci.
94 Kei cu nangmata ing.
Kei hu pan zalin hi.
Na thupiakmi zui tuk bek hi
ka tuptah mi hi.
95 Mipha ngawl ten that tukin
pang haw.
Mahnaven na daan cu
ka lungmu sungah vong tung.
96 A cangkim mi imah umma,
tih thei zo ing;
Mahnaven na thukham cu
tawpnak nei ma hi.
Topa i Daan Deih Awh
97 Aw, na daante ka deih dan cu!
Thalengin mahbek ngaisung ing!
98 Na thukham cu ka lakah caam leleng hi;
Ka ngal hempoh sangin
kei ciptik deuh ci.
99 Keimah a zilhtu hempoh sangin
thei saw ing;
Na thuzilh mite ka ngaihsut hangin hi.
100 Putekte sangin cip deuh ing;
Na thupiakmi ka zui hangin hi.
101 Ziaza pha ngawl cu pial zo ing;
Na thuzui ka nuam hangin hi.
102 Na thuzilh mite zulzaupih mang;
A zilhtu nangmah na hih hangin hi.
103 Na thupiakmite a hum daan cu!
Khuaihum sangin hum saw.
104 Na thukham pen cihnak ngah ing hi;
Nuncan pha ngawl hempoh hua ing.
Topa i Daan Pen Vaknak
105 Na thu cu keimah lampuitu
mei inn hi a,
ka lampi ca in vaaknak hi.
106 Thu ka tep zo bangin, a dikmi
na thuzilhnak cu zui tung.
107 Topa aw, Ka thuakdan hi
na sia leita hi;
Ka hum a na tepsa zo bangin
kei hu nungtik zalin hi.
108 Topa aw,
ka lungdam thungetnak cu
sang zal inna;
Na thupiakmi cu zilh zalin hi.
109 A kul ahi tale ka nunnak pia tukin
mansa ing;
Na daante phawkngil mang hi.
110 Mipha ngawl ten
keimah thangsiah haw;
Mahnaven na thupiakmite cu
palcat ma laih ing.
111 Na thupiak cu kumkhua in
keima ta hi haw hi;
Ka lungmu noptiktu haw hi.
112 Na thupiakmite cu ka thih ni tianin;
zui tukin ngaisung zo ing.
Topa i Daan Ah Himnak
113 Na lakah lungmu ngai nei ngawlte cu
mitkem ing;
Mahnaven na daan cu deih ing.
114 Nang cu ka belhnak le ka lumphol ci.
Na thutepmi ah muansannak nei ing.
115 Maw misual, ka nel pen tai un;
Ka Pathian i thukham cu zui tung.
116 A tepsa bangin, thazaang pia inna,
nung tung;
Ka muansanmi ah ka thasiatik pahsun.
117 Phong inna, him tung;
na thupiakmite cu ngai leleng tung.
118 Na daan a palcattute cu lawl ci;
A mizol thiamnak haw cu
phukthong hi!
119 Mipha ngawlte cu buak bangin
ngaisung ci;
Mah hangin na thuzilhnak cu deih ing.
120 Nangmah hangin ka thinsu;
Na thukhennak hangin
can tawtok ing.
Topa i Daan Zui Theihnak
121 A manmi le a pha mi cu
bawl zo ing;
Ka ngal tei khut sungah
kei zamthong pahsun.
122 Bawm tung hi tin na sila
kei lakah tiamin;
Mi pualthau ten kei nuncimtik
haw pahsuh hen.
123 Na nunpatnak ka zohnakin
ka mit kha khawng zo!
Na tepsa mi luatnak ka zohnakin!
124 A kho mi na itnak tuah zo in,
na thupiakmite zilhin hi.
125 Kei hi na sila ing hi a,
na thuzilhmi ka theihzawhnak tukin
theihtupnak hu pia in hi.
126 Topa aw, na nadeh hun zo.
Mihing ten na daan cu
palcat pepel haw!
127 Na thukham cu sui le
leihum sui phabel sangin pha saw hi.
128 Mah hangin na thuzilhmi hempoh cu
zui ing a,
lampi man ngawlte cu hua ing.
Topa i Daan Zui Nuamnak
129 Na thuzilh mite cu thasiahhuai hi;
Mah hangin ka lungmu
venghawngin zui ing.
130 Na thu hilhciangmi in vaknak pia hi;
Mi lungsil tei lakah cihnak pia hi.
131 Na thupiakmite ka deih leita hangin;
Ka kamka in, ka hai hawh mang.
132 Nangmah a ittute na hehpih bangin;
Ka lam hek inna, hehpih zalin hi.
133 Na tepsa bangin kei bahtik zal pahsun;
Phatngawlnak i uk tuk cu
phal zal pahsun.
134 Keimah a nemsuktu tei khut pen
hup inna,
na thupiakmi cu zui tung.
135 Na mitmai pha cu ka humah,
ni bangin suaktik inna,
na daante zilh zalin hi.
