23
1 Balaam in Balak lakah, “Hilai munah keima ca in biaklandawh salih tiang inna, khuicang salih le tuucang salih hu puakin,” ti hi.
2 A hilh bang bawlin, Balak le Balaam in biaklandawh pa khatah khuicang pa khat le tuucang pa khat tenin biaklandawh salihah biakpiaknak bawl haw hi.
3 Balaam in Balak lakah, “Na halkang biakpiaknak elah ding hih inna, Topa in, keimah tawk nuam nen ti maw dong hihta nang. Topa in, ka lakah a langtikmi hempoh cu hilh tung,” ti hi. Mah hangin Balaam cu mual humah hawhin,
4 Pathian in Balaam cu tawk hi. Balaam in, “Biaklandawh salih tiang zo ing a, pa khat humah khuicang pa khat le tuucang pa khat ten biakpiaknak bawl ing,” ti hi.
5 Topa in, “Balak lakah kik inna, ka thucahmi hilhin,” ti hi.
6 Mah hangin Balaam cu kikin Balak cu a halkang biakpiaknak elah Moab hotu tuah ding leng laihin mu hi.
7 Balaam in, a nuailam bangin
profet awnkamin awn hi:
“Moab kumpi Balak in kei sam hi.
Siria le nisuahnak lam mual pen,
ka ai-in awnin, ti hi.
‘Israel mite tamin hi,’ ti hi.
8 Pathian i tamsiat ngawlmi
itin kaw ka tamsiat theih tuk?
Topa in sual hi a tih ngawlmi
sual hi tin itin kaw
ka tih theih tuk?
9 Suangpi mual sang hum pen
amuh cu cuan ing.
Mualkul hum pen a muhte mu ing.
Amuhno in, a nungca mi hinnam haw hi.
Miphun dang lakah sialcih
hi haw ma hi.
10 Jakob i casuante cu philnel
zah haw hi.
Israel cihah mite cu
sialcelh haw ma hi.
Pathian i mihing bangin
ka nunnak ni cu bo hen.
Dikcangnak bangin
lemdaihnak tuah
thi nang ngei,” ti hi.
11 Balak in Balaam i lakah, “Ka hum a, na bawlmi hi iti bang kaw? Ka ngalte tamsia tukin hi laiah sam naveng amuh lehlam muicu pia sisi,” ti hi.
12 Balaam in, “Kei i hilhmi cu Topa in, son tukin a hilhmite bek,” ti hi.
Balaam Otmi Vei Nihnak
13 Balak in Balaam i lakah, “Hung inna, Israel mi khenkhat bek na muh theihnak munah hawh nung. Mahlai pen tamsia ni ci ti hi.”
14 Balak in Balaam cu Pisgah Mualkul, Zafim i lo ah hawhpih hi. Mah laihah biaklandawh salih tiangin, biaklandawh pa khat humah khuicang pa khat le tuucang pa khat ten tuah biakpiaknak bawl hi.
15 Balaam in Balak i lakah, “Halkang biakpiaknak elah ding inna, hilai khinah Pathian tawk hih nang,” ti hi.
16 Topa in Balaam cu tawkin, a ot tuk mite cu a hilh ceng ten, Balak hilh tukin kiklehtik hi.
17 Balaam cu kikin, Balak cu a halkang biakpiaknak elah Moab mi hotu tuah a din mu hi. Balak in, “ Topa in, itin ti kaw?” tin dong hi.
18 Balaam a thuhilh cu panin,
“Hungin hi,
Zippor capa Balak hungin,
ka ot tukmi hi ngai tehin,
19 Pathian cu zolthu son thei
mihing bang hi ma hi.
A lungmu a thek lelem thei
mihing bang kha ma hi.
A tepmi hempoh cu
bawl khawng hi.
A awnkam tuah bawl khawng hi
20 Muicu pia tukin hilh hi,
Pathian in muicu
a piak zo hangin
khikleh thei ma toh ing.
21 Israel tei mailamah a hawhnak
haw tukin bawngsiatnak le
haksat tawhnak tuk mu mang.
Topa, a Pathian haw cu
amu nelah umin
Pathian cu a kumpi in,
aupih haw hi.
22 Pathian in Izipt ngam pen
tulpihin,
amu ca in ngamsial bangin
tang hi.
23 Mitzial hihen, polsia hihen
umma hi.
Israel mite langpang tukin
minam ten Israel mite
amuh haw ten,
‘Zo hem un,
Pathian thil bawlmi hi!’
ti haw tuk hi.
24 Israel hinnam cu
a ngil zetmi kiosa bang hi,
a matsa botbal khawngin,
a eih khawng laklawh le
A thisan a in celh laklawh
colh tih nei ma hi,” ti hi.
25 Balak in Balaam lakah, “Israel mite tamsia tuk cu el naven cin muicu pia ngawl bekin umin hi,” ti hi.
26 Balaam in, “ Topa i tihmi hempoh bawl tung, tih hilh zo toh ma ing maw?” tin ti hi.
Balaam Ot Vei Thumnak
27 Balak in Balaam lakah, “Ka lakah hung inna, mun dangah hawhpih nang. Mah laih pen ka ca in Israel mite tamsia tukin Topa in, a phal hei hi kha thei hi,” ti hi.
28 Mah hangin Balak in Balaam cu phillawn muh theihnak Peor Mualkul ah hawhpih hi.
29 Balaam in, a lakah, “Keima ca in biaklandawh salih hilai munah bawl inna, khuicang salih le tuucang salih hunpihin hi,” ti hi.
30 A tih bangkekin Balak in bawl a, biaklandawh pa khat humah khuicang pa khat le tuucang pa khat ten biakpiaknakah pia hi.