SAAM LABU 102
Haksatnak Thuaktu i Thungetnak
1 Maw Topa ka thu ngetnak
ngai inna, bopnak ngenin
ka aunak cu thei zalin hi.
2 Haksatnak ka tawh ten,
ka lak pen ngelh pahsun.
Keimah thei inna, ka sam ten
manlang zetin donin hi.
3 Ka nunnak cu meikhu bangin pai hi;
Ka taksa cu meikang bangin kang hi.
4 Kei cu vatvawk haw in
hampa bangin thim ing;
An hei ei nap lehma toh ing.
5 Nase zetin tau lawluang ing.
Ka nguh le ka vun bek tang.
6 Phillawn a, nga man vano bang
hi ing hi;
Taisan zo mi khualop a,
simbu bang ing.
7 Hihbu thei ngawlin hak ing;
Innkuul hum a vano lungleng bang ing.
8 Thalengin ka ngal ten kei zawnsak haw;
Cekpan bawlnakin kei a mangtu ten
ka min cu mi tamsiatnakin mang haw hi.
9 Na thinuknak le
na thin pulhangnak hangin,
Ka an cu vut hi.
10 Ka inmi vang ka hitui tuah
tokhel khawng hi.
Nangmah in kei cu cawi in vawk tul ci.
11 Ka nunnak cu taaklam
a nilim bang hi;
Hamko bangin thim ing.
12 Mahnaven maw Topa, nang cu
kumkhua in kumpi hi ci.
Khang khat nung khang khat nang cu
thei leleng haw tuk hi.
13 Tho tuk ci a Zion cu hehpih tuk ci;
Zion hehpihnak hunpha cu hengta hi.
Tu hun hi hun lemcangbel hi.
14 Na sila ten Zion khuapi
a sia ceng toh vangin
mahel leng haw hi.
Hehpih zetin, a leivul tianin
15 Minam hempohin Topa cu
lau haw tuk hi.
Leihum kumpi hempohin,
a huham cu kihca haw tuk hi.
16 Topa in Zion khuapi a tundinleh ten,
ama thawm ngengnak cu
langtik tuk hi.
17 A taisan zo mi a mihing tei aw cu
thei tuk a, a thungetnak haw cu
ngai tuk hi.
18 A hing tuk laihmite hei in
Topa a thangphat
theihnak haw tukin
Topa i bawl mite cu
khangleh tei ca lai in ngan un.
19 Topa in, a sangmi
a mun thiangtho pen zo hi;
Vancung pen leihum cu zo hi.
20 Thawngta mitei taunak thei tukin le,
thi tukin thukhen sa mite luattik hi.
21 Ngam hempoh pen, mihingte
hung khawmin,
Pathian a biak haw hi.
22 A min cu Zion ah than haw tuk a,
Jerusalem pen thangphat haw tuk hi.
23 Ka khanno laihin Topa in
ka thakiamtik hi.
Ka nunnak comtik hi.
24 Maw ka Pathian ka tek lai ngawlin,
ka nunnak la hih pahsun.
Topa aw, nang cu kumkhua in,
a nungmi hi ci.
25 Tanglaihin leipi piangtik ci a,
na khutzung tuah vante hi semsuah ci.Ref 102:25-27 Heb 1:10-12;
26 A venghawng haw in
pai khawng haw tuk hi.
Mahnaven nang cu kumkhua in
kho tuk hi.
Puan bangin thek tuk ci a,
pai lalthong khawng haw tuk hi.
27 Mahnaven nang cu nangmah leleng ci;
Na nunnak cu bo tih ni nei ma hi.
28 Ka cate uh ngamlum zetin um haw tuk a,
a casuante cu nangma hupnak nuai ah
kumkhua in um haw tuk hi.