PETER
Laikuat Vei Nihnak
(The Second Letter from Peter)
Thulamsial
Peter laikuat vei nihnak hi Khristian masa tei sial tukin a kuatmi hi. A tumtahbelmi cu zilhsualtu tei zilhnak do tukin hi. Himi tei zilhnak hangin nupa sualnak tam hi. Hitih bang buainakte a paih theihnak tukin Pathian le Jesuh Khrih cangcian zetin theihnak le Jesuh cu mit loli tuah a mutu le beng loli in, a thu hilhmi a zatu tei thuhilhnak cu khimzet len tukin sosuah hi. Lai ngantu pa in, Khrih hungleh tukma toh hi, a titu tei zilhnak khi sehelhbel cuang hi. Mah hangin Pathian in mi pa khatno hei sia tuk deih ma hi. Mi hempoh a sual haw sikin, nunpatmi hi tuk a deih hangin Khrih a hunleh hih ngawlnak cu na hihi, tin hilh hi.
1
1 Jesuh Khrih i nadektu le a tiikmi keimah Simon Peter in, a Pathian uh i dikcangnak le nunpantu Jesuh Khrih hangin a sunglawimi ka upnak uh a co bokmi nangmu lakah hi laikuat hi ngan ing.
2 Pathian le Topa Jesuh Khrih na theihnak uh hangin hehpihnak le lemdaihnak cu cangkim zetin co zalta un hi.
Pathian i Samnak le Tennak
3 A sunloihnak le a phatnak co bok tukin a samtu Khrih a theih theihnak uh hangin Pathian kihcaknak tuah a nun theihnak tukin a kul le sap uhmi hempoh cu Pathian ngilnak huhamin pia zo hi.
4 Mahten a tepsa mi a thawmngengnak le a sunglawi laksawng cu pia in, mah laksawng hangin a siatsuah theitu leihum tisa deihnak pen luatin, Pathian hihnak mangkawm thei tuk uh ci.
5 Himi loli hangin na upnak uh humah phatnak beet tuk tum unna, na phatnak uh humah theihnak beet tum un.
6 Na theihnak uh humah supdun theihnak beet hih unna, mahten supdun theihnak humah thuak theihnak beetin, thuak theihnak humah Pathian kihcaknak beet un.
7 Pathian kihcaknak na neih uhmi humah unau ningnat dunnak bet unna, mahten Khristian unau ningnat dunnak humah itnak beet un.
8 Hi phatnakte hi na kulzet uhmi hi a, cangkim zetin, na nei uh tale Topa Jesuh Khrih na theihnak uh hu le thawm hangin tha caktiktu le mualneitiktu hi haw tuk hi.
9 Mahnaven hih phatnakte a nei ngawltu cu mitcaw mi hi in, naino bek amu theitu hi. Tanglaih a sualnak haw pen thiangtik zo hi, tih hei theileh haw ma zo hi.
10 Mah hangin u le naute, Pathian i samnak le tennakte khi kumkhua kho tukin zuam dedeuh un. Mahtin na bawl uh tale na upnak uh pen pial awng tukma uh ci.
11 Mahten a Topa uh le pantu Jesuh Khrih i kumkhua uknak sungah tum theihnak thu ngah tuk uh ci.
12 Hi thu le la hi na theihsa uhmi le thutak na theih uhmi sungah khohkhah zetin, a dingsami hi nave uhcin theilehtik leleng ing.
13 Ka nunsungin hi thute ka theihtik leleng hi a dikmi hi tin ngaisung ing.
14 Ohtei Topa Jesuh Khrih in ciang zetin, a theihtik zo bangin a thi theimi ka pumpi cu zampal tung hi tih thei ing.
15 Mah hangin hi thu hi ka thih nungten na cin leleng tuk uhin, ka zawh tawkin zuam tung hi.
Khrih i Sunloihnak A Mutu
16 Ohtei Topa Jesuh Khrih cu huham tuah a hunlehnak tuk thu ka theihtik uhten tangthu bawlcawm mangin ka hilh uhmi kha ma hi. A thawmngeng dan cu ka mit loli uh tuah ka muh awng uhmi hi.
17 Sunglawi Cungnungbelin, “Himi hi ka ihbel ka Capa hi. A humah ka lungdam hi,” tin aw tuah a tih laihtakin, a Pa Pathian uhin, a upatnak le sunloihnak a piaknak munah kohte vang um bok ung hi.Ref 1:17-18 Mt 17:1-5; Mk 9:2-7; Lk 9:28-35;
18 Amah tuah mual thiangtho hum a, ka umlaih uhin mahmi aw cu vanlam pen tih za ung hi.
19 Mah hangin profet tei hilhmi thuthang humah upkhonak nei dedeuh ing. Nangmuhte vang mah thu cu thupizet hi tin na ngaisung thei uh tale pha hi, itahim titale mah thu cu Khrih ngilnak na lungmu sung uhah nikonghong aksi vak bangin a vak laklawh tian khuathim sung a vakmi mei inn bang hi.
20 Na dang hempoh sangin hi mi hi cing leleng un, a kuakua hei hihen ama thuno in, Lai Thiangtho sung a, profet tei thuhilhmi khi hilhciang thei tukma hi.
21 Itahim titale profet tei thuhilhmi cu mihing tei deihnak pen a hengmi kha ma hi, Pathian lak pen a hengmi thuthang a phuan haw ten Hawvang Thiangtho sosuahnakin, a hilhmi haw hi.