SAAM LABU 108
Bopnak Tuk Thungetnak
(Saam 57:7-11; 60:5-12;)
1 Maw Pathian aw, ka lungmu venghawngin
nangmah muang ing.
Lasa tung a nangmah thangphat tung.
Maw ka hawvang, khanglo tohin!
2 Ka phaidaak le ka pheveu tho toh un!
Ni cu phong tung hi.
3 Topa aw, miphun tampi tei lak pen
nang pahcawi tung.
Mihing tampi lakah
nangmah cawimawi tung.
4 Na ihnak cu vancung hengin,
muantak na hihnakin van khong hi.
5 Maw Pathian aw, na thawm ngengnak cu
vanah khin langtikin;
Na sunloihnak huham cu
leihum buppi ah langtikin hi.
6 Na ngilnak tuah kohte panin,
na ihmi na mihingte a luatnak haw tukin
ka thungetnak don zalin hi.
7 A mun thiangtho sung pen
Pathian in, “Lungdam zetin
Shekhem cu khen tung;
Sukkoth munlawn cu
ka miphun tei lakah sem tung.
8 Gilead cu kata hi; Manasseh vang kata hi;
Efraim cu ka lukhuh hi;
Judah cu ka bawi thiangkhut hi.
9 Mahnaven Moab cu
ka khut somnak kuangin mang tung a,
Edom ngam cu ka kedam vawknakin
mang tung.
Filistin ka neh hangin au tung,”
10 Maw Pathian aw, kulhtian khuapi ah
akua kaw a hawhpih tuk?
Edom ah kua in kaw kei a pui tuk?
11 Maw Pathian aw,
kei nunghek ngangai zo toh cim?
Ka ngalkap tei lakah tel tukma cim?
12 Ka ngal uhte do bawm zalin;
Itahim titale mihing tei bopnak cu
man nei ma hi.
13 Pathian keimuh tuah a um tale
neh tuk ung.
Ka ngal uhte neh tuk ung hi.