136 Ka hitui tui bangin luang;
Mihingin, na daan
a zui haw ngawl hangin hi.
Topa i Daan A Dik Zia
137 Topa aw, nang cu
a dikcangmi hi ci;
Na thupiakmite vang lamcamzet hi.
138 Na thuzilh mite cu celin,
phazet haw hi.
139 Na mihing ten na thukham
a poisak haw ngawl hangin,
na thinuknak cu meiling bangin
sa liklek hi.
140 Na thukham cu itik zahin
muantak him!
Na sila in itih zahin kaw ka deih!
141 Mi nau tale nautatmi hi naveng;
Na thupiakmite cu
zulzaupih mang.
142 Na diknak cu kumkhua in kho hi.
Na daante cu dikcang leleng hi.
143 Haksatnak le lungapnak tuah dim ing;
Mahnaven na thukhamin
nun nopnak pia hi.
144 Na thuzilhnak cu kumkhua in,
a manmi hi.
Theihtupnak pia inna, nung tung.
Luatnak Tuk Thungetnak
145 Ka lungmu ngangai tuah sam ing;
Topa aw, don inna,
na thu zui tung.
146 Nangmah cu sam ing;
Hup inna, na daan zui tung.
147 Khua a vak laih ngawlin,
na bopnak ngenin sam ing.
Na thutepnakah muansannak nei ing.
148 Na thuzilh mite ka ngaihsut hangin
Zankhua hihbu ngawlin um ing.
149 Topa aw, na ihnak a kho hangin,
ka thu ngetnak ngai zalin!
Na phatnak hangin ka nunnak
khawih zalin!
150 Mi hehpih nei ngawl
kei a bawlsiatute le
na daan a zui ngawltu ten
neh dedeuh haw hi.
151 Mahnaven maw Topa,
nang cu ka elah um ci;
Na thukham cu kumkhua in kho hi.
152 Na thuzilhmi cu tanglaih cawngin
cung zo ing;
kumkhua ca tukin na piakmi hi.
Patnak Tukin Aunak
153 Ka haksatnak hi zo inna, panin;
Na daan cu zulzaupih awng mang!
154 Pan inna, kei luattik zalin;
Na thutepsa bangin
suahcaknak pia in hi.
155 Mipha ngawlte cu patmi
hi haw tukma;
Na daan a zui awng
haw ngawl hangin hi.
156 Mahnaven Topa aw,
na hehpihnak cu ngeng lawlawl hi.
Na thu bangin pan zalin hi.
157 Ngal le bawlsiatu tampi nei ing;
Mahnaven na daan cu
zui ngawlin um awng mang!
158 Mi zawnsaktute ka muh ten
ka mitkemzet ing;
Na thupiakmite zui awng haw ma!
159 Maw Topa na thuzilhmi
ka deih dan hi zo kekin!
Na mi ihnak hangin kei hup zalin hi.
160 Na daan i a mu ngil cu thutak hi.
Na thukhennak cu dikcangin,
kumkhua in kho hi.
Topa i Daan Sungah Lungmu Piaknak
161 Mingilzet ten a thu um ngawlin
keimah do haw.
Mahnaven ka upat mi cu
na daan bek hi.
162 Na thutepnak hangin
izahin kaw ka lung a dam;
Na manpha khultu bangin hi.
163 Zolthu hempoh cu hua in
ningdelh ing;
Mahnaven na daan cu tha ngai ing.
164 Na lakah nisialin vei salih
lungdamnak thu hilh ing;
Na thukhennak a dikcang hangin hi.
165 Na daan a deihtute cu
humhimnak cangkim ngah haw.
Imah in bahtik thei ma hi.
166 Topa aw, na hup tukin
ngak ing.
Na thupiakmi zui ing.
167 Na daante cu zui ing;
Ka lungmu venghawngin deih ing.
168 Na thupiakmi le na thuzilhte cu
zui ing;
Ka bawlmi hempoh mu khawng ci.
Bopnak Tukin Thungetnak
169 Maw Topa bopnak ngenin,
ka aunak cu na lakah heng zal hen;
Na thutepnak bangin theihtupnak
pia in hi.
170 Ka thungetnak cu na mai ah
heng zal hen;
Na thutepnak bangin kei pan zalin hi.
171 Catngawlin nang thangphat tung;
Na thu na zilh zo hangin hi.
172 Na daan cu la in sa tung;
Na thupiakmite a dik haw hangin hi.
173 Keimah bawm tukin mansa in umin;
Na thukham ka zui hangin hi.
174 Maw Topa na patnak
ka ngaihdan cu!
Na daan sung bekah lungdamnak nei ing!
175 Na nuntik hangin,
nangmah thangphat leleng tung;
Na thuzilhmi in kei hu bawm zal hen.
176 A paimi tuu bangin vakvai ing;
Hung inna, kei na sila hi zei in hi.
Na thupiakmi zulzaupih mang hi.